બાંગ્લાદેશમાં હિન્દુ મંદિરો અને ઘરો પર હુમલા બદલ 4 લોકોની ધરપકડ

ખાસ-ખબર ન્યૂઝ ઢાકા, તા.16
બાંગ્લાદેશમાં તપાસ એજન્સીઓએ હિન્દુ મંદિરો અને ઘરો પર હુમલા બદલ 4 લોકોની ધરપકડ કરી છે. આ લોકો પર ઉત્તરી જિલ્લા સુનમગંજમાં એક મંદિર અને હિન્દુઓના ઘરો અને દુકાનોમાં તોડફોડ કરવાનો આરોપ હતો. પોલીસે આ કેસમાં 12 નામાંકિત અને 170 અજાણ્યા લોકો સામે કેસ નોંધ્યો હતો. 3 ડિસેમ્બરના રોજ એક ફેસબુક પોસ્ટને પગલે સુનામગંજ જિલ્લામાં તણાવ હતો. જો કે વિવાદ બાદ પોસ્ટ ડિલીટ કરવામાં આવી હતી, પરંતુ તેના સ્ક્રીન શોટ્સ સોશિયલ મીડિયા પર વાઇરલ થયા હતા. આ પછી વિસ્તારમાં હિંસા ફેલાઈ ગઈ. આ સમયગાળા દરમિયાન તોફાનીઓએ સુનામગંજમાં લોકનાથ મંદિર અને હિન્દુઓના ઘરોમાં તોડફોડ કરી હતી. હિંસા ફેલાઈ ગયા બાદ પોલીસે તે જ દિવસે પોસ્ટ કરનાર આકાશ દાસને કસ્ટડીમાં લીધો હતો. સુરક્ષાના કારણોસર તેને જિલ્લા મુખ્યાલયના પોલીસ સ્ટેશન લઈ જવામાં આવ્યો હતો. બાંગ્લાદેશના ભૂતપૂર્વ વડાપ્રધાન શેખ હસીનાએ દેશ છોડ્યો ત્યારથી હિન્દુઓ વિરુદ્ધ ધાર્મિક હિંસાના કેસોમાં સતત વધારો થયો છે. ’સેન્ટર ફોર ડેમોક્રેસી, પ્લુરાલિઝમ એન્ડ હ્યુમન રાઈટ્સ’ (CDPHR)ના અહેવાલ મુજબ, 5 થી 9 ઓગસ્ટ વચ્ચે બાંગ્લાદેશમાં હિંદુઓની લૂંટની 190 ઘટનાઓ નોંધાઈ હતી.

આ ઉપરાંત 32 ઘરોમાં આગચંપી, 16 મંદિરોમાં તોડફોડ અને 2 જાતીય હિંસાના કેસ નોંધાયા છે. રિપોર્ટ અનુસાર 20 ઓગસ્ટ સુધી હિંદુઓ વિરુદ્ધ હિંસાના કુલ 2010 કેસ નોંધાયા હતા. જેમાં હિંદુ પરિવારો પર હુમલાના 157 કેસ અને મંદિરોને અપમાનિત કરવાના 69 કેસ સામેલ છે. બાંગ્લાદેશમાં પણ દુર્ગા પૂજા દરમિયાન પંડાલોને નિશાન બનાવવામાં આવ્યા હતા. આ સિવાય મૂર્તિઓની અપવિત્રની પણ ઘણી ઘટનાઓ નોંધાઈ છે. યુનુસ સરકારે 25 નવેમ્બરે ઇસ્કોનના સંત ચિન્મય કૃષ્ણ દાસની રાજદ્રોહના આરોપમાં ધરપકડ કરી હતી. ચિન્મય પ્રભુ પર તેમની એક રેલી દરમિયાન રાષ્ટ્રધ્વજનું અપમાન કરવાનો આરોપ હતો. આ રેલી 25 ઓક્ટોબરે ચટગાંવના લાલ દીઘી ગ્રાઉન્ડમાં થઈ હતી. રેલી પછી ઇગઙ નેતા ફિરોઝ ખાને ચિન્મય પ્રભુ અને અન્ય લોકો વિરુદ્ધ પોલીસ સ્ટેશનમાં ફરિયાદ નોંધાવી હતી. હકીકતમાં, રેલી દરમિયાન કેટલાક લોકોએ આઝાદી સ્તંભ પર બાંગ્લાદેશના રાષ્ટ્રધ્વજની ઉપર સનાતન જાગરણ મંચનો ધ્વજ ફરકાવ્યો હતો. બાંગ્લાદેશમાં રાષ્ટ્રધ્વજની ઉપર અન્ય કોઈ ધ્વજ લહેરાવવો એ દેશદ્રોહ ગણાય છે.

ચિન્મય પ્રભુની ધરપકડ બાદ ચટગાંવમાં હિંસા ફેલાઈ હતી. આ હિંસામાં એક વકીલનું પણ મોત થયું હતું. વકીલના મૃત્યુ બાદ ફરી એકવાર ચિન્મય પ્રભુ અને અન્ય લોકો સામે કેસ નોંધવામાં આવ્યો હતો. આ કેસમાં 164 નામના અને લગભગ 500 અજાણ્યા લોકોને આરોપી બનાવવામાં આવ્યા છે.