ફરિયાદી અભિષેક ઝાટકિયાએ પોલીસ કમિશનરને આપેલી અરજીમાં સુસરા વિરૂદ્ધ પગલાં લેવા માંગ કરી
ટ્રાફિક હૅડ કૉન્સ્ટેબલ લખન સુસરાએ પાવતી વગર લાંચરૂપે 500 રૂપિયા માંગ્યા હોવાની અને ઢોરમાર માર્યાની રાવ
- Advertisement -
ખાસ-ખબર ન્યૂઝ રાજકોટ
રાજકોટનાં કોટેચા ચોક પાસે થોડાં દિવસ પહેલાં યુવા ભાઈ-બહેનને બેફામ ગાળો ભાંડીને ભાઈ અભિષેક ઝાટકિયાને ઢોર માર મારનાર ટ્રાફિક હૅડ કૉન્સ્ટેબલ લખન રાજાભાઈ સુસરા વિરૂદ્ધ અભિષેકે રાજકોટ પોલીસ કમિશનરને અરજી કરી છે. ઉલ્લેખનીય છે કે, અભિષેકને બેફામ માર મારીને લખન સુસરાએ વિક્ટિમ કાર્ડ ખેલ્યું હતું અને અભિષેક વિરૂદ્ધ લાત મારવાની અને ફરજમાં રૂકાવટની ફરિયાદ નોંધાવી હતી અને પોલીસે અભિષેકની ધરપકડ પણ કરી હતી. જો કે, એ પછી સીસીટીવી ફૂટેજ સામે આવતાં સુસરાનો ભાંડો ફૂટ્યો હતો. સીસીટીવીનાં ફૂટેજમાં સ્પષ્ટ દેખાય છે કે, સુસરા બહુ ઝનૂનપૂર્વક અભિષેકને માર મારી રહ્યો છે. લોકો જો વચ્ચે ન પડ્યાં હોત તો ન થવાનું થઈ ગયું હોત. આ મામલે અભિષેક ઝાટકિયાએ પોલીસ કમિશનરને લેખિતમાં અરજી કરી છે. જે નીચે મુજબ છે:
અમે ફરિયાદી રાજકોટ મુકામે રહીએ છીએ અને દર્શન યુનિવર્સિટીમાં કોમ્પ્યુટર સાયન્સનો અભ્યાસ કરીએ છીએ, તેમજ આ કામના તહોમતદાર રાજકોટ મુકામે પોલીસ હૅડ કૉન્સ્ટેબલ તરીકે બકલ નં. 226 ટ્રાફિક શાખા, રાજકોટમાં ફરજ બજાવે છે.
તા. 13-10-2024ના બપોરે 12-00 વાગ્યા આસપાસ અમો ફરિયાદી તથા અમોના બહેન અને બનેવી અમોની ફોર વ્હીલર કારમાં રાજકોટ મુકામે કોટેચા ચોક પાસે આવેલી સપના સોડામાં સોડા પીવા તથા પાણીની બોટલ લેવા માટે ગયેલાં હતા ત્યારે અમો ફરિયાદીએ અમોની હોન્ડા કંપનીની અમેઝ ફોર વ્હીલર કાર કે જેના રજિસ્ટ્રેશન નં. GJ-03-HA-4969 $ છે, તે કાર કોટેચા ચોક પાસે સપના સોડાની સામે પાર્ક કરેલી હતી. અમોની કારની આગળ અન્ય બે કાર પણ પાર્ક કરેલી હતી.
- Advertisement -
ત્યારબાદ પાર્ક કર્યાની પાંચ મિનિટમાં જ ટ્રાફિક શાખાનું ટોઈંગ વાહન આવેલ અને અમોની કાર તથા અમોની આગળ પડેલ અન્ય બે કારને લોક કરી દીધેલા. જેથી અમો અમોની કાર પાસે ગયેલા ત્યારે અમોની આગળ પડેલી અન્ય બે કારના માલીકોએ રૂા. 200ની રકમ પોલીસને આપી અને પોતાની કારનું લોક ખોલાવી લીધેલું અને તે લોકો ત્યાંથી જતા રહ્યાં હતાં.
ત્યારબાદ અમો ફરિયાદી આ કામના તહોમતદાર કે જેઓ પોલીસ વાનમાં બેસેલા હતા ત્યાં ગયેલા અને અમો ફરિયાદીએ આ કામના તહોમતદારને જણાવેલું કે, ‘સાહેબ મારી કાર સાઈડમાં જ પડેલી છે, કોઈ ટ્રાફિકની સમસ્યા થાય તે રીતે પાર્ક કરેલી નથી.’ જેથી આ કામના તહોમતદાર ઉશ્કેરાઈ ગયેલા અને અમોને જણાવેલ કે, ‘****, રૂપિયા ભર અને લોક ખોલાવી લે.’ આ રીતે અમોને અહીંયા લખી ન શકાય તેવી ગાળ બોલી અમોને રૂપિયા ભરવા જણાવેલ. તેમ છતાં અમોએ તેઓને શાંતિથી પૂછયું કે સાહેબ, કેટલા રૂપિયા ભરવાના છે? હું દંડ ભરવા તૈયાર છું, ત્યારે આ કામના તહોમતદારે જણાવેલું કે રૂા. 500/- આપીશ તો પહોંચ નહીં આપું અને રૂા. 1000/- આપીશ તો પહોંચ મળશે.’ જેથી અમો ફરિયાદીએ આ કામના તહોમતદારને જણાવેલ કે તમે મારી આગળ પાર્ક કરેલી કારને તો રૂા. 200 લઈ જવા દીધા તો મારી પાસે કેમ રૂા. 500 માંગો છો, જેથી આ કામના તહોમતદાર ઉશ્કેરાઈ ગયેલા અને અમોને ઝાપટ મારવાનો પ્રયત્ન કરેલ, પરંતુ તેઓના સાથી કર્મચારીએ તેઓને રોકી દીધેલ તેમજ અમો ફરિયાદીએ દંડની રકમ રૂા. 1000 આ કામના તહોમતદારને ચૂકવી આપેલ છતાં તેઓએ અમોને તેની કોઈ પહોંચ આપેલ નહીં.
ત્યારબાદ અમો ફરિયાદીના બહેન દિક્ષા નટવરલાલ ઝાટકીયા આ પોલીસ વાન પાસે આવેલ અને આ કામના તહોમતદારને જણાવેલ કે સાહેબ, અમારી કાર રોડની સાઈડમાં જ પાર્ક કરેલી છે, તમે નીચે ઉતરીને જોવા તો આવો. જેથી આ કામના તહોમતદાર પોલીસ વાનમાંથી ઉતરી અને અમોની કાર પાર્ક કરેલ હતી ત્યાં આવેલા અને જણાવેલ કે આ નો પાર્કિંગ જ છે, તેમ કહી જાહેરમાં ‘****, ****’ જેવી અહીંયા લખી ન શકાય તેવી ગાળો બોલી સંબોધવા લાગેલા ત્યારે અમો ફરિયાદીએ તહોમતદારને જણાવેલું કે અહીંયા લેડીઝ મારા બહેન ઊભા છે, ગાળો તો ન બોલો, જેથી આ કામના તહોમતદાર ઉશ્કેરાઈ ગયેલા અને અમોને બે ઝાપટ (ફડાકા) મારેલા, જેથી અમો પાસેથી દૂર કરવા અને અમો ફરિયાદીને વધુ માર ન મારે તે માટે અમોએ આ કામના તહોમતદારને પગથી આઘા ખસેડેલ. જેથી તેઓ વધુ ઉસ્કેરાઈ અને ત્યાં રસ્તાની સાઈડમાં પડેલ લાકડાનો ધોકો ઉપાડેલ અને અમોને માર મારવા આવેલા પરંતુ ત્યાં હાજર રહેલી પબ્લિકે તેઓને પકડી રાખી રોકેલા. આ તમામ બાબતનો વિડીયો સોશિયલ મીડિયામાં વાઈરલ થયેલ છે. ત્યાં હાજર રહેલ પબ્લિકે પણ આ કામના તહોમતદારને જણાવેલ કે તમારો ગાળો ના બોલવી જોઈએ, અને માર મારવો ન જોઈએ, નો પાર્કિંગમાં પાર્ક કરી હોય તો તમોને માત્ર દંડ વસુલવાની સત્તા છે. આ કામના તહોમતદારનું આ રીતનું ગેરકાયદેસરનું વર્તન થતાં અમોએ આ કામના તહોમતદારને સસ્પેન્ડ કરાવી દેવાનું પણ કહેલ છે, જેથી સમાજમાં એક દાખલો બેસે કે પોલીસ હોય તો દાદાગીરી ન કરી શકાય. તમામ ઘટના ત્યાં આવેલ લીટલ લોર્ડસ સ્કૂલના સીસીટીવી કેમેરામાં કેદ થયેલ છે, જે લીટલ લોર્ડસ સ્કૂલના સીસીટીવી ફૂટેજ કબજે કરી યોગ્ય કાર્યવાહી કરવા અમારી નમ્ર વિનંતી છે. અમોએ સદરહુ લીટલ લોર્ડસ સ્કૂલમાંથી સીસીટીવી ફૂટેજ મેળવેલ છે, જે ફૂટેજ આ ફરિયાદ સાથે અલગથી પેનડ્રાઈવમાં સામેલ રાખેલ છે. જે પેનડ્રાઈવન સોની કંપનીની છે તથા તેની સ્ટોરેજ કેપેસીટી 8 ૠઇની છે.
ત્યારબાદ આ કામના તહોમતદારે 100 નંબર ઉપર ફોન કરી પોલીસ વાન બોલાવી લીધેલ અને અમોને પોલીસ વાનમાં બેસવા જણાવેલ. તેમજ અમોને બહેન દિક્ષાબેનને પણ પોલીસ વાનમાં બેસવા જણાવેલ, પરંતુ અમોના બહેન એક સ્ત્રી હોય, આ જે પોલીસ વાન આવેલ તેમાં કોઈ લેડી કોન્સ્ટેબલ ન હોય, જેથી અમોના બહેને તેમાં બેસવાની ના કહેતા આ કામના તહોમતદારે જણાવેલ કે ‘જો તું આમાં નહીં બેસે તો તારા ભાઈને ખોટા કેસમાં ફસાવી દઈશ અને ફરજમાં રૂકાવટનો કેસ દાખલ કરી દઈશ’ જેથી આ કામના તહોમતદારની ધમકીથી અમોના બહેન અને અમો ફરિયાદી પોલીસ વાનમાં બેસેલ અને ગાંધીગ્રામ પોલીસ સ્ટેશન ગયેલ અને ત્યાં પહોંચ્યા બાદ અમોને અમારી દંડની રકમ રૂા. 1000ની પહોંચ આપવામાં આવેલ.
આમ આ કામના તહોમતદારે અમો સાથે ક્રૂરતાભર્યુ વર્તન કરેલ છે તેમજ અમોને જાહેરમાં ભુંડી ગાળો બોલી અમારું અપમાન કરેલ છે તેમજ અમો ઉપર હાથ ઉપાડેલ છે, અમોને જાહેરમાં માર મારેલ છે જેથી આ કામના તહોમતદાર સામે કાયદેસરની કાર્યવાહી કરવા અમારી નમ્ર વિનંતી છે તેમજ આ કામના તહોમતદાર પોલીસમાં હોય તેમજ મોટી ઓળખાણ- લાગવગ ધરાવતા હોય, અમોને આ કામના તહોમતદારથી જાનનું જોખમ હોય અમોને હથિયારી પોલીસ રક્ષણ અપાવવા નમ્ર અરજ છે.
સબબ અમો ફરિયાદી આ ફરિયાદ લાવી દાદ માંગવાની કે –
ઉપરોક્ત હકિકતે આ કામના તહોમતદારે અમો ફરિયાદી સાથે એક સરકારી કર્મચારીને ન છાજે તેવું વર્તન કરી, અમોને જાહેરમાં ગાળો બોલી અપમાનિત કરેલ છે તેમજ અમોને જાહેરમાં માર મારેલ છે જેથી તેઓ સામે ગુનો દાખલ કરી યોગ્ય પગલાં ભરી, પકડી મંગાવી અને સખત નશ્યત પહોંચાડવા અમારી નમ્ર અરજ છે. આ સાથે અરજીકર્તાએ સાક્ષીઓના નામનો પણ અરજીમાં ઉલ્લેખ કર્યો છે.
અભિષેક સામે પગલાં લેવામાં ગજબનાક સ્ફૂર્તિ દાખવનાર પોલીસ હવે સુસરા વિરૂદ્ધ ત્વરા દાખવશે?
પોતાનું પાપ છૂપાવવા હેડ કૉન્સ્ટેબલ સુસરાએ અભિષેક ઝાટકિયા વિરૂદ્ધ ફરિયાદ લખાવી અને પોલીસે અભિષેક વિરૂદ્ધ ત્વરિત પગલાં લીધાં. હવે સીસીટીવી ફૂટેજ સામે આવ્યા છે અને તેમાં સ્પષ્ટ દેખાઈ રહ્યું છે કે, લખન સુસરાએ યુવાનને બેફામ માર માર્યો હતો. તો હવે પોલીસ પોતાનાં પરિવારનાં જ ગણાતા સુસરા સામે કેવાં પગલાં લેશે? પગલાં લેશે કે કેમ એ પણ એક સવાલ છે.
હેડ કૉન્સ્ટેબલ લખન સુસરાનાં વર્તન અંગે ભારે ચર્ચા
ટ્રાફિક શાખાનાં હેડ કૉન્સ્ટેબલ લખન સુસરાનું વર્તન લોકો સાથે હંમેશા ચર્ચામાં રહ્યું છે. અગાઉ પણ અનેક વિવાદોમાં તેણે લખ્ખણ ઝળકાવ્યા છે. ટોઈંગ દરમિયાનની તેની કામગીરીમાં પણ અનેક વિવાદો સર્જાતા રહ્યાં છે. સવાલ એ છે કે, શું તેને થોડાં મહિના ઘેર બેસાડીને આરામ અપાશે?