રાજકોટમાં નકલી સ્કૂલ!

નકલી દૂધ, નકલી ઘી, નકલી ટોલ પ્લાઝા અને હવે…

છ વર્ષથી ધમધમતી હતી સ્કૂલ ! રાજકોટના માલિયાસણના પિપળીયામાં માન્યતા વગર ધમધમતી ગૌરી પ્રિ-પ્રાઈમરી શાળા ઝડપાઈ

શિક્ષણ વિભાગની માન્યતા વિના ધો.1થી 10ના વિદ્યાર્થીઓને દંપતી ભણાવતું, ચેકિંગમાં 33 વિદ્યાર્થી મળ્યા

શિક્ષણ વિભાગની સ્પષ્ટ બેદરકારી…
વધુમાં પ્રાપ્ત વિગત મુજબ કાત્યાયનીબેન તિવારી અને સંદીપ તિવારી બોગસ સ્કૂલ ચલાવતા હતા. જેથી તેમની સામે અમે પોલીસ ફરિયાદ દાખલ કરી રહ્યા છીએ અને હાલ સ્કૂલને સીલ કરવામાં આવી છે. આ સ્કૂલમાં જ્યારે તપાસ કરવામાં આવી તો આ સમયે સ્કૂલમાં ભણતા 33 વિદ્યાર્થીઓ મળી આવ્યા છે. આ સાથે જ રાજકોટ શહેરની ત્રણ ખાનગી સ્કૂલના લિવિંગ સર્ટિફિકેટ પણ મળી આવ્યા છે. પરંતુ તે ત્રણેય સ્કૂલ કઈ છે એ હજુ જાહેર કરવામાં આવ્યું નથી. જો કે, અહીં સવાલ એ છે કે, છેલ્લા છ વર્ષથી બોગસ સ્કૂલ ધમધમતી હતી તો શિક્ષણ વિભાગનું ધ્યાને શા માટે ન ગયું?

ખાસ-ખબર ન્યૂઝ રાજકોટ

ગુજરાતભરમાં જાણે નકલી અધિકારીઓ, નકલી પોલીસકર્મીઓનો રાફડો ફાટ્યો હોય તેમ રાજકોટના માલિયાસણના પીપળીયામાંથી નકલી શાળા ઝડપાઈ છે. આમ ગુજરાતમાં નકલીની હવે કોઈ નવાઈ રહી જ નથી. નકલી આઈ.પી.એસ. અધિકારી હોય કે નકલી ટોલનાકુ કે નકલી કચેરી કે નકલી ઘી, દૂધ કે અન્ય કોઈ પણ વસ્તુ હોય હવે નકલી બાબતે ગુજરાત અવ્વલ આવી રહ્યું છે.

રાજકોટના માલિયાસણના પીપળીયામાં ગૌરી પ્રિ-પ્રાઈમરી શાળા છેલ્લા ઘણા સમયથી કોઈપણ માન્યતા વગર ચાલતી હતી અને હવે આ નકલી શાળા ઝડપાયા બાદ અધિકારીઓ દોડતા થઈ ગયા છે. ગૌરી પ્રિ-પ્રાઈમરી શાળા કોઈપણ પ્રકારની માન્યતા વગર ધમધમતી હતી. જો કે આ અંગેની જાણ થતાં જ શિક્ષણ વિભાગની ટીમ શાળા પર પહોંચી હતી અને ગૌરી પ્રિ-પ્રાઈમરી સ્કૂલને શિક્ષણ વિભાગ દ્વારા સીલ કરવામાં આવી છે. આ સમગ્ર મામલાની પોલીસને જાણ કરવામાં આવી હતી. શિક્ષણ વિભાગ દ્વારા શાળાના સંચાલકો સામે કાર્યવાહીની પ્રક્રિયા હાથ ધરવામાં આવી છે. એક વિદ્યાર્થીને સ્કૂલ દ્વારા લિવિંગ સર્ટિફિકેટ આપવામાં ન આવતા તપાસમાં સમગ્ર ઘટસ્ફોટ થયો હતો. રાજ્યના શિક્ષણ વિભાગની માન્યતા વિના સ્કૂલ ધમધમતી હોવાનું સામે આવ્યું છે. જેમાં શિક્ષણ વિભાગની માન્યતા વિના ધોરણ 1થી 10ના વિદ્યાર્થીઓને ભણાવવામાં આવતા હતા. જો કે, હાલ તાલુકા પ્રાથમિક શિક્ષણ અધિકારી દ્વારા સ્કૂલને સીલ કરવામાં આવી છે અને પોલીસ ફરિયાદ માટેની કાર્યવાહી શરૂ કરવામાં આવી છે. તપાસ દરમિયાન રાજકોટ શહેરની ત્રણ ખાનગી સ્કૂલના લિવિંગ સર્ટિફિકેટ પણ મળી આવ્યા છે. જો કે, આ ત્રણ સ્કૂલ કઈ છે તે હજુ જાહેર થયું નથી. રાજકોટના ઇન્ચાર્જ તાલુકા પ્રાથમિક શિક્ષણ અધિકારી વિમલ ગઢવીએ જણાવ્યું હતું કે, રાજકોટ તાલુકાના પિપળિયા ગામમાં નવીનનગરમાં આવેલી ગૌરી પ્રિ-પ્રાઈમરી સ્કૂલમાં એક વિદ્યાર્થીને લિવિંગ સર્ટિફિકેટ આપતા ન હતા. આ પ્રકારની ફરિયાદ તાલુકા પ્રમુખ કેતનભાઈ કથીરિયા દ્વારા મળી હતી. જેથી આજે તપાસ માટે ત્યા પહોંચ્યા હતા. જે દરમિયાન સામે આવ્યું કે, શિક્ષણ વિભાગની માન્યતા વિના વર્ષ 2018થી અત્યારસુધી એટલે કે છ વર્ષથી બોગસ સ્કૂલ ધમધમતી હતી. સ્કૂલના સંચાલકો પાસે કોઈપણ પ્રકારના ડોક્યુમેન્ટ જ નથી.