રાજકોટમાં 6 મહિનામાં 300 કિલો ગાંજો વેચાયો !

રાજકોટમાં ગાંજો વેચવા 50 ઓરડી
અને 2 માણસ રાખ્યાં, ચિઠ્ઠી ઉપર ચાલતો હતો ગાંજાનો વેપાર !

પેડલરનું નેટવર્ક તોડવા પોલીસે 2 રોજમદાર રાખ્યા!
ખાસ-ખબર ન્યૂઝ રાજકોટ

નશાના કારોબાર માટે પંકાયેલા રાજકોટના જંગલેશ્ર્વર વિસ્તારમાં ડ્રગ્સ પેડલરોએ માજા મૂકી છે. આ વિસ્તારના એક પેડલરે તો ગાંજો વેચવા માટે અહીં રીતસરની એક આખી ’ઉ’ કંપની ઉભી કરી દીધી છે. આ પેડલર અહીં સિસ્ટેમેટિક ગાંજાનો ધંધો કરે છે. પોલીસથી બચવા 50 ઓરડી રાખી છે. ગાંજો વેચવા 2 માણસોને નોકરી પર રાખ્યા. ગાંજો લેવા એક જગ્યાએ કુપન ફડાવો અને બીજી જગ્યાએથી માલ લો એવી આખી સિસ્ટમ ઉભી કરી હતી.
રાજકોટ શહેરમાં છેલ્લા ઘણા સમયથી ગાંજાનું નેટવર્ક ફુલ્યું-ફાલ્યું છે. તેને રોકવા માટે પોલીસે એક બાદ એક દરોડા પાડવાનું શરૂ કર્યું છે. દરમિયાન શહેરના અત્યંત સંવેદનશીલ એવા જંગલેશ્વર વિસ્તારમાં જઘૠએ ખાસ ઓપરેશન પાર પાડીને ગાંજાનો 51 કિલોનો જથ્થો પકડી પાડતાં પોલીસને એક મોટી સફળતા મળી છે.
જંગલેશ્વરમાં મોટાપાયે ગાંજો છુપાવાયો હોવાની પોલીસને માહિતી તો હતી પણ ક્યા અને આ આખું નેટવર્ક કેવી રીતે કામ કરે તે અંગે કોઇ માહિતી નહોતી. તેથી પોલીસે આ માટે ત્યાં 2 રોજમદારને રાખ્યા જેમને પોલીસને આખા નેટવર્ક વિશે માહિતી આપી. તો આવો સૌપ્રથમ જાણીએ કે આ આખું નેટવર્ક કેવી રીતે કામ કરતું હતું.
સૌપ્રથમ આ પેડલર અને તેના સાથીએ 50 એવી ઓરડી આઇડેન્ટીફાઇ કરી જે ગેરકાયદે હોય. સાથે સાથે તે વસ્તુનું પણ ધ્યાન રખાયું હતું કે ત્યાં વધારે કોઇની અવરજવર ના હોય. જેવો ગાંજાનો જથ્થો આવે કે તરત જ આ લોકો આ 50માંથી કોઇ એક ઓરડીમાં માલ છુપાવી દેતા હતા. હવે માલ આવ્યો એટલે યોગ્ય જગ્યાએ ગોઠવાઇ ગયો, પણ જ્યાં માલ રાખ્યો ત્યાંથી જ વેચે તો પોલીસને ઠેકાણાની જાણ થઈ જાય. પેડલર અને તેના સાથીએ આ સમસ્યાનો હલ પણ કાઢ્યો. તેમણે આ માટે એક સિસ્ટમ બનાવી. જો કોઇ ગાંજો લેવા આવે તો સૌપ્રથમ એક વ્યક્તિ પાસે જઇને પૈસા આપવાના. બાદમાં આ વ્યક્તિ ગાંજો લેનારને એક ચિઠ્ઠી લખી આપે. જે ચિઠ્ઠી અન્ય વ્યક્તિને બતાવતા તે ગાંજાની પડીકી આપતો. વળી આ આખી સિસ્ટમ યોગ્ય રીતે ચાલે તે માટે પેડલરે બે વ્યક્તિને દૈનિક 1,000ના પગાર પર નોકરીએ પણ રાખ્યા હતા. આ લોકો છેલ્લા 6 મહિનાથી આ સિસ્ટેમેટિક રીતે જંગલેશ્વર વિસ્તારમાં ગાંજાનું વેચાણ કરતા હતા.

જંગલેશ્વર વિસ્તારમાં મોટાપાયે ગાંજો છુપાવાયો હોવાની બાતમી તો પોલીસને ઘણા દિવસ પહેલાં મળી ગઈ હતી. પરંતુ આ વિસ્તાર એકદમ ગીચતાવાળો હોવાથી ઘણી વખત પોલીસને દરોડો પાડ્યા બાદ ધાર્યું પરિણામ મળતું નહોતું. તેથી પોલીસે આ પેડલરનું નેટવર્ક તોડવા માટે 2 માણસોને રોજમદાર તરીકે રાખ્યા.
પોલીસ પૂછપરછમાં એવો પણ ખુલાસો થયો છે કે, આ બન્નેને રોજ 1000 રૂપિયા મહેનતાણું મળતું હતું અને દિવસનો 50,000 રૂપિયાનો ગાંજો બન્ને મળીને વેચી નાખતા હતા. આ વેચાણ લગભગ 6 મહિનાથી ચાલી રહ્યું હોવાને કારણે અત્યારસુધીમાં બન્નેએ અંદાજિત 300 કિલો ગાંજો વેચી માર્યો હોવાનું ધ્યાન પર આવ્યું છે. આ ગાંજા નેટવર્કમાં પોલીસે બે શખસની ધરપકડ કરી છે અને જાવેદ જૂણેજા ફરાર થઈ ગયો છે. જ્યારે ગોંડલના એક સપ્લાયરનું નામ પણ આ નેટવર્કમાં ખુલ્યું હોવાથી એસઓજી દ્વારા હવે તેને પકડવા માટે તજવીજ શરૂ કરી દેવામાં આવી છે.

પૂછપરછ દરમિયાન ગાંજો જાવેદ જુણેજાના કહેવાથી રાખેલ હોવાનુ જણાવ્યું હતું. ભકિતનગર પોલીસ દ્વારા આરોપીઓની વધુ પૂછપરછ માટે 10 દિવસના રિમાન્ડ માગવામાં આવ્યા હતા. જેમાં બચાવપક્ષે રોકાયેલ એડવોકટ રોહિત ઘીયા દ્વારા દલીલ કરવામાં આવી કે, પોલીસ દ્વારા એરેસ્ટ મેમોમાં ગ્રાઉન્ડસ ઓફ એરેસ્ટ અને રીઝન્સ ઓફ એરેસ્ટ જણાવામાં આવેલ નથી. તેમજ આરોપીઓએ તમામ માહિતી તથા હકિકત જણાવી દીધી હોય તેમજ રિમાન્ડ અંગેના મુદ્દા જોતા પોલીસ પાસે તમામ માહિતી હોય જેથી આરોપીઓની 10 દિવસની પોલીસ કસ્ટડીની જરૂરિયાત ન હોય તેમજ રિમાન્ડ સમયના સિદ્ધાંતો ઉચ્ચ અદાલતના લાગુ પડતા ચુકાદાઓ વિશે વિગતવાર દલીલ કરવામાં આવી હતી. જે ગ્રાહ્ય રાખી કોર્ટ દ્વારા આરોપીઓના પોલીસ રિમાન્ડ નામંજૂર કર્યા હતા અને આરોપીને જેલ હવાલે કરવામાં આવ્યા છે.

20 દિવસ સુધી રેકી કર્યા બાદ ઓરડી સુધી પહોંચ્યા
પોલીસના આ 2 ખાસ માણસોએ 20 દિવસ સુધી સતત રેકી કર્યા બાદ પેડલરના નેટવર્કને ક્રેક કરી લીધું હતું. અને જે ઓરડીમાં ગાંજો પડ્યો હતો. ત્યાં સુધી આ બંને માણસો પહોંચી ગયા હતા. પોલીસ આ બંને માણસોને રોજના 500 રૂપિયા અને જમવાનો ખર્ચ પણ ચૂકવતી હતી. પોલીસે દરોડો પાડ્યાના ત્રણેક દિવસ પહેલાં આ ઓરડીમાં ગાંજાનો જથ્થો ઠલવાયો હતો અને ત્યાં લગભગ 10 કિલોથી વધુ જથ્થો આવ્યો હોવાથી આ બન્ને માણસોએ પોલીસનું ધ્યાન દોરી વધુ જથ્થો આવવાનો બાકી હોવાની સચોટ બાતમી આપી હતી. જેના કારણે પોલીસે વધુ ત્રણ દિવસ રાહ જોઈ હતી. આમ તો પોલીસે મધરાત્રે જ દરોડો પાડવાનું નક્કી કર્યું હતું. પરંતુ ગાંજા સાથે પકડાયેલો અસલમ ગુરુભાઈ સૈયદ અને રફિક યુસુફભાઈ જુણેજા એકદમ ચાલાક નીકળ્યા હતા. આ બન્ને 50 જેટલી એવી ઓરડી વિશે જાણતા હતા જે ગેરકાયદે છે. સાથે સાથે ત્યાં બહુ ઓછા લોકો રહેતા હોવાથી જથ્થો આવે એટલે ગમે તે ઓરડીમાં છુપાવી દેતા હતા. હવે ગાંજો ક્યાં પડ્યો છે તે ઓરડી શોધવી કપરી બની ગઈ હતી. આમ છતાં બાતમીદારોએ તે શોધી કાઢી અને પોલીસ ગાંજા સુધી પહોંચી હતી.