7 વર્ષમાં 10 મહત્ત્વપૂર્ણ સરકારી પરીક્ષાઓનાં પેપરલીક

2021માં 3 વખત અને 2018માં 4 વખત સરકારી ભરતી પરીક્ષાનાં પેપર ફૂટ્યાં

– ભવ્ય રાવલ

ક્યા વર્ષમાં ક્યા પેપર ફૂટ્યા?

GPSC ચીફ ઓફિસર: 2014
રેવન્યુ તલાટી: 2015
મુખ્ય સેવિકા: 2018
નાયબ ચિટનીસ: 2018
પોલીસ લોકરક્ષક દળ : 2018
TAT: 2018
બિનસચિવાલય ક્લાર્ક: 2019
વિદ્યુત સહાયક : 2021
સબ-ઓડિટર : 2021
હેડ ક્લાર્ક : 2021

ગુજરાત મોડેલ વર્ગખંડમાં પેપર વિદ્યાર્થીઓના હાથમાં આવતા પહેલા વોટ્સએપમાં આવી જાય છે! આ છે સ્માર્ટ અને ડિજીટલ ગુજરાત?

સોશિયલ મીડિયામાં એવી રમૂજ ફેલાઈ રહી છે કે, ગુજરાત ભાજપ સરકારમાં છેક સુધી મુખ્યમંત્રી કોણ બનશે નામનું પેપર ફૂટતું નથી અને મહત્વપૂર્ણ સરકારી પરીક્ષાઓના પેપર ફૂટી જાય છે! આ હાસ્ય સાથે હકીકત પણ જોડાયેલી છે. ગુજરાતમાં નરેન્દ્ર મોદીની સરકાર બાદ 2014થી લઈ 2021 સુધીમાં આનંદી પટેલ, વિજય રૂપાણી અને ભૂપેન્દ્ર પટેલની ભાજપ સરકારમાં છેલ્લા 7માં 10 જેટલી મહત્વપૂર્ણ સરકારી પરીક્ષાના પેપર ફૂટ્યા છે. જી હા, 10 મહત્વપૂર્ણ સરકારી પરીક્ષાઓ પેપર ફૂટી જતા રદ્દ થઈ છે, અન્ય નાની-મોટી સરકારી-શિક્ષણ વિભાગની પરીક્ષાઓ બીજા કેટલાંક કારણોસર રદ્દ થઈ હોય એ તો અલગ.

2014માં GPSCની ચીફ ઓફિસરની ભરતી, 2015માં રેવન્યુ તલાટીની ભરતી પરીક્ષા, 2018માં મુખ્ય સેવિકા : 2018માં નાયબ ચિટનીસ, 2018માં પોલીસ લોકરક્ષક દળ LRD, 2018માં શિક્ષકોની ભરતી પૂર્વેની કસોટી TAT, 2019માં બિનસચિવાલય ક્લાર્ક, 2021માં DGVCLમાં વિદ્યુત સહાયકની ભરતી, 2021માં સબ-ઓડિટર, 2021માં હેડ ક્લાર્ક વગેરે જેવી 10 મહત્વપૂર્ણ સરકારી પરીક્ષાઓ પેપર ફૂટી જતા રદ્દ થઈ છે જે પાછળનું મુખ્ય કારણ છે, સરકારી પરીક્ષાઓ લેવાની સમૂળગી સિસ્ટમ જ લૂલી છે, ઉણપ ભરેલી છે, તેમાં અસંખ્ય ખામી છે અને એટલે જ ગુજરાતમાં કોઈપણ સરકારી-શિક્ષણ વિભાગની પરીક્ષાઓના પેપર વર્ગખંડમાં વિદ્યાર્થીઓના હાથમાં આવતા પહેલા વોટ્સએપમાં આવી જાય છે!

સરકારના જુદા-જુદા વિભાગોમાં તેમજ વિવિધ ખાતાની કચેરીઓમાં આવેલ જુદી-જુદી વર્ગ-3ની બિનસચિવાલયી સેવાની તાંત્રિક/બિનતાંત્રિક જગ્યાઓ (બિન રાજ્યપત્રિત) ઉપર ગૌણ સેવા પસંદગી મંડળ દ્વારા પસંદગી કરાયેલા ઉમેદવારોની નિમણૂક કરવામાં આવે છે. આ ઉમેદવારો નિમણૂક કરવા ગૌણ સેવા પસંદગી મંડળ પરીક્ષાઓ લે છે, આ સરકારી પરીક્ષાઓના પેપર લીક થવા ગૌણ સેવા પસંદગી મંડળ માટે જાણે ‘ગૌણ’ ઘટના બની ગઈ છે. હાલમાં જ ગૌણ સેવા મંડળની પરીક્ષા 12 ડિસેમ્બરે યોજવામાં આવી હતી અને પોલીસ તપાસ પહેલાં જ બહાર આવી ગયું હતું કે પેપર ફૂટી ગયું છે. આમ તો આ પેપર 10મી તારીખે જ ફૂટી ગયું હતું અને આની જાણ ગૌણ સેવા મંડળના ઉચ્ચ અધિકારીઓને થઈ ચૂકી હતી એવું કહેવાય રહ્યું છે.

આકસ્મિક સંજોગો એટલે કે ઈમરજન્સીમાં કોઈ રેર કેસમાં પેપર ફૂટ્યા બાદ વૈકલ્પિક પ્રશ્ર્નપત્ર તૈયાર રાખવામાં આવતા હોય છે અને જે પેપર ફૂટી ગયું છે તેને ઈમરજન્સીમાં બદલીને વૈકલ્પિક પ્રશ્ર્નપત્ર ઈશ્યુ કરવામાં આવે છે. પેપર ફૂટવાની ઘટનામાં ગૌણ સેવા મંડળની બેદરકારી છતી થાય છે અને આરોપોનો સિલસિલો આજે પણ યથાવત છે. જો ગૌણ સેવા મંડળે અગમચેતી રાખી હોત તો પહેલાં તો પેપર ફૂટ્યું જ ન હોત અને પેપર ફૂટી ગયું તો વૈકલ્પિક પ્રશ્ર્નપત્રની આગોતરી તૈયારી નહીં કરી અને એના માટે હજારો વિદ્યાર્થીઓને ફરીથી પરીક્ષા આપવી પડશે અને નવેસરથી તૈયારીઓ કરવાનો વારો આવશે.

ફક્ત ગૌણ સેવા પસંદગી મંડળ દ્વારા લેવામાં આવતી પરીક્ષાઓ જ નહીં પરંતુ ગુજરાતની વિવિધ યુનિવર્સિટીના જુદા-જુદા વિભાગોથી લઈ સરકારી-ખાનગી શાળા-કોલેજમાં પણ પેપરો ફૂટવાની ઘટના બિલાડીના ટોપની જેમ ફૂંટી નીકળી છે. સરકારના ખાતા, વિભાગ, બોર્ડની તમામ નાની-મોટી પરીક્ષાઓના આયોજનથી લઈ અંત સુધીની સંપૂર્ણ પ્રક્રિયા પર કોઈ પકડ કે નિયંત્રણ જ નથી. છેલ્લા કેટલાંક વર્ષોમાં સરકારી પરીક્ષાઓ યોજવામાં, સરકારી પરીક્ષાઓની વ્યવસ્થા કરવામાં ગુજરાતની ભાજપ સરકાર નાપાસ થઈ રહી છે અને વિવિધ સરકારી પરીક્ષા આપનારા લાખો વિદ્યાર્થીઓ નાસીપાસ થઈ રહ્યા છે.

વિપક્ષ નહીં વિદ્યાર્થીઓ પૂછી રહ્યા છે : ‘અસિત’ વોરા છે કે ભાજપ ‘આશ્રિત’ વોરા?

અસિત વોરાનાં કાર્યકાળમાં એક પછી એક ધડાધડ પેપર ફૂટ્યા!

વિદ્યાર્થીઓ માંગ કરી રહ્યા છે કે ગૌણસેવા પસંદગી મંડળ, પોલીસ ભરતી બોર્ડ સહિતની જે ભરતી માટેની વિવિધ સમિતિઓ રચવામાં આવી છે તે તમામ સમિતિઓનું વિસર્જન કરી નાખવું અને તમામ ભરતી પરીક્ષાનો સમાવેશ જીપીએસસીમાં કરી દેવો જોઈએ. સરકાર જો પરીક્ષા સુરક્ષિત રીતે ન લઈ શકે તો બોર્ડ દરખાસ્ત કરી દેવું જોઈએ. હાલમાં ગૌણ સેવા પસંદગી મંડળનું જે પેપર લીક થયું ત્યારે ગુજરાત ગૌણ સેવા પસંદગી મંડળના ચેરમેન અસિત વોરા હારમોનિયમ વગાડતા હતા. એક બાજુ લાખો વિદ્યાર્થીઓના ભવિષ્ય સાથે ચેડા થઈ રહ્યા હતા, તે જ દિવસે ગૌણ સેવા પસંદગી મંડળના ચેરમેન અસિત વોરા સંગીતની મહેફિલમાં ગીત ગાતા હતા કે ’આંસુ ભરી હૈ યે જીવન કે રાહેં, કોઇ ઉનસે કહે દે હમે ભૂલ જાયેં આંસુ, વાદે ભૂલા દે કસમ તોડ દે વો, હાલત પે અપની હમે છોડ દે’. આટઆટલું થવા છતાં પણ કોણ જાણે કેમ ભાજપ સરકાર અસિત વોરા પર મહેરબાન છે. અસિત વોરાના 3 વર્ષના કાર્યકાળમાં 2 પેપર ફૂટ્યા હોવા છતાં પણ તેની પર કોઈ આકરી કાર્યવાહી કરવામાં ન આવતા વિદ્યાર્થીઓ હવે અસિત વોરાના પૂતળા દહન કરી પોતાનો વિરોધ દર્શાવી રહ્યા છે.

ધોરણ 10-12થી લઈ કોલેજ-યુનિવર્સિટીની વિવિધ પરીક્ષાના પેપર લીક થવા સામાન્ય!
ગુજરાત શિક્ષણ બોર્ડની શાળાઓથી લઈ ગુજરાતની યુનિવર્સિટી સંલગ્ન કોલેજો અને વિભાગોમાં વિવિધ પરીક્ષાના પેપર લીક થવા સામાન્ય બાબત બની ગઈ છે. ભાગ્યે જ કોઈ એવી પરીક્ષા લેવાતી હશે જેના પેપર સોશિયલ મીડિયામાં ફરતા થયા ન હોય! ગુજરાતમાં કેજીથી પીજી સુધીની પરીક્ષાની થોડી કલાકો અગાઉ જ વિવિધ વિષયના પેપર વોટ્સઅપમાં ફરતા થઈ જવા સામાન્ય બાબત બની ગઈ છે. ખાનગી કે સરકારી શાળા, કોલેજ, યુનિ.માંથી કેટલાંક કિસ્સાઓમાં પેપર લીક થયાની ઘટના પ્રકાશમાં આવતા અંતે શિક્ષણ વિભાગને જે-તે વિષયના લીક થયેલા પેપરની પરીક્ષા રદ્દ કરવી પડતી હોય છે. ગુજરાતમાં છેલ્લા કેટલાંક વર્ષોથી છાશવારે એકમ કસોટીઓ, ધોરણ 10-12 બોર્ડથી લઈ કોલેજ-યુનિ.ની વિવિધ પરીક્ષાના પેપર લીક થયા છે અને આ પેપર લીક કરનાર પર કોઈ જ કડક કાર્યવાહી કરવામાં આવી નથી.

ગુજરાત સરકારની નિષ્ફળતાથી બેરોજગારો નારાજ, વિદ્યાર્થીઓ નાખુશ, માતા-પિતા નિરાશ
ગુજરાતમાં સરકારી પરીક્ષાઓના પેપર એક પછી એક ફૂટી જતા વર્ષોથી વિવિધ સ્પર્ધાત્મક સરકારી પરીક્ષાની તૈયારી કરી રહેલા બેરોજગારો સરકારથી નારાજ છે, આ પરીક્ષા આપનારા વિદ્યાર્થીઓ તો સરકારથી નાખુશ છે જ સાથોસાથ તેમના માતા-પિતા પણ સરકારની સરકારી પરીક્ષાના આયોજનમાં રહેલી નિષ્ફળતાથી નારાજ છે. ગુજરાત સરકાર સમક્ષની આ નારાજગી, નાખુશી, નિરાશા પણ અપેક્ષિત છે, આખરે ક્યાં સુધી ગુજરાત સરકાર વિવિધ પરીક્ષાઓના આયોજનમાં ઉણી ઉતરતી રહેશે, ક્યાં સુધી પરીક્ષાઓ અગાઉ જ પેપર ફૂટતા રહેશે અને તનતોડ મહેનત કરી પરીક્ષાઓ આપતા વિદ્યાર્થીઓના સરકારી નોકરી મેળવવાના સપના રોળવાતા રહેશે? એવા અનેક પ્રશ્ર્નો સૌ કોઈના મન-મુખથી ઉપજી રહ્યા છે.

માત્ર પેપર ફૂટે નહીં, સાથે સપના પણ તૂટે..

પરીક્ષા કે પરિણામના ડરથી નહીં, પેપર લીક થતા ડિપ્રેશન આવે છે અને પછી થઈ જાય છે આત્મહત્યા..
ગામડાઓમાં કે નાના નગરોમાં રહેતો વિદ્યાર્થી પોતાનું ઘર, પરિવાર, ઉચ્ચ ભણતર, નોકરી છોડી વિવિધ સરકારી પરીક્ષાની તૈયારી મોટા-મોટા શહેરોમાં આવે છે. તહેવારથી લઈ પારિવારિક પ્રસંગ છોડીને પરીક્ષાની તૈયારી કરે છે. પરંતુ જ્યારે પેપર ફૂંટવા જેવી ઘટનાઓ ઘટે છે ત્યારે માત્ર પેપર નથી ફૂટતા પરંતુ લાખો વિદ્યાર્થીઓના સપના પણ ટૂટે છે. ગુજરાતમાં સરકારી નોકરીનું સપનું જોનારા લાખો બેરોજગાર યુવાઓ ભરતીની જાહેરાત થતા જ મહિનાઓ સુધી રોજ કલાકો મહેનત કરી તૈયારી કરતા હોય છે. પરંતુ ક્યારેક પરીક્ષા રદ થવાના કારણે તો ક્યારેક પેપર લીક થવાની ઘટનાથી આ યુવાઓની મહેનત પર પાણી ફરી વળતું હોય છે. રદ્દ થયેલી પરીક્ષાઓ ફરી યોજાતી હોય છે ત્યારે જે-તે ઉમેદવારની ઉંમર વધી જતા તે ફરી વખત પરીક્ષા આપી શકતા નથી અને તેમની મહિનાઓ, વર્ષોની મહેનત પર નકામી નીવડે છે. એક સમય હતો જ્યારે વિદ્યાર્થીઓ પરીક્ષા જે પરિણામના ડરથી ડિપ્રેશનમાં આવતા અને આત્મહત્યા કરી લેતા હતા પરંતુ હવે એવો સમય આવ્યો છે જ્યારે પરીક્ષાઓ રદ્દ થતા કે થવાના ડરથી વિદ્યાર્થીઓ ડિપ્રેશનમાં આવે છે અને આ ડિપ્રેશન તેમને આત્મહત્યાનું પગલું ભરવા સુધી પ્રેરે છે.

7 સરકારી પરીક્ષા મામલે સાત શરમજનક ખામીઓ

• કોઈપણ પરીક્ષાના પેપર ગમે ત્યારે ફૂટી જવું
• ઓનલાઈન પરીક્ષાનું આયોજન ન કરી શકવું
• પરીક્ષા લેવાયા બાદ તુરંત પરિણામ જાહેર ન કરી શકવું
• પરીક્ષા દરમિયાન થતી ગેરરીતિ પર નિયંત્રણ ન રાખી શકવું
• વિદ્યાર્થીઓને થતી મુશ્કેલીઓનું નિરાકરણ ન લાવી લાવી શકવું
• પેપર લીક કરનારા આરોપીઓને કડકમાં કડક સજા ન કરી શકવી
• પરીક્ષા રદ્દ થતા અન્યાય થયેલા વિદ્યાર્થીઓને ન્યાય ન આપી શકવો