મુસ્લિમ રાષ્ટ્રીય મંચ વક્ફ સુધારા કાયદા અંગે 500 સેમિનાર અને 100 પ્રેસ કોન્ફરન્સનું આયોજન કરશે

મુસ્લિમ રાષ્ટ્રીય મંચે વક્ફ સુધારા કાયદા અંગે દેશભરમાં ફેલાયેલી ગેરસમજો અને અફવાઓને દૂર કરવા માટે આ આયોજન કર્યું 

મુસ્લિમ રાષ્ટ્રીય મંચે રાજઘાટ ખાતે ઈદ મિલન કાર્યક્રમ દરમિયાન આ જાહેરાત કરી

મુસ્લિમ રાષ્ટ્રીય મંચે વક્ફ સુધારા કાયદા અંગે દેશભરમાં ફેલાયેલી ગેરસમજો અને અફવાઓને દૂર કરવા માટે 100 થી વધુ પ્રેસ કોન્ફરન્સ અને 500 સેમિનારનું આયોજન કરવાની જાહેરાત કરી. વક્ફ સુધારા કાયદાને લઈ એક મોટી અપડેટ સામે આવી છે. વાસ્તવમાં રાષ્ટ્રીય સ્વયંસેવક સંઘ (RSS) સાથે જોડાયેલા મુસ્લિમ રાષ્ટ્રીય મંચે વક્ફ સુધારા કાયદા અંગે દેશભરમાં ફેલાયેલી ગેરસમજો અને અફવાઓને દૂર કરવા માટે 100 થી વધુ પ્રેસ કોન્ફરન્સ અને 500 સેમિનારનું આયોજન કરવાની જાહેરાત કરી છે. મુસ્લિમ રાષ્ટ્રીય મંચે રાજઘાટ ખાતે ઈદ મિલન કાર્યક્રમ દરમિયાન આ જાહેરાત કરી હતી.

સોમવારે મુસ્લિમ રાષ્ટ્રીય મંચ દ્વારા સત્યાગ્રહ મંડપ, ગાંધી સ્મૃતિ, રાજઘાટ ખાતે ઈદ મિલન કાર્યક્રમનું આયોજન કરવામાં આવ્યું હતું. આ પ્રસંગે ઉપસ્થિત નેતાઓ, બૌદ્ધિકો, સામાજિક કાર્યકરો અને ધાર્મિક હસ્તીઓએ વકફ સુધારા કાયદાને મુસ્લિમ સમુદાય માટે એક ઐતિહાસિક અને પરિવર્તનશીલ પગલું ગણાવ્યું. આ પ્રસંગે વકફ સુધારા પર સંયુક્ત સંસદીય સમિતિના અધ્યક્ષ જગદંબિકા પાલ, મુસ્લિમ રાષ્ટ્રીય મંચના સંરક્ષક ઇન્દ્રેશ કુમાર અને RSS સંપર્ક પ્રમુખ રામલાલે આ કાયદાની જરૂરિયાત અને તેની વ્યાપક સામાજિક અસર પર વાત કરી.

અફવાઓ દૂર કરવા માટે સેમિનાર યોજાશે

મુસ્લિમ રાષ્ટ્રીય મંચના આશ્રયદાતા ઇન્દ્રેશ કુમારે પોતાના સંબોધનમાં વકફ સુધારા કાયદા અંગે ફેલાયેલી ગેરસમજો અને અફવાઓને દૂર કરવાની પ્રતિબદ્ધતા વ્યક્ત કરી. આ સાથે તેમણે જાહેરાત કરી કે ફોરમ આ કાયદાના ઉદ્દેશ્યો અને ફાયદાઓને દરેક વ્યક્તિ સુધી પહોંચાડવા માટે દેશભરમાં 100 થી વધુ પ્રેસ કોન્ફરન્સ અને 500 થી વધુ સેમિનારનું આયોજન કરશે. કુમારે કહ્યું કે.’આ કાયદો મુસ્લિમ સમુદાયના આત્મસન્માન, ન્યાય અને સમાનતાના અધિકારને વધુ મજબૂત બનાવશે.

કાયદો કોઈની વિરુદ્ધ નથી

વકફ મિલકતોના દુરુપયોગ અને ગેરવહીવટના લાંબા સમયથી ચાલતા મુદ્દાઓ પર પ્રકાશ પાડતા તેમણે કહ્યું કે, આ સુધારો તેમના પારદર્શક અને સમાન ઉપયોગને સુનિશ્ચિત કરશે, જેનાથી સમાજના તમામ વર્ગોને ફાયદો થશે. કુમારે ભારપૂર્વક જણાવ્યું હતું કે, આ કાયદો કોઈની વિરુદ્ધ નથી પરંતુ બધાના હિતમાં છે. જે ભારતીય સમાજમાં પરસ્પર વિશ્વાસ અને સહયોગને પ્રોત્સાહન આપે છે.

મુસ્લિમ સમુદાય માટે આ એક ક્રાંતિકારી પગલું છે: જગદંબિકા પાલ

સભાને સંબોધતા JPCના અધ્યક્ષ જગદંબિકા પાલે કહ્યું, એવું લાગે છે કે આખો દેશ વકફ સુધારા કાયદા પર મંજૂરીની મહોર મારવા માટે અહીં એકત્ર થયો છે. વકફ સુધારાને મુસ્લિમ સમુદાય માટે એક ક્રાંતિકારી પગલું ગણાવતા તેમણે કહ્યું કે, આ કાયદો સમાજમાં લાંબા સમયથી ચાલી આવતી ગેરસમજ, ભ્રષ્ટાચાર અને અન્યાયનો અંત લાવવાની સુવર્ણ તક રજૂ કરે છે. પાલે ભારપૂર્વક જણાવ્યું હતું કે, આ સુધારો માત્ર વકફ મિલકતોના પારદર્શક અને જવાબદાર સંચાલનને સુનિશ્ચિત કરશે નહીં પરંતુ સમાજના સૌથી સંવેદનશીલ અને વંચિત વર્ગના અધિકારોને સુરક્ષિત કરવામાં પણ મદદ કરશે.

પરિવર્તન સમાજને નવી શક્તિ આપશે

RSS નેતા રામલાલે વકફ સુધારાને મુસ્લિમ સમુદાયમાં વિશ્વાસ અને સુમેળ વધારવા તરફ એક મહત્વપૂર્ણ પગલું ગણાવ્યું. રામલાલે કહ્યું કે, આ પરિવર્તન ભારતીય સમાજને નવી તાકાત આપશે અને ‘સબકા સાથ, સબકા વિકાસ, સબકા વિશ્વાસ’ ના મંત્રને અમલમાં મૂકવામાં મહત્વપૂર્ણ ભૂમિકા ભજવશે. તેમણે કહ્યું કે, આ કાયદો સમાજમાં પારદર્શિતા અને જવાબદારીને પ્રોત્સાહન આપશે, જેનો લાભ ફક્ત મુસ્લિમ સમુદાયને જ નહીં પરંતુ સમગ્ર દેશને મળશે. રામલાલે ઉપસ્થિત લોકોને અપીલ કરી કે તેઓ પોતપોતાના વિસ્તારોમાં આ કાયદાના સકારાત્મક પાસાઓ વિશે જાગૃતિ ફેલાવે, જેથી સમાજનો દરેક વર્ગ તેનું મહત્વ સમજી શકે.