12 દિવસ પછી ફરી હડતાળ પાડી, કહ્યું- સુરક્ષા અંગે મમતા સરકારનું વલણ પોઝિટિવ નથી
ખાસ-ખબર ન્યૂઝ રાજકોટ
- Advertisement -
કોલકાતાની આરજી કર કોલેજ અને હોસ્પિટલમાં ટ્રેઈની ડોક્ટરનો રેપ- હત્યાના કેસ મામલે જુનિયર ડોક્ટરો બુધવારે ફરી રેલી યોજશે. કોલકાતાના કોલેજ સ્ક્વેરથી ધર્મતલા સુધી આ રેલી યોજાશે.
જુનિયર ડોક્ટરોએ 1 ઓક્ટોબરથી ફરી હડતાળ શરૂ કરી છે. રાજ્ય સરકાર પર દબાણ લાવવા માટે કામકાજ સદંતર બંધ કરી દેવામાં આવ્યું છે. ડોક્ટરોની માંગ છે કે તેમને સંપૂર્ણ સુરક્ષા આપવામાં આવે.
આ પહેલા જુનિયર ડોક્ટરોએ 10 ઓગસ્ટથી 42 દિવસ સુધી વિરોધ ચાલુ રાખ્યો હતો. 21 સપ્ટેમ્બરે સરકારી હોસ્પિટલોમાં કામ પર પરત ફર્યા હતા.
સોમવારે સુપ્રીમ કોર્ટે હોસ્પિટલોની સુરક્ષામાં બેદરકારી બદલ મમતા સરકારની ઝાટકણી કાઢી હતી અને આદેશ આપ્યો હતો કે 15 દિવસમાં તમામ હોસ્પિટલોમાં સીસીટીવી લગાવવામાં આવે.
9 ઓગસ્ટના રોજ, આરજી કાર મેડિકલ કોલેજ હોસ્પિટલમાં જુનિયર ડોક્ટર પર રેપ અને હત્યાના વિરોધમાં હડતાળ પાડી હતી.
હડતાળની જાહેરાત કરતા, વિરોધ કરી રહેલા જુનિયર ડોકટરોમાંના એક અનિકેત મહતોએ કહ્યું- અમારી સુરક્ષા માંગણીઓ પૂરી કરવા અંગે મમતા સરકારનું વલણ સકારાત્મક જણાતું નથી. આજે 52મો દિવસ છે. અમે હજુ પણ હુમલા હેઠળ છીએ. સીએમ મમતાના વચનો પૂરા કરવા માટે કોઈ પ્રયાસ કરવામાં આવી રહ્યો હોય તેવું લાગતું નથી. અમારી પાસે આજથી કામ સંપૂર્ણપણે બંધ કરવા સિવાય કોઈ વિકલ્પ બચ્યો નથી. જ્યાં સુધી રાજ્ય સરકાર તરફથી કાર્યવાહી નહીં થાય ત્યાં સુધી કામ બંધ રહેશે.
કોલકાતામાં તબીબો અને મમતાની મુલાકાતને લઈને 7 દિવસ સુધી સંઘર્ષ થયો. ચાર પ્રયાસો નિષ્ફળ ગયા બાદ 16 સપ્ટેમ્બરના રોજ સીએમ હાઉસ ખાતે મમતા અને ડોક્ટરોના પ્રતિનિધિમંડળની બેઠક યોજાઈ હતી. આ બેઠકમાં મમતાએ ડોક્ટરોની 5માંથી 3 માંગણીઓ સ્વીકારી હતી અને તેમને કામ પર પાછા ફરવા કહ્યું હતું.
ડોક્ટરોની માગ પર બંગાળ સરકારે કોલકાતા પોલીસ કમિશનર વિનીત ગોયલને પદ પરથી હટાવી દીધા હતા. તેમના સ્થાને મનોજ વર્માએ કાર્યભાર સંભાળ્યો હતો. આરોગ્ય વિભાગના વધુ ચાર અધિકારીઓની પણ બદલી કરવામાં આવી છે. આ ઉપરાંત વધુ 5 પોલીસ અધિકારીઓની જગ્યાઓ પણ બદલવામાં આવી હતી.
19 સપ્ટેમ્બરના રોજ ડોક્ટરોએ હડતાળ સમાપ્ત કરવાનો નિર્ણય લીધો હતો. જુનિયર ડોક્ટરોએ કહ્યું કે અમારી માંગ પર કોલકાતા પોલીસ કમિશનર, મેડિકલ એજ્યુકેશન ડાયરેક્ટર અને હેલ્થ સર્વિસના ડિરેક્ટરને હટાવવામાં આવ્યા છે. જો કે, આનો અર્થ એ નથી કે આંદોલન સમાપ્ત થઈ ગયું છે. આરોગ્ય સચિવ એન.એસ.નિગમને હટાવવાની અને હોસ્પિટલોમાં ધમકીની સંસ્કૃતિનો અંત લાવવાની અમારી માંગ હજુ પણ ચાલુ છે.
ફરી હડતાળ કેમ શરૂ થઈ?
ખરેખરમાં, 27 સપ્ટેમ્બરના રોજ એક દર્દીના મૃત્યુ પછી, કોલકાતાની સાગર દત્તા હોસ્પિટલમાં 3 ડોક્ટર અને 3 નર્સની મારપીટનો મામલો સામે આવ્યો હતો. આ ઘટનાથી જુનિયર ડોક્ટરો નારાજ છે. હોસ્પિટલમાં ડોક્ટરોએ પણ દેખાવો કર્યા હતા. આ મામલે વિરોધ કરી રહેલા ચાર ડોક્ટરોની અટકાયત કરવામાં આવી છે. ડોકટરોની માગ છે કે તેમને હોસ્પિટલોમાં સુરક્ષા આપવામાં આવે, જેથી તેઓ ડર્યા વગર ફરજ કામકાજ કરી શકે.
- Advertisement -
સુપ્રીમ કોર્ટમાં કહેવામાં આવ્યું હતું કે તમામ ઇમરજન્સી અને આવશ્યક સેવાઓ ચાલુ રહેશે
સુપ્રીમ કોર્ટમાં 30 સપ્ટેમ્બરે થયેલી સુનાવણીમાં બંગાળ સરકારે કહ્યું હતું કે ઇનપેશન્ટ ડિપાર્ટમેન્ટ અને આઉટપેશન્ટ ડિપાર્ટમેન્ટમાં રેસિડેન્ટ ડોક્ટર્સ કામ કરી રહ્યા નથી. આના જવાબમાં ડોકટરોના વકીલે કહ્યું કે ડોકટરો તમામ ઇમરજન્સી અને આવશ્ર્યક સેવાઓમાં કામ કરી રહ્યા છે. કેસની આગામી સુનાવણી 14 ઓક્ટોબરે થશે. આ દિવસે સોલિસિટર જનરલ તુષાર મહેતાએ નેશનલ ટાસ્ક ફોર્સની તપાસનો રિપોર્ટ રજૂ કરવાનો રહેશે.
