વ્યાજદૈત્ય ખોડુ મુંધવાનો ભયાનક આતંક: સ્વિમિંગ પુલ લખાવ્યા બાદ ફ્લેટ પણ પચાવી પાડ્યો
ખાસ-ખબર સંવાદદાતા
રાજકોટના વ્યાજના ધંધાર્થી ખોડુ મુંધવાના ત્રાસમાંથી હજારો લોકોને છોડાવવા માટે જીતેન્દ્ર મારૂ નામના ધંધાર્થીએ પોલીસ કમિશનરને લેખિતમાં રજૂઆત કરી છે. જીતેન્દ્ર મારૂએ કરેલી અરજી મુજબ ખોડુ મુંધવા વિરુદ્ધ કુલ સાત જેટલી અરજીઓ કરવામાં આવી છે. જેમાં ઢોર માર મારવો, મારી નાખવાની ધમકી, મિલકતો પચાવી પાડવી સહિતની ફરિયાદો સામેલ છે. ખોડુ મુંધવા વિરૂદ્ધ પાસા, લેન્ડ ગ્રેબિંગ, મની લેન્ડિંગ સહિતના અનેક ગુનાઓ દાખલ છે પરંતુ પૈસા અને પાવરના જોરે હજુ એ ખુલ્લેઆમ ફરે છે. જાણે તેણે પોલીસ અને નેતાઓને ખરીદી લીધા હોય તેમ તેની સામે કોઈ પગલાં લેવાનું વિચારતુ પણ નથી.
- Advertisement -
ખોડુ મુંધવા વિરૂદ્ધ પાસા, લેન્ડ ગ્રેબિંગ, મની લેન્ડિંગ સહિતના અનેક ગુનાઓ દાખલ પરંતુ પૈસા અને પાવરના જોરે હજુ ખુલ્લેઆમ ફરે છે: જીતેન્દ્ર મારૂ
ખોડુ મુંધવાના ત્રાસથી કેટલાક લોકોએ શહેર છોડ્યું
જીતેન્દ્ર મારૂએ વધુમાં જણાવ્યું કે, ખોડુ મુંધવા કમ્મરતોડ વ્યાજ ઉઘરાવે છે, ખોડુંના ત્રાસથી કંટાળી અનેક લોકો શહેર છોડવા માટે મજબૂર થયા છે. ધર્મેન્દ્ર રોડ, સોની બજાર, લાખાજીરાજ રોડની વાત કરીએ ખોડુ મુંધવાની ગુંડાગીરીનો ભોગ બનેલા 200થી વધુ લોકો મળી આવશે. પણ આ હિસ્ટ્રીશીટરના ડરના લીધે કોઈ ફરિયાદ કરવાની હિંમત નથી કરતા.
- Advertisement -
વ્યાજખોર ખોડુનાં આતંકથી અનેક લોકોએ આત્મહત્યા કરી અથવા તો શહેર છોડ્યું
પોલીસે સમન્સ, વોરન્ટ વગર મને ઘરેથી ઉપાડી લીધો અને ફરિયાદ પાછી ખેંચવા દબાણ કર્યું : જીતેન્દ્ર મારૂ
લેન્ડ ગ્રેબિંગ અરજી કર્યા બાદ મારા વિરૂદ્ધ ખોટી ઋઈંછ દાખલ કરાવી અને પોલીસે પણ તેનો સાથ આપ્યો
જીતેન્દ્ર મારૂએ જણાવ્યા મુજબ, જામનગર જિલ્લાના શીશાંગ ગામના સરવે નં-151માં આવેલા હોલી ડે સિટીમાં આવેલો સ્વિમિંગ પુલના ધરાર દસ્તાવેજો કરાવી ખોડુએ તેમને માર પણ માર્યો હતો. ખોડુ મુંધવાએ તેમનાં ઘરે જઇ, ડરાવી-ધમકાવી હોલીડે સિટી ખાતેનો તેમનો સ્વિમિંગ પુલ મફતમાં લખાવી લીધો હતો. મારૂએ જણાવ્યું હતું કે, “એ ઘટનાનાં સીસીટીવી વીડિયો ફુટેજ પણ મારી પાસે છે તેમજ મને માર માર્યો એના 3 સાક્ષીઓ પણ છે. રાજકોટ ક્રાઈમ બ્રાંચના એક પી.એસ.આઈ. દ્વારા મને મારા વિરુધ્ધ કોઈની પણ અરજી વિના મહિલા કોલેજ ખાતેની ઓફીસે બોલાવવામાં આવ્યો ત્યાં ક્રાઈમ બ્રાંચની ઓફીસમાં ખોડુ મુંધવાએ મને કહયું કે, તુ ફરિયાદ પાછી ખેંચી લે, નહીંતર હું તને મારી ને લાશના કટકા કરીને ગટરમાં ફેંકી દઈશ અને તારા પરીવારને પણ મારી નાખીશ, મેં પી.એસ.આઈ. ને આ વાત કહેતા એમણે કહ્યુ કે ખોડુ મુંધવા વિરુધ્ધ કરેલી ફરિયાદો પાછી લે નહીંતર તારા ઉપર 8-10 ખોટી ફરીયાદો કરાવીશ. મે ફરિયાદ પાછી લેવાની ના પાડતા થોડા દિવસો પછી મને મારીને કે હેરાન કરીને મારી પાસે ફરીયાદો પાછી લેવડાવવાના બદઈરાદે ખોડુ મુંધવા પાસેની ખોટી વિગતે અરજી કરાવી માત્ર અરજીના આધારે મને કોઈપણ પ્રકારની જાણ કર્યા વગર માત્ર પી.એસ.આઈ. થી પણ નીચેની કેડર રેન્કના પોલીસ કર્મચારીઓ પોતાના ખાનગી વાહનમાં કોઈપણ એફ.આઈ.આર., સમન્સ કે વોરન્ટ આધાર પુરાવાઓ વિના રાત્રે 12 વાગ્યે મને ઉપાડવા મારી ઘરે આવી, મારા આખા ઘરમાં સદર પોલીસ કર્મચારીઓએ સર્ચ કર્યું તેના પણ વિડીયો ફુટેજ મે રજૂ કરેલા છે!”
મારૂ જણાવે છે કે, “આટલેથી ન અટકતા સ્વિમિંગ પુલ પછી ખોડુ મુંધવાએ મારા ફલેટ ઉપર કબજો કર્યો. જેથી મે તેના પર લેન્ડ ગ્રેબિંગની ફરીયાદ કરી. આ ફરિયાદ પાછી ખેંચવાનું દબાણ કરવા મુંધવાએ મારા ઉપર કાલાવડ પોલીસ સ્ટેશનમાં ખોટી 2 એફ.આઈ.આર. કરાવી જે ખોટી હોવાના વીડિયો મારી પાસે ઉપલબ્ધ છે, ત્યાર બાદ રાજકોટ ક્રાઈમ બ્રાંચે પણ મારી ફરિયાદ પાછી ખેંચવા મને પ્રેશર આપવા મારા ઉપર ખોટી એફ.આઈ.આર. નોંધી છે.
ટૂંકમાં કહીએ તો ખોડુ નામનો આ વ્યાજ રાક્ષસ હવામાંથી સર્જાયો નથી. તેને પોલીસ તંત્રનાં કેટલાક ભ્રષ્ટ કર્મચારીઓ અને અધિકારીઓનું ખુલ્લેઆમ પીઠબળ છે.
ખોડું મુંધવાનું વર્તન રાક્ષસી અને જંગલી
સ્વિમીંગ પુલ પચાવ્યા બાદ મારો ફ્લેટ પણ લઈ લીધો. જેથી જીતેન્દ્ર મારૂએ લેન્ડ ગ્રેબિંગની ફરિયાદ કરી પરંતુ ખોડુ મુંધવાએ તેનાથી બચવા મારા પર કાલાવાડ પોલીસ સ્ટેશનમાં ખોટી એફઆઈઆર કરાવી. ખોડુ મુંધવા લાયસન્સ અને બિનલાયસન્સના હથિયાર પણ ધરાવે છે. તેનું વર્તન રાક્ષસી અને જંગલી છે. ખોડુ મુંધવા પાસે પૈસા અને પોલિટીકલ પાવર હોવાના લીધે તેના પર કોઈ એક્શન લેવામાં આવતા નથી.
નાગરિકોનો ડર દૂર કરવા ખોડુંનું સરઘસ કાઢી કડક સજા કરવા અરજી
અરજી પ્રમાણે ખોડું મુંધવા વિરૂદ્ધ કડકમાં કડક સજા કરવા વિનંતી કરાઈ છે. જો તેનું સરઘસ કાઢવામાં આવે તો નાગરિકોમાં રહેલો ડર જતો રહે. કાયદા અને પ્રશાસનને ઘોળીને પી જનાર આવા ગુનાહિત ઈતિહાસ ધરાવતા આરોપીને કડકમાં કડક સજા થાય તેવી અરજ કરાઈ છે
મોબાઈલની ડિટેઈલ્સ કઢાવવામાં આવે તો ઘણા અધિકારીની સાંઠગાંઠ બહાર આવે તેમ છે
લાખો રૂપિયા વ્યાજે આપ્યા બાદ તેનું તગડું વ્યાજ ઉઘરાવવું, જમીનો હડપ કરવી, ધામ ધમકી આપી મિલકત પચાવવી, રૂપિયાના જોરે પોલીસ અધિકારીઓ સાથે સાંઠગાંઠ કરીને પોતે હંમેશા આઝાદ રહે છે. જો તેની 6 મહિનાની કોલ ડિટેઈલ્સ કઢાવાય તો કોણ કોણ અધિકારીઓ અને નેતાઓ સામેલ છે તે સત્ય બહાર આવી શકે.
વાંચકોને ખાસ અપીલ
ખોડું મુંધવાના ત્રાસથી
પરેશાન નાગરિકો ખાસ-ખબર કાર્યાલયનો સંપર્ક કરે…76982 11111