યુરોપમાં ગરમીનો પ્રકોપ : 1300થી વધુ નાગરીકના મોત

યુરોપના અમુક શહેરોમાં રસ્તા ઓગળી ગયા : ટ્રેનો થંભી ગઇ

ખાસ ખબર ન્યૂઝ પેરિસ

યુરોપનાં મોટાભાગનાં દેશો હાલમાં જીવલેણ હીટવેવનો સામનો કરી રહ્યાં છે. વિશ્વ આરોગ્ય સંસ્થાના જણાવ્યાં અનુસાર, ૨૧ જૂનથી શરૂ થયેલી આ ભીષણ ગરમીનાં કારણે સમગ્ર યુરોપમાં અત્યાર સુધીમાં ૧,૩૦૦થી વધુ લોકોનાં આકસ્મિક મોત નોંધાયાં છે.
ગરમીનો આ પ્રકોપ હવે પૂર્વ તરફ વધી રહ્યો છે, જેનાં કારણે કરોડો લોકો અસહ્ય તાપમાનનો સામનો કરવા મજબૂર બન્યાં છે અને ઘણી જગ્યાએ આરોગ્ય સેવાઓ સંપૂર્ણપણે દબાણ હેઠળ આવી ગઈ છે. ફ્રાન્સમાં આ ગરમીની સ્થિતિ સૌથી વધુ ચિંતાજનક જોવા મળી રહી છે. ફ્રાન્સનાં આરોગ્ય અધિકારીઓનાં જણાવ્યાં અનુસાર, ૨૪ જૂન બુધવારથી અત્યાર સુધીમાં જ સામાન્ય કરતાં ૧,૦૦૦થી વધુ લોકોનાં મોત ગરમીનાં કારણે થયાં છે. ફ્રાન્સના પબ્લિક હેલ્થ વિભાગે જણાવ્યું છે કે આ ગરમીમાં જીવ ગુમાવનારા લોકોમાં ૮૫ ટકાથી વધુ લોકો ૬૫ વર્ષ કે તેથી વધુ ઉંમરનાં વડીલો છે, જેનાં કારણે દેશનાં ઇલે-ડી-ફ્રાન્સ અને બ્રિટેની સહિતનાં ઘણાં ભાગોમાં રેડ એલર્ટ જાહેર કરવામાં આવ્યું છે.
ભીષણ ગરમીને કારણે ફ્રાન્સમાં મેડિકલ ઈમરજન્સી કોલ્સમાં ૮૦ ટકાનો ધરખમ વધારો નોંધાયો છે. ગંભીર પરિસ્થિતિને જોતાં તમામ સાર્વજનિક કાર્યક્રમો રદ કરવામાં આવ્યાં છે અને લોકોને ઘરોમાં જ રહેવાની અપીલ કરવામાં આવી છે. પેરિસનું પ્રખ્યાત એફિલ ટાવર, લૂવર મ્યુઝિયમ અને પેરિસ પ્રાઇડ જેવા પ્રવાસી આકર્ષણો અને કાર્યક્રમોને પણ સમય પહેલાં જ બંધ કરી દેવાની ફરજ પડી છે. આ ભીષણ ગરમી માત્ર ફ્રાન્સ પૂરતી સીમિત નથી, પરંતુ જર્મની, બ્રિટન અને ઈટાલી સહિતનાં દેશો પણ ભઠ્ઠીની જેમ શેકાઈ રહ્યાં છે. જર્મનીમાં તાપમાન ૪૦ ડિગ્રી સેલ્સિયસને પાર કરી ગયું છે અને બર્લિનમાં લોકોને રાહત આપવા પોલીસે વોટર કેનનનો ઉપયોગ કરવો પડયો છે. ઈટાલીના મિલાન, રોમ, વેનિસ અને તુરીન સહિત ૧૮ શહેરોમાં રેડ એલર્ટ જારી કરવામાં આવ્યું છે, જ્યારે ચેક રિપબ્લિક, હંગેરી, સ્લોવાકિયા, ઓસ્ટ્રિયા, સર્બિયા અને યુક્રેન જેવા દેશો પણ આ પ્રચંડ ગરમીની ચપેટમાં આવી ગયા છે.
પોલેન્ડમાં ગરમીએ વર્ષ ૧૯૨૧ પછીનાં તમામ રેકોર્ડ તોડી નાખ્યાં છે અને અત્યાર સુધીનો સૌથી ગરમ દિવસ નોંધાયો છે. પોલેન્ડમાં મહત્તમ તાપમાન ૪૦.૩ ડિગ્રી સેલ્સિયસ સુધી પહોંચી ગયું હતું, જયારે રાત્રિનું તાપમાન પણ ૨૯.૪ ડિગ્રી સેલ્સિયસ જેટલું ઊંચું નોંધાયું હતું. અહીં લોકોને ભયંકર ગરમીથી બચાવવા માટે જાહેર સ્થળો પર પાણીની ટાકીઓ શકે છે. મુકવામાં આવી છે જેથી લોકો ઠંડક મેળવી શકે છે.
અતિશય તાપમાનને કારણે હાઈવે પરનાં રસ્તાઓ ફાટી ગયાં છે અને ડામર પીગળવા લાગ્યો છે, જેનાં કારણે બર્લિન નજીક હાઈવે બંધ કરવો પડયો હતો. રેલવે ટ્રેક પણ ગરમીનાં કારણે ફેલાઈ અને વળી ગયાં છે. જેના કારણે ફ્રાન્સ, જર્મની, બ્રિટન અને સ્વિટ્ઝર્લેન્ડમાં ટ્રેનો રદ કરવી પડી છે અથવા તેની ગતિ ધીમી કરવી પડી છે. ફ્રાન્સ અને બેલ્જિયમમાં સાર્વજનિક વાહનોનાં એસી પણ ફેલ થઈ ગયા છે. વિશ્વ આરોગ્ય સંસ્થાનાં વડા ટેડ્રોસ અધાનમ ઘેબ્રેયેસસે સોશિયલ મીડિયા પર ગંભીર ચેતવણી આપતાં જણાવ્યું છે કે, ‘હીટ સ્ટ્રેસ એ એક સાયલન્ટ કિલર છે. યુરોપનાં ઘરો, શાળાઓ અને ઓફિસો આવા ઊંચા તાપમાનને સહન કરવા માટે બનેલાં નથી.
ક્લાયમેટ ચેન્જ અને ગ્લોબલ વોર્મિંગના કારણે પહેલાં જે ગરમી પેઢીમાં એકાદ વાર આવતી હતી, તે હવે દર વર્ષે આવી રહી છે અને યુરોપ દુનિયાનો સૌથી ઝડપથી ગરમ થતો ખંડ છે જે વૈશ્વિક સરેરાશ કરતાં બમણી ઝડપે ગરમ થઈ રહ્યો છે.