ગુજરાતમાં સતત ત્રીજા દિવસે આકાશમાંથી આફત અનરાધાર: 21 લોકોના મોત

ખંભાતમાં છેલ્લા 6 કલાકમાં 4 ઈંચથી વધુ વરસાદ, અમદાવાદના વાસણા બેરેજના દરવાજા ખોલાતા આસપાસના ગામોને એલર્ટ કરાયા

ખાસ-ખબર ન્યૂઝ રાજકોટ

એકસાથે ત્રણ અપર એર સાયક્લોનિક સર્ક્યુલેશન સિસ્ટમ અને ટ્રફ લાઇનના કારણે રાજ્યમાં છેલ્લા 48 કલાકથી વાવાઝોડા સાથે વરસાદ થઇ રહ્યો છે. મંગળવાર રાત્રે 8 વાગ્યા સુધીમાં રાજ્યના 103 તાલુકામાં 1 મીમીથી લઇ પોણા 7 ઇંચ સુધીનો વરસાદ ખાબક્યો હતો. ભાવનગરના મહુવામાં સતત 6 કલાકમાં પોણા 7 ઇંચ વરસાદ ખાબક્યો હતો. જ્યારે અમરેલીના લાઠીમાં અઢી ઇંચ, સાવરકુડલામાં સવા 2 ઇંચ, લીલીયા અને અમેરલીમાં 2-2 ઇંચ વરસાદ પડ્યો હતો. ભારે પવન અને કડાકા-ભડાકા સાથેના વરસાદના કારણે બે દિવસમાં 21 લોકોના મોત થયા છે. મધ્ય અને પૂર્વ ગુજરાતમાં 17ના મોત થયા છે, જ્યારે 20થી વધારે લોકો ઇજાગ્રસ્ત થયા છે તો ઉત્તર ગુજરાતમાં 3 વ્યક્તિ અને 45 પશુનાં મોત થયા છે.

ભારતીય હવામાન વિભાગે ગુજરાતભરના અનેક જિલ્લાઓ માટે હાઈ-એલર્ટ નાઉકાસ્ટ ચેતવણી જારી કરી છે, જેમાં આગામી ત્રણ કલાક સુધી તોફાની પવન અને ભારે વરસાદ સાથે તીવ્ર વાવાઝોડાની આગાહી કરવામાં આવી છે. ભારતીય સમયાનુસાર બપોરે 1:00 વાગ્યે જાહેર કરવામાં આવેલા આ એલર્ટમાં અમરેલી, ભાવનગર, બોટાદ, અમદાવાદ, ગીર સોમનાથ, જૂનાગઢ, દીવ, આણંદ, ખેડા, ભરૂચ, વડોદરા, સુરત, દાદરા અને નગર હવેલી, દમણ, વલસાડ, નવસારી, ડાંગ અને તાપી સહિતના વિસ્તારોમાં 62થી 87 કિમી પ્રતિ કલાકની ઝડપે પવન ફૂંકાવાની અને 15 મીમી પ્રતિ કલાકથી વધુ વરસાદની ચેતવણી આપવામાં આવી છે.

હવામાન વિભાગે આ વિસ્તારોમાં વીજળી પડવાની ઊંચી સંભાવનાની નોંધ લીધી હતી અને રહેવાસીઓને જરૂરી સાવચેતી રાખવા વિનંતી કરી હતી. નર્મદા, છોટા ઉદેપુર, દાહોદ, પંચમહાલ, મહિસાગર, અરવલ્લી, સાબરકાંઠા, ગાંધીનગર, મહેસાણા, પાટણ, સુરેન્દ્રનગર, રાજકોટ, અને પોરબંદર જેવા જિલ્લાઓમાં 41-61 કિમી પ્રતિ કલાકની ઝડપે પવન સાથે મધ્યમ વાવાઝોડા અને મધ્યમ વરસાદની સંભાવના છે. કચ્છ, બનાસકાંઠા, મોરબી, જામનગર, અને દેવભૂમિ દ્વારકામાં હળવા વાવાઝોડાની આગાહી કરવામાં આવી છે, જ્યાં હળવો વરસાદ અને વીજળી પડવાની પ્રવૃત્તિમાં ઘટાડો થવાની સંભાવના છે. IMDએ પાણી ભરાવા, ટ્રાફિકજામ, વીજકાપ અને જૂની ઇમારતો અને જાહેરાતના હોર્ડિંગ્સ જેવા ઇન્ફ્રાસ્ટ્રક્ચરને નુકસાન સહિતના સંભવિત વિક્ષેપો અંગે ચેતવણી આપી છે. પૂર અને જમીનના ધોવાણને કારણે કૃષિ નુકસાન અને પશુધનને જોખમો માટે પણ ચેતવણી છે. રહેવાસીઓને ઘરની અંદર જ રહેવાની, વૃક્ષોની નીચે આશ્રય લેવાનું ટાળવાની અને IMDની વેબસાઇટ અને સ્થાનિક સત્તાવાળાઓ દ્વારા હવામાનની સત્તાવાર અપડેટ્સ પર નજર રાખવાની સલાહ આપવામાં આવે છે.