ફિલ્મ એનિમલનું પ્રી- ટીઝર રિલીઝ, રણબીર કપૂરનો જોવા મળ્યો શાનદાર અંદાજ

‘એનિમલ’ના ટ્રેલર રિલીઝ પહેલા તેનું પ્રી-ટીઝર રિલીઝ કરવામાં આવ્યું છે, જેણે દર્શકોની બેચેનીમાં વધુ વધારો કર્યો છે. આ ફિલ્મ 11 ઓગસ્ટ 2023ના રોજ વિશ્વભરમાં 5 ભાષાઓ હિન્દી, તેલુગુ, તમિલ, કન્નડ અને મલયાલમમાં રિલીઝ થશે.

અભિનેતા રણબીર કપૂર ‘તુ જૂઠી મેં મક્કર’ પછી સંદીપ રેડ્ડી વાંગાની આગામી ફિલ્મ ‘એનિમલ’માં જોવા મળશે. દર્શકો ઘણા સમયથી ફિલ્મની રિલીઝની રાહ જોઈ રહ્યા હતા. હવે ફિલ્મ મેકર્સે આ મોસ્ટ અવેટેડ ફિલ્મનું પ્રી ટીઝર રિલીઝ કરી દીધું છે. ફિલ્મના પ્રી-ટીઝરને જોઈને લાગે છે કે રણબીર ‘એનિમલ’માં ખૂબ જ એક્શન સાથે જોવા મળશે. સંદીપ રેડ્ડી વાંગા દ્વારા નિર્દેશિત, ભૂષણ કુમાર દ્વારા નિર્મિત ફિલ્મ ‘એનિમલ’ એક ઉત્તમ વાર્તા છે જેમાં રણબીર કપૂર સાથે અનિલ કપૂર, રશ્મિકા મંદન્ના, બોબી દેઓલ અને તૃપ્તિ ડિમરી જેવા સ્ટાર કલાકારો પણ જોવા મળશે.

પ્રી-ટીઝરમાં શું છે ખાસ?

‘એનિમલ’ના ટ્રેલર રિલીઝ પહેલા તેનું પ્રી-ટીઝર રિલીઝ કરવામાં આવ્યું છે, જેણે દર્શકોની અધીરાઈમાં વધારો કર્યો છે. પ્રી-ટીઝરની શરૂઆતમાં કેટલાક લોકોને બતાવવામાં આવ્યા છે જેમણે ખાસ ચહેરાના માસ્ક પહેર્યા છે અને તેમના હાથમાં કુહાડી છે. આ પછી, ફિલ્મના મુખ્ય રોલની એન્ટ્રી થાય છે જે કુહાડી ઉપાડે છે અને એક પછી એક બધાને કાપવા લાગે છે જાણે કે તેને શેતાન વશ થઈ ગયો હોય. પ્રી-ટીઝરના અંતમાં આ શેતાનનો અડધો ચહેરો બતાવવામાં આવ્યો છે, જે બીજું કોઈ નહીં પણ રણબીર કપૂર છે. આખા પ્રી-ટીઝરના બેકગ્રાઉન્ડમાં એક પંજાબી ગીત વાગી રહ્યું છે.

દર્શકો ફિલ્મને લઈને ખૂબ જ ઉત્સાહિત

‘એનિમલ’નું પ્રી-ટીઝર જોયા પછી દર્શકો ફિલ્મને લઈને ખૂબ જ ઉત્સાહિત થઈ ગયા છે અને હવે તેઓ રણબીર કપૂરની એક્શનથી ભરપૂર ફિલ્મ જોવા માટે આતુરતાથી રાહ જોઈ રહ્યા છે. ફિલ્મના પ્રી-ટીઝર પર કોમેન્ટ કરતાં એક ફેને લખ્યું- ‘હું આ ફિલ્મ માટે ખૂબ જ ઉત્સાહિત છું, અમે અત્યાર સુધી રણબીર કપૂરને માત્ર રોમેન્ટિક ફિલ્મોમાં જ જોયો છે પરંતુ આ વખતે રણબીર માસ ફિલ્મના તમામ રેકોર્ડ તોડી નાખશે..’ જ્યારે અન્ય એક વ્યક્તિએ લખ્યું છે, ‘જ્યારે સંદીપ વાંગા જેવા દિગ્દર્શક અને રણબીર કપૂર જેવા અભિનેતા સાથે કામ કરે છે, ત્યારે એક માસ્ટરપીસ બને છે…’