ખાસ-ખબર સંવાદદાતા
આમરણ ગામ નજીક જામનગરથી કચ્છ તરફ જઈ રહેલા ઓઈલ ટેન્કરનું ટાયર ફાટતા નાલાની રેલીંગ તોડીને નીચે પાણી ભરેલા ખાડામાં ટેન્કર ખાબક્યું હતું જે અકસ્માતમાં સ્થાનિકોની મદદથી ટેન્કરની કેબીનના કાચ તોડીને ટેન્કર ચાલકને સલામત રીતે બહાર કાઢવામાં આવ્યો હતો.
આ બનાવ અંગે મળતી માહિતી મુજબ આમરણ ગામના પાદરમાં જામનગર કચ્છ કોસ્ટલ હાઈવે પર નાળા પરથી ઓઈલ ટેન્કર પસાર થતું હતું ત્યારે આગળનું ટાયર ફાટ્યું હતું અને ટેન્કર નાળાની રેલીંગ તોડીને નીચે પાણી ભરેલા ખાડામાં ખાબક્યું હતું. આ બનાવની જાણ થતા આસપાસના લોકો દોડી ગયા હતા અને ટેન્કરમાં ડ્રાઈવર પણ ફસાયેલો હોય કેબીનના કાચ તોડીને લોકો દ્વારા ટેન્કર ચાલકને સલામત રીતે બહાર કાઢવામાં આવ્યો હતો જોકે આ અકસ્માતમાં ડ્રાઈવરને નજીવી ઈજા પહોંચી હોવાની માહિતી મળી છે.
