G-20 ની અધ્યક્ષતા એ માત્ર રાજદ્વારી બેઠક નથી પરંતુ ભારત માટે એક નવી જવાબદારી છે, અમારો છે એક પૃથ્વી, એક પરિવાર, એક ભવિષ્ય : વડાપ્રધાન નરેન્દ્ર મોદીએ G-20ની અધ્યક્ષતાનો લોગો અને થીમનું અનાવરણ કર્યું
વડાપ્રધાન નરેન્દ્રભાઈ મોદીએ આજે 8 નવેમ્બરે વીડિયો કોન્ફરન્સિંગ દ્વારા ભારતના જી-20 સમૂહની અધ્યક્ષતાના નવા લોગો, થીમ અને વેબસાઇટનું અનાવરણ કર્યું હતું. આ દરમિયાન લોગો અને થીમ સાથે સંબંધિત એક નાનો વીડિયો પણ પ્રસારિત કરવામાં આવ્યો હતો જેમાં ભારતની શક્તિ દર્શાવવામાં આવી હતી. જી-20 સમૂહનો નવો લોગો, થીમ અને વેબસાઈટનો ધ્યેય વિશ્વ પ્રત્યે ભારતના સંદેશ અને પ્રાથમિકતાઓને પ્રતિબિંબિત કરે છે. તેમના સંબોધન દરમિયાન, વડાપ્રધાન નરેન્દ્ર મોદીએ કહ્યું કે, 1 ડિસેમ્બર ભારત જી-20 સમિટની અધ્યક્ષતા કરશે અને કહ્યું કે તે દેશ માટે એક ઐતિહાસિક અવસર છે.
- Advertisement -
વડાપ્રધાને કહ્યું કે, આઝાદીના અમૃત મહોત્સવના વર્ષ દરમિયાન જી-20ની અધ્યક્ષતા કરવી એ દરેક ભારતીય માટે ગર્વની વાત છે. જી-20નો લોગો માત્ર એક પ્રતીક નથી. આ એક સંદેશ છે. તે એક લાગણી છે જે આપણી નસોમાં છે. આ એક સંકલ્પ છે, જે આપણા વિચારમાં સમાવિષ્ટ છે. વડાપ્રધાને જી-20 લોગોમાં દર્શાવવામાં આવેલા કમળના ફૂલ અને થીમ ‘વસુધૈવ કુટુંબકમ’ વિશે કહ્યું કે, આ લોગોમાં કમળનું ફૂલ ભારતની શ્રદ્ધા, પૌરાણિક વારસો અને બૌદ્ધિકતાને દર્શાવે છે. કમળ પરની સાત પાંખડીઓ વિશ્વના સાત ખંડો અને સંગીતના સાત સુરોનું પ્રતિનિધિત્વ કરે છે. ‘વસુધૈવ કુટુંબકમ’ના મંત્ર દ્વારા આપણે જે વિશ્વ ભાઈચારાનો વિચાર મુકી રહ્યા છીએ તે આ લોગો અને થીમમાં પ્રતિબિંબિત થાય છે, ધ્રુવીકૃત વિશ્વને એકસાથે લાવવાની આ અનોખી થીમ સાથે ભારત જી-20નું પ્રમુખપદ સંભાળશે. ભારતનું જી-20 પ્રમુખપદ સંકટ અને અરાજકતાના સમયમાં આવ્યું છે. વિશ્વ વૈશ્વિક રોગચાળા, સંઘર્ષો અને ઘણી આર્થિક અનિશ્ચિતતાની વિનાશક અસરોનો સામનો કરી રહ્યું છે. ત્યારે જી-20 લોગોમાં કમળ આવા મુશ્કેલ સમયમાં આશાનું પ્રતીક છે.
● જ્ઞાન અને સમૃદ્ધિ બંનેની દેવી કમળ પર બિરાજમાન છે
વડાપ્રધાને ભારતની સંસ્કૃતિ વિશે વાત કરતા જણાવ્યું કે, જ્ઞાન અને સમૃદ્ધિ બંનેની દેવી કમળ પર બિરાજમાન છે. વડાપ્રધાને જી-20 લોગોમાં કમળની ટોચ પર બિરાજમાન પૃથ્વી તરફ ધ્યાન દોર્યું અને કહ્યું કે G20નો ઉદ્દેશ્ય વિવિધતાનો આદર કરીને વિશ્વને સાથે લાવવાનો છે. નાગરિકોની જવાબદારી છે કે, વિશ્વને ભારતની ક્ષમતાઓ અને બૌદ્ધિક શક્તિ બતાવે. આપણે બધાને એક કરવા પડશે અને વિશ્વ પ્રત્યેની તેમની જવાબદારી માટે તેમને ઉત્સાહિત કરવા પડશે.
- Advertisement -
"Under the inspiring leadership of PM Narendra Modi, Bharatvarsh is well on course to becoming Vishwaguru. Like other States, Assam too is gearing up to be a part of the country's biggest diplomatic engagement during its historic presidency of G20," tweets Assam CM HB Sarma pic.twitter.com/xzyIxZQ95s
— ANI (@ANI) November 8, 2022
● 2400થી વધુ ડિઝાઇનમાંથી આ લોગો ફાઈનલ થયો
ભારત પ્રથમ વખત જી-20 દેશોની અધ્યક્ષતા કરવા જઈ રહ્યું છે, આપણી પાસે આ જવાબદારી 1 ડિસેમ્બરથી આવતા વર્ષના 30 નવેમ્બર સુધી રહેશે. વિદેશ મંત્રાલય (એમઇએ) એ અગાઉ જી-20 ના ભારતના પ્રમુખપદ માટે લોગો ડિઝાઇન માટે દરખાસ્તો આમંત્રિત કરી હતી. જે બાદ મંત્રાલયને 2400 થી વધુ ડિઝાઇન પ્રસ્તાવો મળ્યા હતા. આ પછી આ નવો લોગો ફાઈનલ કરવામાં આવ્યો. પ્રથમ વિજેતાને રૂ.1.50 લાખ અને પછીના પાંચ વિજેતાઓને 15-15 હજાર રૂપિયા આપવામાં આવ્યા હતા. લોગોની ડિઝાઇનમાં અમૃતકાળ, ત્રિરંગાના રંગ સંયોજનનું કલાત્મક પ્રદર્શન છે. નવા G-20 લોગોમાં ભારતનો રાષ્ટ્રધ્વજ કેસરી, સફેદ અને લીલો તેમજ વાદળી રંગમાં દર્શાવવામાં આવ્યો છે. G-20ના આ નવા લોગોમાં ભારતના રાષ્ટ્રીય ફૂલ કમળ પર પૃથ્વીનો આકાર બનાવવામાં આવ્યો છે, જેને વાદળી રંગમાં દર્શાવવામાં આવ્યો છે. જ્યારે કમળના ફૂલની સાત પાંખડીઓમાં કેસરી, સફેદ અને લીલા રંગનો ઉપયોગ કરવામાં આવ્યો છે. જી-20 નો લોગો સ્પષ્ટ રીતે ભારતીય દૃષ્ટિકોણનું પ્રતિનિધિત્વ કરે છે, જે પૃથ્વી માતા માટે આદર દર્શાવે છે. બીજી તરફ, ભારતનું રાષ્ટ્રીય ફૂલ, કમળ એ શુભ, શુદ્ધ, શાશ્વત અને તટસ્થતાનું પ્રતીક છે. જી-20 લોગોની નીચે ‘ભારત’ શબ્દ લખાયેલો છે, જે દેવનાગરી લિપિમાં લખાયેલો છે.
PM Modi to visit Indonesia, G20 summit to see formal announcement India's presidency
Read @ANI Story | https://t.co/OzZ60XUist#PMModi #Indonesia #G20Summit pic.twitter.com/4NeqsUL1w5
— ANI Digital (@ani_digital) November 8, 2022
● ભારત પ્રથમ વખત G-20ની અધ્યક્ષતા કરશે
ભારત 1 ડિસેમ્બર, 2022 થી 30 નવેમ્બર, 2023 સુધી પ્રથમ વખત જી20 ની અધ્યક્ષતા કરશે. આ દરમિયાન દેશભરમાં 200થી વધુ બેઠકો યોજાશે. આ દરમિયાન ભારત બાંગ્લાદેશ, ઇજિપ્ત, મોરેશિયસ, નેધરલેન્ડ, નાઇજીરિયા, ઓમાન, સિંગાપોર, સ્પેન અને યુએઈને જી20 પ્રમુખ તરીકે અતિથિ દેશો તરીકે આમંત્રિત કરશે. હાલમાં જી-20 દેશોમાં આર્જેન્ટિના, ઓસ્ટ્રેલિયા, બ્રાઝિલ, કેનેડા, ચીન, ફ્રાન્સ, જર્મની, ભારત, ઇન્ડોનેશિયા, ઇટાલી, જાપાન, રિપબ્લિક ઓફ કોરિયા, મેક્સિકો, રશિયા, સાઉદી અરેબિયા, દક્ષિણ આફ્રિકા, તુર્કી, યુનાઇટેડ કિંગડમ અને યુનાઇટેડ સ્ટેટ્સ સામેલ છે. આ સાથે યુરોપિયન યુનિયન પણ તેનું સભ્ય છે.
