અમરેલીની કોલેજ ઓફ ડેરી સાયન્સ દ્વારા એક ડિપસ્ટિક વિકસિત કરવામાં આવી છે, જેની મદદથી ઘરઆંગણે ટેસ્ટિંગ થશે
આજે ભેળસેળનો જમાનો છે અને દરેક ચીજ વસ્તુમાં મોટાપાયે ભેળસેળ થાય છે. મોટાભાગના લોકો આજે પણ દૂધના પાઉચ નહીં પણ ડેરી પરથી દૂધ મંગાવતા હોય છે. પરંતુ શું તમને ખાતરી છે કે ડેરી પરથી દૂધવાળો જે તમને દૂધ આપી જાય છે તેમાં ખરેખર મિલાવટ નથી? જો તમને આ પ્રકારની શંકા થતી રહેતી હોય તો તમારી સમસ્યાનું નિરાકરણ આવી ગયું છે. ટૂંક સમયમાં તમે દૂધની ગુણવત્તા તમારા ઘર આંગણે જ ચકાસી શકશો.
કામધેનુ યુનિવર્સિટી સાથે સંકળાયેલી અમરેલીની કોલેજ ઓફ ડેરી સાયન્સ દ્વારા એક ડિપસ્ટિક વિકસિત કરવામાં આવી છે, જેની મદદથી દૂધની અંદરની ભેળસેળ વિશે જાણકારી મેળવી શકાય છે. નેનોટેક્નોલોજી દ્વારા આધારિત આ ડિવાઈસની મદદથી ગણતરીની સેકેન્ડોમાં દૂધની અંદરની આઠ પ્રકારની ભેળસેળને પકડી શકાશે. ઉલ્લેખનીય છે કે તાજેતરમાં જ ઈન્ડિયન કાઉન્સિલ ઓફ એગ્રીકલ્ચર રિસર્ચ તરફથી ક્રિતજ્ઞા હેકેથોન 2.0 સ્પર્ધાનું રાષ્ટ્રીય સ્તર પર આયોજન કરવામાં આવ્યુ હતું. આ સ્પર્ધામાં 1974 લોકોએ ભાગ લીધો હતો, જેમાંથી આ ડિવાઈસને પ્રથમ ક્રમાંક મળ્યો હતો. સ્પર્ધાનું પરિણામ 13મી એપ્રિલના રોજ જાહેર કરવામાં આવ્યુ હતું.ઉલ્લેખનીય છે કે કોલેજ દ્વારા આ પ્રોજેક્ટને પેટન્ટ કરવા માટે અરજી આપી છે. એક વાર પેટન્ટ મળી જશે પછી કોલેજ આ ટેક્નોલોજી કોમર્શિયલ પ્રોડક્શન માટે આપી શકશે. જ્યારે ગામડાઓમાંથી દૂધ એકત્રિત કરતા હોય ત્યારે અથવા તો શહેરી વિસ્તારમાં લોકો દૂધવાળા પાસેથી દૂધ લેતા હોય ત્યારે, તમે આ ડિવાઈસની મદદથી ઝડપથી જાણી શકશો કે દૂધમાં ભેળસેળ થઈ છે કે નહીં.
- Advertisement -
અત્યારે પણ તમે લેબોરેટરીમાં જઈને દૂધની શુદ્ધતાની ચકાસણી કરી શકો છો પરંતુ આ પ્રક્રિયા ઘણી લાંબી અને ખર્ચાળ છે તેમજ નિષ્ણાંતના માર્ગદર્શનની જરૂર હોય છે. જ્યારે આ ડિપસ્ટિકની વાત કરીએ તો, કોઈ પણ વ્યક્તિ માત્ર એક રુપિયામાં તેનો ઉપયોગ કરી શકે છે.
