ઇઝરાયલને હથિયાર આપશે ટ્રમ્પ : વિશ્વમાં ખળભળાટ!

ટનલને તબાહ કરે તેવા 900 કિલોના 40 હજાર સુપર-હેવી બોમ્બ પહોંચાડશે, 26 હજાર કરોડની ડીલ

અમેરિકી રાષ્ટ્રપતિ ડોનાલ્ડ ટ્રમ્પનું પ્રશાસન ઈઝરાયલને ૨.૮ અબજ ડોલર એટલે કે લગભગ ₹૨૬ હજાર કરોડના હથિયારો આપવાની તૈયારી કરી રહ્યું છે. આ પેકેજમાં લગભગ ૪૦ હજાર ભારે બોમ્બ શામેલ છે. દરેક બોમ્બનું વજન ૨૦૦૦ પાઉન્ડ એટલે કે લગભગ ૯૦૦ કિલો છે. આ બોમ્બના સપ્લાય પર પૂર્વ રાષ્ટ્રપતિ જો બાઈડને ૨૦૨૪માં રોક લગાવી હતી. પ્રસ્તાવિત હથિયાર પેકેજમાં ૨૦ હજાર ખસ૮૪ અને ૨૦ હજાર ઇક્સ-૧૧૭ બોમ્બ શામેલ છે.
ડીલ હજુ ફાઈનલ થઈ નથી. અમેરિકી અધિકારીઓ અનુસાર, કોંગ્રેસને તેની અનૌપચારિક જાણકારી આપી દેવાઈ છે. ૨૦૨૪માં બાઈડન પ્રશાસને ૨,૦૦૦ પાઉન્ડના આ બોમ્બની એક ખેપ ઇઝરાયલ મોકલવા પર રોક લગાવી દીધી હતી. તે સમયે ચિંતા હતી કે ગાઝા જેવા ગીચ વસ્તીવાળા વિસ્તારમાં તેનો ઉપયોગ થવા પર મોટી સંખ્યામાં લોકોના મોત થઈ શકે છે. ટ્રમ્પના ફરીથી રાષ્ટ્રપતિ બન્યા પછી આ રોક હટાવી દેવામાં આવી. હવે તેમનું પ્રશાસન આ જ બોમ્બની મોટી સંખ્યાવાળી નવી ડીલની તૈયારી કરી રહ્યું છે. ટ્રમ્પ પ્રશાસને ગયા વર્ષે ઇઝરાયલ માટે લગભગ ૩ અબજ ડોલરના હથિયારોના વેચાણને મંજૂરી આપી હતી. આમાં ૩૫,૫૦૦થી વધુ ભારે બોમ્બનો સમાવેશ થતો હતો. ત્યારબાદ જાન્યુઆરીમાં ઇઝરાયલ માટે ૬.૬૭ અબજ ડોલરના વધુ એક હથિયાર વેચાણને મંજૂરી આપવામાં આવી.

કેટલાંક બોમ્બ જમીનની અંદરના ઠેકાણાઓને ભેદવા માટે સક્ષમ
આ ૯૦૦ કિલોના બોમ્બના અલગ-અલગ મોડેલ છે. કેટલાકને જમીનની અંદરના ઠેકાણાઓને નિશાન બનાવવા માટે ડિઝાઇન કરવામાં આવ્યા છે, જ્યારે કેટલાક જમીન ઉપર ફાટીને મોટા વિસ્તારમાં ભારે નુકસાન પહોંચાડી શકે છે. નિષ્ણાતોએ ગાઝામાં થયેલા હુમલાઓના વીડિયો અને ઘટનાસ્થળો પરથી મળેલા બોમ્બના ટુકડાઓનું વિશ્લેષણ કર્યું છે. તેમના મતે, ત્યાં અમેરિકી નિર્મિત બોમ્બનો ઉપયોગ થયો છે. આમાંથી કેટલાકનો ઉપયોગ હમાસના સુરંગ નેટવર્કને નિશાન બનાવવા માટે કરવામાં આવ્યો હતો, પરંતુ ગીચ વસ્તીવાળા વિસ્તારોમાં પણ લોકોના મોત થયા.