બ્લિકિટ-સ્વિગી, ડીમાર્ટથી 5 કિલોથી વધુ ખાંડ નહીં મળે

રિટેલ અને ઓનલાઈન પ્લેટફોર્મ્સ લિમિટ નક્કી કરી, એક મહિનામાં 35% મોંઘી થઈ

બ્લિકિટ, ઝેપ્ટો જેવી ક્વિક-કોમર્સ એપ્સ પરથી હવે ગ્રાહકો એક વખતમાં ૨ થી ૫ કિલો સુધી જ ખાંડ ખરીદી શકશે. દેશમાં તહેવારોની સિઝન શરૂ થવાના બરાબર પહેલાં ખાંડનો પુરવઠો ઘટવા અને કિંમતોમાં અચાનક આવેલા ઉછાળા બાદ આ નિર્ણય લેવામાં આવ્યો છે. ગ્રાહક બાબતોના વિભાગ અનુસાર, ૨૬ ઓગસ્ટે દેશમાં ખાંડની સરેરાશ છૂટક કિંમત ૬૫.૦૫ રૂપિયા પ્રતિ કિલો પર પહોંચી ગઈ છે. માત્ર એક મહિના પહેલા ૨૬ જુલાઈએ તે ૪૮ રૂપિયા પ્રતિ કિલો હતી. એટલે કે ૩૦ દિવસમાં ખાંડ ૩૫.૫% મોંઘી થઈ છે. ઓફલાઈન બજારમાં ડીમાર્ટ અને રિલાયન્સ રિટેલ જેવા સુપરમાર્કેટ્સ દ્વારા પ્રતિ ગ્રાહક ૨ થી ૩ કિલો ખાંડ ખરીદવાની લિમિટ નક્કી કરવામાં આવી છે. મુખ્ય ખાંડ બ્રાન્ડ્સના એક સિનિયર એક્ઝિક્યુટિવના મતે, રિટેલર્સ આ પગલું સંગ્રહખોરી રોકવા અને દરેક ગ્રાહકને સ્ટોક પુરો પાડવા માટે લઈ રહ્યા છે. જથ્થાબંધ બજારમાં પણ ખાંડના ભાવ ૪૫ રૂપિયા પ્રતિ કિલોથી વધીને ૬૦.૩૬ રૂપિયા પ્રતિ કિલો સુધી પહોંચી ગયા છે. પીઆઈબીના આંકડા મુજબ, ૨૦ જુલાઈથી ૨૦ ઓગસ્ટની વચ્ચે જ ખાંડના ભાવ ૧૬% સુધી વધી ગયા હતા, જે ઓગસ્ટના છેલ્લા અઠવાડિયા સુધી વધુ તેજ બન્યા.

કઈ એપ/સ્ટોર પર કેટલી લિમિટ?
બ્લિકિટ: ૧ વારમાં વધુમાં વધુ ૫ કિલો
સ્વિગી ઇન્સ્ટામાર્ટ: ૧-૧ કિલોના ૨ પેકેટ અથવા ૫ કિલોનું ૧ પેક
બિગ બાસ્કેટઃ વધુમાં વધુ ૬ કિલો (અલગ-અલગ બ્રાન્ડ્સ)
ડીમાર્ટ / રિલાયન્સઃ ૨ થી ૩ કિલો પ્રતિ ગ્રાહક

10 લાખ ટન ખાંડની આયાત થશે, સંગ્રહખોરી રોકવાના નિર્દેશ
ખાંડના ભાવ ઘટાડવા માટે કેન્દ્ર સરકારે ગયા અઠવાડિયે ૧૦ લાખ ટન ખાંડની આયાતને મંજૂરી આપી દીધી છે. આ સાથે જ વધુ ખાંડ ખરીદનારા મોટા ગ્રાહકો માટે સ્ટોકની લિમિટ પણ નક્કી કરી દેવામાં આવી છે. સરકારે તમામ રાજ્યોને કડક નિર્દેશ આપ્યા છે કે તેઓ બજારોમાં ચેકિંગ વધારે જેથી ખાંડની સંગ્રહખોરી અને સટ્ટાબાજીને સંપૂર્ણપણે રોકી શકાય.

તહેવારોની સિઝનમાં સામાન્ય બજેટ બગડશે
રક્ષાબંધન અને આવનારા ગણેશોત્સવ, નવરાત્રી અને દિવાળી જેવા તહેવારો દરમિયાન મીઠાઈઓ અને ખાંડમાં બનતી વાનગીઓની માંગ ઘણી વધી જાય છે. આવા સમયે ખાંડની કિંમતોમાં પ્રતિ કિલો ૧૭ રૂપિયા કિલો સુધીના વધારાથી સામાન્ય પરિવારોના મહિનાના રાશનના બજેટ પર સીધી અસર થશે.