અફઘાનિસ્તાનમાં 6.3ની તીવ્રતાના શક્તિશાળી ભૂકંપમાં ઓછામાં ઓછા 20ના મોત, અનેક ઘાયલ

કાબુલ, નવેમ્બર 3 સોમવારે વહેલી સવારે ઉત્તરીય અફઘાન શહેર મઝાર-એ શરીફ નજીક 6.3-તીવ્રતાનો ભૂકંપ આવ્યો, જેમાં ઓછામાં ઓછા 20 લોકો માર્યા ગયા, સેંકડો ઘાયલ થયા અને શહેરની ઐતિહાસિક બ્લુ મસ્જિદને નુકસાન થયું, અધિકારીઓએ જણાવ્યું હતું કે મૃત્યુઆંક વધવાની સંભાવના છે.

યુએસ જિયોલોજિકલ સરવે (USGS) અનુસાર, રિક્ટર સ્કેલ પર આ ભૂકંપની તીવ્રતા 6.3 નોંધાઈ હતી. આ ભૂકંપમાં અનેક લોકોના મોત નિપજ્યા હોવાની પણ આશંકા વ્યક્ત કરવામાં આવી રહી છે.

ઉત્તરીય બલ્ખ પ્રાંતની રાજધાની મઝાર-એ-શરીફ ઉત્તરીય અફઘાનિસ્તાનના સૌથી વધુ વસ્તીવાળા શહેરોમાંનું એક છે. મઝાર-એ-શરીફમાં અનેક લોકો અડધી રાત્રે પોતાના ઘરો પડી જવાના ડરથી રસ્તાઓ પર દોડી ગયા હતા.

નેશનલ સેન્ટર ફોર સીસ્મોલોજી (NCS)એ ‘X’ પરની એક પોસ્ટમાં જણાવ્યું હતું કે પ્રાથમિક અહેવાલો સૂચવે છે કે, આ ભૂકંપ સ્થાનિક સમય અનુસાર સોમવારે વહેલી સવારે મઝાર-એ-શરીફ અને ખુલ્મ શહેરની આસપાસ આવ્યો હતો.

આ ભૂકંપની અસર ઉત્તરી અફઘાનિસ્તાનની સરહદને અડીને આવેલા ત્રણ દેશોને થઈ હતી. તાજિકિસ્તાન, ઉઝબેકિસ્તાન અને તુર્કમેનિસ્તાનના કેટલાક ભાગોમાં પણ ભૂકંપની અસર જોવા મળી હતી.

નોંધનીય છે કે, અફઘાનિસ્તાનના ઉત્તરીય ભાગમાં આ ભૂકંપ આવ્યો છે, જ્યારે લગભગ બે મહિના પહેલા દેશના પૂર્વીય ભાગમાં આવેલા ભૂકંપમાં 2200થી વધુ લોકો માર્યા ગયા હતા.