રાજકોટની સ્કૂલમાં પ્રિન્સિપાલની ઑફિસમાં ચોરી કરનાર દાહોદનો શખ્સ ઝડપાયો

મજૂરી કામે આવ્યા બાદ પૈસા ખૂટી જતાં ચોરીને અંજામ આપ્યાની કબૂલાત

ખાસ-ખબર ન્યૂઝ રાજકોટ

રાજકોટના કાલાવડ રોડ પર પ્રેમ મંદિર પાછળ રહેતાં દર્શનભાઇ ખીમશંકરભાઇ દવે (ઉ.વ.51)એ નોંધાવેલ ફરિયાદમાં જણાવ્યું હતું કે, બાલાજી હોલની પાછળ આવેલ ક્રિષ્ના સ્કૂલમાં છેલ્લા 4 વર્ષથી પ્રિન્સિપાલ તરીકે નોકરી કરે છે. ગઈ તા.20ના નોકરી ઉપર ક્રિષ્ના સ્કૂલ ખાતે ગયેલ ત્યારે ઓફિસમાં જોયુ તો ટેબલ ઉપર પુસ્તકો અસ્ત વ્યસ્ત પડેલા હતા અને ઓફિસનો કેમેરો તૂટેલી હાલતમાં ટેબલ પર પડેલ હતો અને ટેબલ ઉપરનુ કોમ્પ્યુટર ઉંધુ પડેલ હતુ.

બાજુમાં રહેલ પ્રાયમરી વિભાગના પ્રિન્સિપાલનું ટેબલ જોતા ખ્યાલ આવ્યો હતો કે, ઓફિસમાં ચોરી થયેલ છે. પ્રાયમરી વિભાગના પ્રિન્સિપાલ પ્રવીણાબેન પટેલના ટેબલના લોકવાળા બે ડ્રોઅરમાંથી એક ડ્રોઅર ખુલ્લુ જોવા મળતા પ્રિન્સિપાલને જાણ કરતા તેઓ દોડી આવેલ અને તેમણે તેમના ખાનામાં રાખેલ રકમનો હિસાબ કરતા તેમણે ખાનામાં બાળકોની આવેલ ફીના રૂ.39,100 રાખેલ તે ચોરાઇ ગયેલનું જાણવા મળ્યું હતું. બાદમાં સ્કૂલનો એન્ટ્રી ગેઇટનો કેમેરો લટકતો જોવા મળ્યો હતો તેમજ સ્કૂલના કેમેરા તપાસતા તેમાં જોવા મળ્યું કે, રાત્રીના ત્રણ વાગ્યાની આસપાસ એક અજાણ્યો વ્યક્તિ સ્કૂલમાં પ્રવેશી અને 4 વાગ્યાની આસપાસ સ્કૂલમાંથી ચોરી કરી જતો હતો. જે અંગે તાલુકા પોલીસ મથકમાં ફરિયાદ નોંધાવી હતી.તાલુકા પોલીસ સ્ટેશનના પીઆઈ ડી.એમ.હરિપરાના માર્ગદર્શન હેઠળ પીએસઆઈ એમ.એચ.મહારાજ અને ટીમે તસ્કરને પકડવા CCTV ફુટેજના આધારે તપાસ શરૂ કરી હતી. આ દરમિયાન કોન્સ્ટેબલ જયપાલસિંહ સરવૈયા, મહાવિરસિંહ જાડેજાને 150 ફુટ રીંગ રોડ બાલાજી હોલ પાછળ ક્રિષ્ના સ્કૂલમાંથી ચોરી કરનાર શખસ દાહોદ વિસ્તારમાં હોય એવી મળેલ ચોક્કસ બાતમીના આધારે ટીમે દાહોદના આંબલી ખજુરીયા ગામેથી સંજય તાહ પલાસ (ઉ.વ.25)ને પકડી તેની પાસેથી રોકડ રૂ.25 હજાર કબ્જે કરી પૂછતાછ હાથ ધરી હતી આરોપી ગત તા.20ના રોજ પહેલાં સમ્રાટ ઇન્ડસ્ટ્રીયલ વિસ્તારમાં ચોરી કરવાં સાયલક લઈ ત્રાટક્યો હતો. જ્યાં દુકાનો અને કારખાના ફંફોળ્યા હતાં પણ ખાસ કંઈ હાથ ન લાગતાં સીધો તે ક્રિષ્ના સ્કૂલમાં ત્રાટક્યો હતો અને ત્યાંથી રૂ.39 હજાર હાથ લાગતાં ચોરી કરી ત્યાંથી પોતાના વતન નાસી છૂટ્યો હતો. તસ્કર મજૂરીકામ કરે છે અને નશાની હાલતમાં તે રાત્રીના સમયે શહેરના અલગ-અલગ વિસ્તારમાં ત્રાટકી બંધ મિલકતમાં ચોરી કરવાની ટેવ ધરાવતો હતો. ઉલ્લેખનીય છે કે, આરોપી અગાઉ અમદાવાદ ગ્રામ્યના બોપલ અને દાહોદ મહિલા પોલીસ સ્ટેશનમાં પોલીસ ચોપડે ચડી ચુક્યો હોવાનું પોલીસ તપાસમાં સામે આવ્યું છે.