ભુવાને ‘ધુણાવતું’ જાથા!, ધતિંગલીલા બંધ કરાવાઇ

રાજકોટમાં લોકોને તંત્ર-વિદ્યાના નામે છેતરતો ભુવો આંકડાનો જુગાર રમતો હતો!

મેટોડામાં ભુવા સહિત 4 સાગ્રીતોનો પર્દાફાશ: ભુવો લોકો પાસેથી દાણા જોઇ વિધિના નામે રૂપિયા ખંખેરતો હતો

ખાસ-ખબર ન્યૂઝ રાજકોટ

મેટોડા જી.આઈ.ડી.સી. વિસ્તારમાં તંત્રવિદ્યા, વિધિ-વિધાન, બેઠક માટે આવેલ રાજકોટનો ભુવો મહેશ મનજીભાઈ વાળાની ધતિંગલીલાનો ભારત જન વિજ્ઞાન જાથાની ટીમે મેટોડા પોલીસ સ્ટેશનની મદદથી 1264 મો સફળ પર્દાફાશ કર્યો હતો. ભુવાની 10 વર્ષની કપટલીલાના પર્દાફાશમાં ભુવો આંકડાનો જુગારી નીકળ્યો હતો. ભુવાનો નગ્ન વિડીયો વાયરલ ચર્ચાનું કેન્દ્ર બન્યું હતું. બનાવની વિગત પ્રમાણે જાથાના કાર્યાલયે પીડિત દંપતિએ આપેલી હકિકતમાં ભુવો મહેશ હરિધવા મેઈન રોડ, નવનીત હોલવાળી શેરી, મોરારીનગર-3 “મા મસાણી ઘરમાં માતાજીનો મઢ રાખી બાનુ પહેરી લોકોના દુ:ખ-દર્દ, દોરા-ધાગા, નિવારણ વિધિ, બેઠક રાખી ધૂણીને ઉપચારનું કામ કરે છે. બેઠકમાં સાગ્રીતો સાથે આવીને દાણા જોઈ વિધિના રૂા. 5100/-વસુલે છે. વાયણુંવાળા માટે એકવીસ હજારથી એક લાખની વિધિ જણાવે છે. પરિવારમાં અંદરોઅંદર ઝઘડા કરાવવા, સ્મશાનમાં વિધિ, દોરા બાંધવા, યેનકેન છેતરપિંડી આચરે છે. પિડીતાના ઘરે જઈ બે પાકીટ સીગારેટ, ગુલાબનો હાર, આગતા-સ્વાગત જોવાના રૂપિયા સાથે સ્પે. વાહનનું ભાડું વસુલે છે. ઉતારની વિધિમાં ભય-ડર બતાવી મોટી રકમ પડાવે છે. પીડિત દંપતિએ રૂપિયા પીસ્તાલીસ હજારની છેતરપિંડીનો ભોગ બન્યાની હકિકત આપી હતી. ભુવાના ચક્કરમાં પોતે વ્યાજના ચક્કરમાં ફસાયાની સાથે દયનીય આપવિતી જણાવી હતી. જાથાને જરૂરી આધાર-પુરાવા આપ્યા હતા. ભોગ બનેલાની નામાવિલ આપી હતી.

જાથાના ચેરમેન-એડવોકેટ જયંત પંડયાએ માહિતીના આધારે ખરાઈ કરવા ડમી માણસોને મોકલતા હકિકત સત્ય સામે આવી હતી. પર્દાફાશ કરવાનું નક્કી થયું હતું. જાથાના પંડયાએ પર્દાફાશ પહેલા પોલીસ બંદોબસ્ત માટે મુખ્યમંત્રી, અધિક મુખ્ય સચિવ, આઈ.જી.પી. રાજકોટ રેન્જ, જિલ્લા પોલીસ વડાને પત્ર પાઠવી માંગણી મુજબ મેટોડા પોલીસ સ્ટેશનને જરૂરી સુચના મોકલવામાં આવી હતી. મેટોડા પોલીસ સ્ટેશનમાંથી પી.આઈ. એસ. એચ.શર્માએ હેડ કોન્સ્ટે. યુવરાજસિંહ અશોકસિંહ જાડેજા, હેડ કોન્સ્ટે. હિતેશભાઈ રણછોડભાઈ, મહિલા કોન્સ્ટે. ધર્મિષ્ઠાબેન પ્રવિણભાઈ અને દર્શનાબેન પટેલને જાથાના બંદોબસ્ત માટે ફાળવી દીધા.રાજકોટથી ભુવો મહેશ વાળા તેના સાગ્રીતો ધીરજ વીરજી બગડા, બ્રિજરાજસિંહ જાડેજા, ધર્મેશ હરેશભાઈ, હરેશ હસમુખ સોલંકી મેટોડા દાણા પાડવાની બેઠક માટે રવાના થયા. વિધિ માટેનું રહેઠાણ સુસજજ રાખવામાં આવ્યું. જાથાના ચેરમેન જયંત પંડયાના વડપણ હેઠળ બાલસરના નિર્મળ મેત્રા, વીરડા વાજડીના દિનેશ હુંબલ, રાજકોટથી રોમિત રાજદેવ, ગુલાબસિંહ ચૌહાણ, અંકલેશ ગોહિલ, રવિ પરબતાણી, રમેશ પરમાર ભુવાના પર્દાફાશ માટે મેટોડા પોલીસ સ્ટેશને પહોંચી ગયા. મેટોડામાં વિધિ કરવામાં ભુવાએ ત્રણ કલાક મોડું કર્યું. ઘરમાં દાણાની પાટ નાખવામાં આવી અને સાગ્રીતો સાથે ભુવાએ વિધિ શરૂ કરી. પુરાવા આવી જતા મેટોડા પોલીસ સ્ટાફ સાથે જાથાની ટીમ પહોંચી. જાથાના પંડયાએ પરિચય આપી ભુવાને કીધું કાયમી ધતિંગ બંધ કરાવવા આવ્યા છીએ. ભુવા મહેશ અને સાગ્રીતોને પોલીસ સ્ટેશને લાવવામાં આવ્યા. ભુવો મહેશ વાળાના હોંશકોંશ ઉડી ગયા હતા. તેવામાં ભુવો આંકડાનો જુગાર રમતો હતો. ભુવા મહેશ વાળાએ આંકડાનો જુગાર રમતો હોવાનું સ્વીકારી, નગ્ન હાલતમાં વિડીયોની ચોખવટ કરી હતી. પીડિતાના રૂપિયા પરત આપવાની બાંહેધરી આપી હતી. કાયમી ધતિંગલીલાની બંધની ખાત્રી આપી હતી.
વિજ્ઞાન જાથાનો 1264 મો સફળ પર્દાફાશમાં રાજકોટ જિલ્લા પોલીસ વડા, એલઆઈબી, મેટોડા પોલીસ સ્ટેશનનો આભાર માન્યો હતો. જાથાના દિનેશ હુંબલ, નિર્મળ મેત્રા, અંકલેશ ગોહિલ, રમેશ પરમાર, રોમિત રાજદેવ, ગુલાબસિંહ ચૌહાણ, રવિ પરબતાણી, પ્રકાશ મનસુખભાઈ, ભાનુબેન ગોહિલે ઉત્કૃષ્ઠ કામગીરી કરી હતી અને પોલીસ સ્ટાફમાંથી યુવરાજસિંહ જાડેજા, હિતેશભાઈ રાઠોડ, ધર્મિષ્ઠાબેન પ્રવિણભાઈ, દર્શનાબેન પટેલ પર્દાફાશની કામગીરીમાં જોડાયા હતા.

ભૂવો લોકોનાં દુ:ખ-દર્દ દૂર કરવાના નામે તગડી ફી વસૂલતો: જાથા
1. દોરા-ધાગા જોવાનું, ઉતાર કાઢવાનું કામ છેલ્લાં 10 વર્ષથી કરતો
2. પ્રથમ બેઠકના રૂ. 5100 બાદ દાણા જોઈ રૂ. 21000થી 1 લાખની ફી વસૂલતો
3. તંત્રવિદ્યામાં નગ્ન હાલતમાં વિધિ-વિધાન
4. ભૂવો સ્વિફટ ગાડી, સાગરીતોની મોટી ફોજ ધરાવે છે
5. પતિ-પત્નીના ઝઘડાઓ, પિતૃ નડતરની વિધિના રૂ. 21000
6. વાયણ વાળવાની વિધિના રૂ. 35000
7. કાળા દોરા આપી, કાળું કપડું, ઉતાર વિધિમાં પૂતળા બનાવી ચાર ચોકમાં મૂકવા
8. દુ:ખી લોકોને વડિયો દ્વારા વિધિ-વિધાન કરાવતો