જીવલેણ ખૂની હુમલો કરી ગેરકાયદે નાણાં કઢાવવાની કોશિષ કરનારની જામીન અરજી નામંજૂર કરતી અદાલત

કાયદા કાનુનના ધજાગરાં ઉડાવી ફિલ્મી સ્ટાઈલે ગુનો આચરનારને જામીન સ્વરૂપી પ્રીમિયમ આપી શકાય નહીં- સુરેશ ફળદુ

ખાસ-ખબર ન્યૂઝ રાજકોટ

રજપૂતપરામાં પાર્કવ્યુ હોટેલ ધરાવતા કાળુભાઈ પાનસુરીયા, પ્રફુલગીરી ગોસ્વામી પાસે રૂા. 35,00,000 માગતા હોય તે ન ચૂકવવા અને સામા રૂા. 71,00,000 ગેરકાયદે કઢાવવા દિનેશ મુછડી, રમેશ બોરીચાને પ્રફુલગીરી ગોસ્વામીએ આપેલા હવાલાના ભાગરૂપે છરી, લોખંડના પાઈપ, ધોકા ધારણ કરી પાર્કવ્યુ હોટલેથી સ્વામિનારાયણ મંદિરે જવા નીકળતી વખતે કાળુભાઈ કાર ઉપર ધોકા પાઈપ વડે હુમલો કરી છરીથી ઈજા પહોંચાડતા જીવ બચાવવા દુકાનમાં જતાં ત્યાં અંદર ધસી પાઈપ ધોકા વડે મરણોત્તર ઢોરમાર મારી ખૂનની કોશિશ કરી ફ્રેકચર કરી જાનથી મારી નાખવાની ધમકી આપી બળજબરીથી નાણા કઢાવવાની કોશિશ કરનાર ધરપકડ પામેલા રમેશ બોરીચાની ચાર્જશીટ પહેલાની બાદ ચાર્જશીટ પછીની પણ રેગ્યુલર જામીન અરજી નામંજૂર કરતો હુકમ રાજકોટના મહે. એડી. સેશન્સ જજએ ફરમાવેલો છે.

કેસની હકીકતો જોઈએ તો ફરિયાદી કાળુભાઈ વિરજીભાઈ પાનસુરીયા પોતાની પાર્કવ્યુ હોટલ ખાતેથી કાર લઈ ભૂપેન્દ્ર રોડ ઉપર આવેલા સ્વામિનારાયણ મંદિરે જવા નીકળતા હતા તે વખતે દિનેશ મુછડી અને રમેશ બોરીચાએ પ્રફુલ ગોસ્વામી પાસેથી લીધેલા હવાલાના આધારે પૈસાની લેતીદેતી બાબત ફરિયાદીની કાર પાસે આવી કારના કાચ લોખંડના પાઈપથી ઘા મારી કારને નુકસાન કરી છરીનો ઘા ફરિયાદીના ડાબા હાથની આંગળીના ભાગે મારી લોખંડના પાઈપ વડે ફરિયાદીને શરીરના જુદા જુદા ભાગે ઘા કરી ફરિયાદીને ફ્રેકચર સહિતની ગંભીર ઈજાઓ પહોંચાડી જાનથી મારી નાખવાની ધમકી આપી એકબીજાને મદદગારી કરી પ્રતિબંધિત હથિયારો ધારણ કરી આચરેલ ગુના અન્વયેની ફરિયાદ એ ડીવીઝન પોલીસ સ્ટેશનમાં આપવામાં આવેલી જે અન્વયે બે આરોપીઓની ધરપકડ કરવામાં આવેલી અને પ્રફુલગીરી ગોસ્વામી નાસતા ભાગતા ફરે છે.

ધરપકડ પામેલા રમેશ જીવાભાઈ સબાળનાઓએ જામીન પર મુક્ત થવા નીચેની અદાલતમાં કરેલી જામીન અરજી નામંજૂર થયા બાદ ચાર્જશીટ પહેલા સેશન્સ અદાલતમાં કરેલી જામીન અરજી નામંજૂર થયા બાદ નામદાર હાઈકોર્ટમાં કરેલી જામીન અરજી પરત ખેંચ્યા બાદ ચાર્જશીટ બાદ સેશન્સ અદાલતમાં કરેલી જામીન અરજી અન્વયે મૂળ ફરિયાદપક્ષે અને સરકાર પક્ષે એવી રજૂઆત કરવામાં આવેલી કે ફરિયાદી પ્રફુલ ગોસ્વામી પાસે રૂા. 35,00,000 માગતા હોય તે જતા કરતા ન હોય તેથી પ્રફુલ ગોસ્વામીએ આ બંને આરોપીઓને હવાલો આપી સામા રૂા. 71,00,000 બળજબરીથી મૃત્યુ અને મહાવ્યથાના ભયના ઓથા હેઠળ મૂકી જીવલેણ ગંભીર હુમલો કરી ખૂનની કોશિશ કરેલી હોવાનું સીસીટીવી ફૂટેજ પરથી સ્પષ્ટ થતું હોય છતાં ગુનો દાખલ કરવામાં આવેલો નથી કે કલમનો ઉમેરો કરવામાં આવેલો નથી. અગાઉ આ જ આરોપીઓએ આ જ પ્રકારે આપેલી ધમકી અન્વયે તા. 10-9-2024ના પોલીસ કમિશનરને ફરિયાદ આપવા છતાં આરોપીઓને પોલીસ દ્વારા ગુનો કરવા માટેનું લાયસન્સ આપેલું હોય તે રીતે તા. 17-10-2024ના નજરે જોનાર લોકોના શ્ર્વાસ થંભી જાય તે રીતે ફિલ્મી સ્ટાઈલે જીવલેણ ખૂની હુમલો કર્યાનું અને પોલીસ આરોપીઓએ સહેલાઈથી જામીન ઉપર મુક્ત થાય એ પ્રકારે કાર્યવાહી કરી રહ્યા હોવાનું પોલીસ પેપર્સ ઉપરથી તથા સીસીટીવી ફૂટેજ ઉપરથી સ્પષ્ટ થતું હોય આરોપીઓએ ઈરાદા અને જ્ઞાન સાથે ગુનો કરેલો હોય ગુનાનું સ્વરૂપ, પ્રથમ દર્શનીય ટેકો આપતા પુરાવાનું સ્વરૂપ, ગુનાની ગંભીરતા, ફરિયાદ પક્ષના નુકસાન પહોંચાડવાની દહેશત હોય નામદાર ગુજરાત હાઈકોર્ટમાં ફરિયાદીએ પોલીસ વિરુદ્ધ કરેલી કાર્યવાહીમાં પોલીસને ડાયરેકશન આપવા છતાં તે મુજબ કાર્યવાહી કરવાની જગ્યાએ આરોપીઓને છાવરી રહ્યા હોવાનું રેકર્ડ પરના દસ્તાવેજી પુરાવા પરથી સ્પષ્ટ ફલિત થતું હોય ત્યારે આરોપીના જામીન મંજૂર કરી શકાય નહીં તેવી લંબાણપૂર્વકની રજૂઆતો કરવામાં આવેલી હતી.

તમામ પક્ષેની રજૂઆતો, રેકર્ડ પરનો દસ્તાવેજી પુરાવો તથા પોલીસ પેપર્સ લક્ષે લેતાં તપાસ કરનાર અધિકારીએ સોગંદનામામાં જણાવ્યા મુજબનો આક્ષેપ તથા અરજદારે અગાઉ કરેલી જામીન અરજી નામંજૂર કરેલા તે તથા ચાર્જશીટના પેપર્સ વેચાણ લેતાં રૂા. 71,00,000 બળજબરીપૂર્વક કઢાવવા પૈસાની લેતીદેતી બાબતે ખાર રાખી ફરિયાદીની કારના કાચમાં લોખંડના પાઈપના ઘા મારી નુકસાન કરી આરોપી નં. 1નાએ છરી તથા ધોકા વડે અને અરજદારે લોખંડના પાઈપ વડે ફરિયાદીના શરીરે માર મારી ઈજાઓ કર્યાનો આક્ષેપ ધ્યાને લેતાં તેમજ ફરિયાદ પક્ષે રજૂ કરેલા દસ્તાવેજી પુરાવામાં આરોપીઓ વિરુદ્ધ ખૂનની કોશિશનો ગુન્હો બનતો હોવા બાબતે પોલીસ કમિશનરને કરેલી લેખિત રજૂઆત અન્વયે નામદાર હાઈકોર્ટે કાર્યવાહી અન્વયે ડાયરેકશન આપેલું હોય આ સંજોગોમાં અરજદારને જામીનમુક્ત કરવામાં આવે તો ફરિયાદ પક્ષના સાહેદોના પુરાવા સાથે ચેડા થાય તેમ છે જેથી અરજદારની તરફેણમાં વિવેકાધીન સત્તાનો ઉપયોગ કરવો ન્યાયોચિત્ત જણાતુ નહીં હોવાનું માની રમેશ જીવા સબાળની ચાર્જશીટ બાદની રેગ્યુલર જામીન અરજી નામંજૂર કરતો હુકમ ફરમાવવામાં આવેલો છે.
ઉપરોક્ત કામમાં મૂળ ફરિયાદી કાળુભાઈ પાનસુરીયા વતી રાજકોટના એડવોકેટ સુરેશ ફળદુ, ભુવનેશ શાહી, કુણાલ શાહી, રીપલ ગેવરીયા, પાર્થ સંઘાણી, જય પીઠવા, જસ્મીન દુધાગરા તથા મદદમાં યુવરાજ વેકરીયા, નીરવ દોંગા, પ્રીન્સ રામાણી, આર્યન કોરાટ, ભાવીન ખુંટ તથા સરકાર તરફે મુકેશ પીપળીયા રોકાયેલા હતા.