અમેરિકા ભારતમાં રશિયન મીડિયા પર પ્રતિબંધ મૂકવા માંગે છે: જાસૂસી કરી હોવાનો આરોપ

ખાસ-ખબર ન્યૂઝ નવી દિલ્હી, તા.16 
અમેરિકા ભારતમાં રશિયન મીડિયા હાઉસ RT પર પ્રતિબંધ મૂકવા માંગે છે. હાલમાં, અમેરિકાએ વિશ્ર્વભરમાં રશિયન મીડિયા નેટવર્ક RT પર પ્રતિબંધ લગાવવાના પ્રયાસો તેજ કર્યા છે. જેથી ભારત પણ RT પર પ્રતિબંધ મૂકે તેવી અપેક્ષા છે. ધ હિન્દુના અહેવાલ મુજબ અમેરિકન અધિકારીઓએ આ અંગે ભારતના વિદેશ મંત્રાલય સાથે વાત કરી છે. તેમણે ભારતમાં પત્રકારત્વ માટે RTને આપવામાં આવેલી માન્યતા છીનવી લેવાની ભારત પાસેથી માંગણી કરી છે. તેમના પત્રકારોને રશિયન દૂતાવાસના કર્મચારીઓ જ માનવા કહ્યું છે. ભારતે હજુ સુધી આ અંગે કોઈ પુષ્ટિ કરી નથી. એક પૂર્વ રાજદ્વારીએ કહ્યું છે કે મીડિયા નેટવર્ક પર પ્રતિબંધ મૂકવો એ પશ્ર્ચિમી દેશોના બેવડા વલણને છતા કરે છે. અમેરિકાના વિદેશ મંત્રી એન્ટની બ્લિંકને શુક્રવારે રશિયા પર પ્રતિબંધોની નવી યાદી જાહેર કરી. રશિયાના ઘણા મીડિયા નેટવર્કને આમાં સામેલ કરવામાં આવ્યા છે. આમાં ભારતમાં કાર્યરત RT અને સ્પુતનિકનો પણ સમાવેશ થાય છે.

બ્લિંકને આરોપ લગાવ્યો છે કે આ મીડિયા નેટવર્ક્સ રશિયન ઈન્ટેલિજન્સ માટે કામ કરે છે. તેઓએ અમેરિકા અને જર્મનીમાં ખોટી માહિતી ફેલાવવાનું કામ કર્યું છે. મીડિયા નેટવર્ક પર રશિયાની સૈન્ય માટે ભંડોળ એકત્રિત કરવાનો પણ આરોપ લગાવ્યા છે. અમેરિકાએ કહ્યું છે કે તેણે વિશ્ર્વભરના તેના રાજદ્વારીઓને આદેશ આપ્યો છે કે તેઓ રશિયન મીડિયા નેટવર્ક સામે મળેલા પુરાવા તમામ સરકારો સાથે શેર કરે. ધ હિન્દુ અનુસાર, બે અઠવાડિયા પહેલા યોજાયેલી બેઠકમાં RT પર પ્રતિબંધ મૂકવાનો મુદ્દો ઉઠાવવામાં આવ્યો હતો. અમેરિકન દૂતાવાસના એક અધિકારી ક્રિસ્ટોફર એલમસના જણાવ્યા અનુસાર, તેમણે ભારત અને અન્ય દેશોને રશિયાના નેટવર્ક વિરુદ્ધ પોતપોતાના હિસાબે પગલાં લેવાની અપીલ કરી છે. તેમજ, વિદેશ મંત્રાલયના એક અધિકારીએ કહ્યું કે આ ભારતનો મુદ્દો નથી.

ભારત કોઈપણ એક દેશ દ્વારા લાદવામાં આવેલા પ્રતિબંધો હેઠળ કામ કરતું નથી, તે પ્રતિબંધોનું પાલન કરતું નથી જેને યુએન દ્વારા મંજૂરી આપવામાં આવી નથી.
રશિયાએ અમેરિકાના તમામ આરોપોને ફગાવી દીધા છે. RTના એક વરિષ્ઠ અધિકારીએ કહ્યું છે કે અમેરિકા તેમની વિરુદ્ધ ઉઠેલા દરેક અવાજને કચડી નાખવા માંગે છે.
તેમજ, રશિયન વિદેશ મંત્રાલયના પ્રવક્તા મારિયા ઝાખરોવા કહે છે કે અમેરિકાની આ કાર્યવાહી હિટલરના નાઝી જર્મની જેવી છે. અમેરિકા સમગ્ર વિશ્ર્વમાં રશિયા વિરુદ્ધ નફરત ફેલાવવાનું કામ કરી રહ્યું છે. રશિયન ઓઈલ ખરીદ્યા બાદ ભારત હવે RTની કસોટીનો સામનો કરી રહ્યું છે. યુદ્ધ છતાં ભારતે રશિયા પાસેથી ઓઈલ ખરીદવાનું ચાલુ રાખ્યું. આ અંગે પશ્ર્ચિમી દેશોએ ભારતની ઘણી ટીકા કરી હતી.

પીએમ મોદીના યુક્રેન પ્રવાસ બાદ ઝેલેન્સકીએ પણ કહ્યું હતું કે જો ભારત રશિયા પાસેથી ઓઈલ ખરીદવાનું બંધ કરશે તો યુદ્ધ બંધ થઈ જશે. જો કે, ભારતે તેની આર્થિક સ્થિતિ સ્પષ્ટ કરતાં સ્પષ્ટ કર્યું કે તે રશિયા પાસેથી ઓઈલ ખરીદવાનું બંધ કરશે નહીં. રશિયામાં ભૂતપૂર્વ ભારતીય રાજદૂત કંવલ સિબ્બલ, જેઓ વારંવાર RT માટે લખે છે, તેઓ માને છે કે ભારત યુએસના દબાણમાં આવશે નહીં. વિદેશ મંત્રાલય તેની વિવેકબુદ્ધિથી નિર્ણય લેશે. અમેરિકાની આ કાર્યવાહીથી વૈશ્ર્વિક દક્ષિણ દેશોમાં તેની છબી ખરડાશે.