લોકમેળામાં અનિચ્છનિય બનાવ ન બને તેની તકેદારી

રાઇડઝ, સ્ટોલમાં 40% કાપ

સરકારી ફિટનેસ સર્ટિફિકેટ મળ્યા બાદ જ યાંત્રિક રાઇડસ ચાલુ કરવા દેવાશે

સૌરાષ્ટ્રના પ્રસિદ્ધ લોકમેળાનું દર વર્ષની જેમ આ વર્ષે પણ રાજકોટના રેસકોર્સ ગ્રાઉન્ડમાં તા. 24થી 28 ઓગષ્ટ દરમિયાન ભવ્ય આયોજન કરવામાં આવ્યું છે. જેના ભાગ સ્વરૂપે જુદા-જુદા વિભાગો દ્વારા તડામાર તૈયારીઓ આગામી દિવસોમાં શરુ કરાય તે પૂર્વે આજે કલેકટર પ્રભવ જોશીના અધ્યક્ષસ્થાને વિવિધ વિભાગોના અધિકારીઓ સાથે બેઠક યોજાઇ હતી. તેમાં સૌપ્રથમ લોકમેળાના નામકરણ, વીમા, વિવિધ સાંસ્કૃતિક કાર્યક્રમ, જુદા-જુદા ટેન્ડરો સંદર્ભે ચર્ચા કરવામાં આવી હતી. જુદી-જુદી 19 સમિતિઓની રચના પણ કરવામાં આવ્યા બાદ લોકમેળામાં મેળાની રાઇડસ તેમજ દુકાનોમાં 40% ઘટાડો કરી યોગ્ય રીતે લોકોને અવર-જવર માટે જગ્યા મળી રહે અને કોઇ અનિચ્છનિય બનાવ ન બને તે દિશામાં સૂચારૂ આયોજન ઉપર કલેકટરે ભાર મુકયો હતો.

આગામી જન્માષ્ટમીના તહેવાર નિમિત્તે રાજકોટ ખાતે યોજાનાર લોકમેળાના આયોજન અંગેની બેઠક કલેકટર કચેરી ખાતે યોજાઇ હતી. જિલ્લા કલેક્ટર પ્રભવ જોષીએ આ બેઠકમાં સલામતીની તમામ બાબતોનું ચુસ્તપણે પાલન કરવાના તથા મેળાના સુચારુ આયોજન માટે બનાવાયેલી તમામ 19 સમિતિઓના અધ્યક્ષોને તેમની કામગીરી પૂર્ણ સજ્જતા સાથે કરવાના આદેશો આપ્યા હતા.

અધિક નિવાસી કલેક્ટર ચેતન ગાંધીએ બેઠકની શરૂઆતમાં ઉપસ્થિત તમામ સમિતિઓના સભ્યોને આવકાર્યા હતા. લોક મેળા અમલીકરણ સમિતિના સભ્ય સચિવ અને પ્રાંત અધિકારી ચાંદનીબેન પરમારે પી.પી.ટી.ના માધ્યમથી લોકમેળાના આયોજન અંગેની તમામ બાબતો આ બેઠકમાં રજૂ કરી હતી. આ બેઠકમાં મેળાની રાઈડઝ તથા દુકાનોમાં 40 % ઘટાડો કરી યોગ્ય રીતે ક્રાઉડ મેનેજમેન્ટ કરવા, સુરક્ષા માટે પોલીસ બંદોબસ્ત ગોઠવવા, વાસી ખોરાકનો નાશ કરી લોકોના આરોગ્યની જાળવણી કરવા, છાપેલા ભાવ કરતાં વધુ ભાવે ખાદ્ય સામગ્રીનું વેચાણ ન થાય તેનું ધ્યાન રાખવા, કંટ્રોલરૂમ-એમ્બ્યુલન્સ-ફાયર સેફ્ટી વગેરેની યોગ્ય વ્યવસ્થા કરવા, સરકારી ફિટનેસ સર્ટિફિકેટ મળ્યા બાદ જ રાઈડઝ ચાલુ કરવા, રાત્રે 11.30 વાગ્યે એન્ટ્રી બંધ કરાવવા, એન્ટ્રી-એક્ઝિટ તથા ખોવાયેલા બાળકો માટે સી.સી.ટી.વી. કેમેરા લગાવવા, તથા મેળાના ઉદ્ઘાટન તથા પાંચ દિવસ દરમિયાન યોજાનારા વિવિધ સાંસ્કૃતિક કાર્યક્રમો, એન.ડી.આર.એફ. અને ડીઝાસ્ટરની ટીમ તૈયાર રાખવા, વગેરે તમામ બાબતો વિશે વિસ્તારપૂર્વક ચર્ચા કરવામાં આવી હતી.

આ બેઠકમાં જિલ્લા વિકાસ અધિકારી નવનાથ ગવ્હાણે, ડી.સી.પી. જગદીશ બંગારવા, જિલ્લા પુરવઠા અધિકારી રાજેશ્રીબેન વંગવાણી, નાયબ મ્યુનિસિપલ કમિશનર હર્ષદ પટેલ, પ્રાંત અધિકારી નિશા ચૌધરી અને વિમલ ચક્રવર્તી, સ્ટેમ્પ ડ્યુટી નાયબ કલેક્ટર બી.એ.અસારી, એ.સી.પી. સર્વશ્રી યાદવ, ગઢવી તથા રાધિકા ભારાઈ, જિલ્લા યુવા વિકાસ અધિકારી દિહોરા, મુખ્ય જિલ્લા આરોગ્ય અધિકારી ડો.કે.પી.સિંઘ, તથા લોકમેળા સાથે સંબંધિત તમામ સરકારી વિભાગોના અધિકારીઓ ઉપસ્થિત રહ્યા હતા.