ખાસ-ખબર ન્યૂઝ રાજકોટ, તા.8
આગામી તા.13મીથી શાળાઓમાં વેકેશન પૂર્ણ થતા શિક્ષણકાર્યનો પ્રારંભ થશે તે અગાઉ સ્કૂલવર્ધીના વાહનોમાં ફિટનેસ સહિત સેફ્ટી અંગેની કામગીરી પૂરી કરવા માટે તંત્ર દ્વારા સુચના આપવામાં આવી હતી અને આજથી તે અંગે ચકાસણી કરવામાં આવી જેમાં 135 જેટલા વાહનોને નોટીસ ફટકારવામાં આવી છે.
રાજકોટ આરટીઓ કચેરી દ્વારા આજે સ્કૂલવર્ધીના વાહનોમાં ફિટનેસ અંગે ચકાસણીની કામગીરી કરવામાં આવી હતી. જેમાં વિવિધ ચોકમાં કામગીરી કરતી સ્કૂલવર્ધીમાં ચાલતા 135 જેટલા વાહનોમાં ફિટનેસ નહી જણાતા આરટીઓ દ્વારા નોટીસ ફટકારવામાં આવી હતી અને 13મી પહેલા ફિટનેસની કામગીરી પૂર્ણ કરવા માટે સુચના આપવામાં આવી છે અને આગામી દિવસોમાં ક્ષતિ જણાશે તો ડિટેઇન કરવામાં આવશે.
વધુમાં આરટીઓ સુત્રોએ જણાવ્યુ હતુ કે તા.13મી જૂન સુધીમાં તમામને કામગીરી કરવા જણાવાયુ છે અને ત્યારબાદ શાળાઓ શરૂ થતાની સાથે જ સ્કૂલવર્ધીના વાહનોમાં ત્રાટકવામાં આવશે અને કોઇપણ જાતની બાંધછોડ ચલાવી લેવામાં આવશે નહીં. તેમજ સ્કૂલવર્ધીના વાહન ચાલકોને બાળકો બેસાડવાની પણ માર્ગદર્શીકા આપવામાં આવી છે. જે મુજબ બાળકો બેસાડી શકશે. તેમજ આ કામગીરી દરમ્યાન બાળકોને હેરાનગતિ ન થાય તે માટેની તકેદારી રખાશે.