રેગ્યુલર ભાડાની સરખામણીએ બમણું ભાડું ચૂકવવું પડશે
ખાસ-ખબર સંવાદદાતા
વધુ બસ સારી બસના સૂત્ર સાથે શહેરની સાથે ગ્રામ્ય વિસ્તારમાં સસ્તી ટ્રાન્સપોર્ટ સુવિધા આપતું ગુજરાત સરકારનું સાહસ જીએસઆરટીસી હવે સમય સાથે કદમ મિલાવી આધુનિક યુગમાં પ્રવેશી ચૂક્યું છે જેમાં મોરબી રાજકોટ રૂટ ઉપર સોમવારથી પ્રથમ વખત જ ઈલેક્ટ્રિક એસી એસટી બસ દોડાવવાનું શરૂ કરવામાં આવ્યું છે. સોમવારે વહેલી સવારથી રાજકોટ એસટી ડેપોમાં પ્રથમ ઈલેક્ટ્રિક બસ આવી પહોંચી હતી અને દિવસ દરમિયાન અલગ અલગ 5 બસ આવી પહોંચી હતી.સોરાષ્ટ્રમાં સૌથી વધુ ટ્રાફિક ધરાવતા મોરબી રાજકોટ રૂટ ઉપર સોમવારથી સૌપ્રથમ વખત ઈલેક્ટ્રિક બસ દોડતી કરવામાં આવી છે. રાજકોટ ડેપોના સત્તાવાર સુત્રોના જણાવ્યા મુજબ, નિગમ દ્વારા રાજકોટ ડિવિઝનને કુલ 20 ઈલક્ટ્રિક એસટી બસ ફાળવવામાં આવી છે જેમાં પ્રથમ તબક્કે 5 ઈલેક્ટ્રિક બસ આવતા સોમવારથી મોરબી રાજકોટ રૂટ ઉપર આ પાંચેય બસ ફાળવી કુલ 10 ટ્રીપ શરૂ કરવામાં આવી છે.
- Advertisement -
આ બસમાં મોરબી-રાજકોટ વચ્ચે રૂપિયા 90 ભાડું નક્કી કરવામાં આવ્યું છે. અત્રે ઉલ્લેખનીય છે કે, હાલમાં રાજકોટ ખાતે એક જ ઈલેક્ટ્રિક ચાર્જિંગ પોઇન્ટ હોય બસના રૂટ ઓછા રાખવામાં આવ્યા છે. આગામી સમયમાં રાજકોટ ઉપરાંત જૂનાગઢ અને જામનગર ખાતે ઈલેક્ટ્રિક ચાર્જિંગ પોઇન્ટ શરૂ કરી ટ્રિપની સંખ્યા વધારવામાં આવશે. હાલમાં એક વખતના ચાર્જિંગ બાદ આ ઇલેક્ટ્રિક બસ 180 કિલોમીટર ચાલે છે અને આ બસમાં મોરબીથી રાજકોટનું મુસાફરોને 90 રૂપિયા ભાડું ચૂકવવાનું રહેશે.
