વિશ્વાસઘાત કરી કૌભાંડ આચરનાર અદિતિ મંડળીના પૂર્વ મંત્રી સહિત બે શખસના 4 દિવસના રિમાન્ડ મંજૂર

મંડળીના પ્રમુખ સહિતનાઓએ સગા-પરિવારના અંગત આર્થિક લાભ માટે તેઓના ખાતાઓમાં રૂપિયા જમા કરાવી ગુનાઇત ઉચાપત કરી બનાવટી દસ્તાવેજો બનાવી નાખ્યાં!

ખાસ-ખબર ન્યૂઝ રાજકોટ, તા.8

સહકારી ક્ષેત્રના ઈતિહાસમાં કદાચને પ્રથમ કહી શકાય તેટલી મોટી રકમ એટલે કે રૂા. 29,59,50,070 તા. 31-12-2023ની સ્થિતિએની રકમ અને તેના પરનું વ્યાજ બેંકમાં જમા ન કરાવી અને આ રકમમાંથી રકમ રૂા. 12,77,84,732 મંડળીના પ્રમુખ સહિતનાઓએ પોતાના તથા સગા-પરિવારના અંગત આર્થિક લાભ માટે તેઓના ખાતાઓમાં જમા કરાવી ગુન્હાહીત ઉચાપત કરી વિશ્ર્વાસઘાત તથા છેતરપિંડી કરી બનાવટી દસ્તાવેજો બનાવી અને તે બનાવટી હોવાનું જાણતા હોવા છતાં બેંકમાં ખરા તરીકે રજૂ કરી ખોટા હિસાબો બનાવી આર્થિક લાભ મેળવવા કરોડોનું કૌભાંડ આચરનાર શ્રી અદિતિ ક્રેડીટ કો.ઓપ. સોસાયટી લી.ના પ્રમુખ જગદીશસિંહ સજુભા જાડેજા સહિતનાઓ વિરૂદ્ધ તપાસણી કરનાર બેંકની ટીમ વધુ કૌભાંડ બહાર લાવે તે અટકાવવા ગાળો આપી જાનથી મારી નાખવાની ધમકી આપી ગુન્હા આચરનારાઓની પોલીસે 7 દિવસની પોલીસ રિમાન્ડની માગણી સાથે અદાલતમાં રજૂ કરતાં આરોપી પૂર્વ મંત્રી અરૂણસિંહ સજુભા જાડેજા તથા ઉપેન્દ્રસિંહ સજુભા જાડેજા બંનેને 4 દિવસની રિમાન્ડ પર સોંપતો હુકમ રાજકોટના મહે. એડી. ચીફ જ્યુડી. મેજી. દ્વારા ફરમાવવામાં આવ્યો છે. કેસની હકીકત જોઈએ તો આરોપીઓએ પ્રથમથી જ છેતરપિંડી અને વિશ્ર્વાસઘાત કરવાના ઈરાદા સાથે ગુન્હાહીત કાવત્રુ રચી શ્રી અદિતિ ક્રેડીટ કો.ઓપ. સોસાયટીમાં જોડાયેલા સભાસદોની લોનો મંડળીમાં ભરપાઈ થયેલી ન હોવા છતાં અને મંડળીમાં રોકડ વ્યવહાર પ્રતિબંધિત હોવા છતાં મંડળીમાં સભાસદોએ રોકડમાં લોનો ભરપાઈ કરી દીધેલી સંબંધેની 86 સભાસદોની પહોંચો તથા મંડળીના એન.ઓ.સી. મંડળીએ બેંકમાં રજૂ કરી આવા સભાસદોની લોન વખતે જામીનગીરીમાં રજૂ થયેલા અસલ દસ્તાવેજોની ફાઇલો બેંકમાંથી છોડાવી ગયા બાદ પણ મંડળીએ આવા સભાસભોની તા. 28-2-2022ની સ્થિતિએ મંડળી પાસે લોનની બાકી રકમ રૂા. 8,22,39,436 તથા તેનું બાકી વ્યાજ બેંકમાં જમા ન કરાવી કરોડોના અનેક રોકડ વ્યવહારો કરેલા, ઉપરાંત ત્રણ સભાસદોની મંડળીની લોન પેટે જમા કરેલી વસુલાતની પહોંચો મુજબની રકમ મંડળીના રોજમેળમાં રૂા. 16,89,988 ઓછી જમા લઈ પહોંચોમાં છેડછાડ કરી તથા રક્ષીત પગારદાર સભ્યોને ધીરાણ આપવા સભ્યો દ્વારા આપવામાં આવતા સહકારી કાયદાની કલમ 50 અન્વયે ખોટા કબુલાતનામા ઉભા કરી સંસ્થાઓના ખોટા સિક્કાઓ મારી અધિકારીઓની ખોટી સહીઓ કરી બોગસ ડોક્યુમેન્ટ ઉભા કરી પાંચ સભ્યોના નામે ધીરાણ ઉપાડી બેંક સાથે રૂા. 72,07,727ની છેતરપિંડી કરી ઉપરાંત મંડળીમાં રહેલી એન.પી.એ. જોગવાઈ ફંડ ખાતે રકમ રૂા. 56,02,241 તથા મંડળીમાં શકમંદ લેણા અનામત ફંડ ખાતે રહેલી રકમ રૂા. 12,05,434 બંને મળી રકમ રૂા. 68,07,675નું મંડળીનું ફંડ મંડળીના જવાબદારોએ તેના અંગત તથા સંબંધીઓના લોન ખાતામાં રકમ જમા કરી લઈ ભંડોળની રકમોનું મંડળીના પેટા નિયમ, બેંક લોનની શરતો અને નિયમોનો ભંગ કરી ઉચાપત કરી ઉપરાંત મંડળીના સભાસદોના પગારના કબુલાતનામા આપી રક્ષીત ધીરાણ મેળવનારને રકમ આપવા મંડળીએ સી.સી. ટાઈપની બેંકમાંથી લીધેલી રકમ તા. 28-2-2022ની સ્થિતિએ રકમ રૂા. 2,98,39,906 તથા તેના ઉપર બાકી વ્યાજ બેંકમાં જમા ન કરાવી ઉચાપત કરી મંડળીનું બેંકમાં આવેલી રક્ષીત લોન ખાતા નં. 614124129982થી લોન ખાતુ આવેલી હોય જેમાં મંડળી પાસે બેંકના રૂા. 16,15,44,951 તથા મોર્ગેજ લોન ખાતા નં. 6141241 35237માં રકમ રૂા. 13,44, 05,119 એમ બંને લોનની રકમ મળી કુલ રકમ રૂા. 29,59, 50,070 તા. 31-12-23ની સ્થિતિએ ચડત વ્યાજ સાથે બાકી લેણા હોય જે બાકી લેણામાંથી રકમ રૂા. 12,77, 84,732 બેંક લોન ખાતે જમા ન કરાવી પોતાના તથા સગા પરિવારના અંગત આર્થિક લાભ માટે તેઓના લોન ખાતામાં જમા કરાવી ગુન્હાહીત ઉચાપત કરી વિશ્ર્વાસઘાત તથા છેતરપિંડી કરી અને બનાવટી દસ્તાવેજો બનાવી તે દસ્તાવેજો બનાવટી હોવાનું જાણતા હોવા છતાં તેનો ખરા તરીકે ઉપયોગ કરી બેંકમાં રજૂ કરી ખોટા હિસાબો બનાવી આર્થિક લાભ મેળવી બેંકના તપાસ કરનાર અને આ કામના ફરિયાદી તથા બેંકના અન્ય અધિકારીઓને વધુ કૌભાંડ બહાર ન લાવવા દેવા ગાળો આપી જાનથી મારી નાખવાની ધમકી આપી ગુન્હો આચરનાર એફ.આઈ.આર.માં જણાવેલ આરોપીઓ તથા તપાસના ખુલવા પામે તે તમામ સામે રાજકોટ ડીસ્ટ્રીક્ટ બેંક લી.ના મુખ્ય કચેરીમાં ફરજ બજાવતા મેનેજર (વીજીલન્સ) મગનલાલ ધનજીભાઈ કાછડીયાએ રાજકોટ શહેર ગાંધીગ્રામ પોલીસ સ્ટેશનમાં કુલ 14 આરોપીઓ તથા તપાસમાં ખુલે તે તમામ વિરૂદ્ધ ગુન્હો દાખલ કરાવેલો હતો.
ઉપરોક્ત ગુન્હાના કામે અરૂણસિંહ સજુભા જાડેજા તથા ઉપેન્દ્રસિંહ સજુભા જાડેજા બંનેની આગોતરા જામીન અરજીઓ રદ થયા બાદ બંનેને પોલીસે ધરપકડ કરી 7 દિવસની પોલીસ રિમાન્ડની માગણી સાથે અદાલતમાં રજૂ કરવામાં આવતા ત.ક. અધિકારી તથા ફરિયાદી બેંક વતી રોકાયેલ એડવોકેટ સુરેશ ફળદુ દ્વારા લંબાણપૂર્વકની લેખિત તથા મૌખિક રજૂઆતો કરી રિમાન્ડ રીપોર્ટમાં જણાવ્યા મુજબની પોલીસ કસ્ટડી માટેની માગણી કરતી દલીલો કરવામાં આવી હતી.
તમામ પક્ષેની લેખિત મૌખિક રજૂઆતો તેમજ રેકર્ડ પરનો દસ્તાવેજી પુરાવો વિગેરે લક્ષે લેતાં આરોપીઓને વધુ પોલીસ કસ્ટડીમાં સોંપ્યા સિવાય ગુનાના મૂળ સુધી પહોંચી શકાય તેમ ન હોય જેથી વધુ પોલીસ કસ્ટડીના રિમાન્ડની માગણી યોગ્ય હોવાનું માની બંને આરોપીઓને 4 દિવસની પોલીસ રિમાન્ડ ઉપર સોંપતો હુકમ ફરમાવેલો છે.

ઉપરોક્ત કામમાં ફરિયાદી આર.ડી.સી. બેંક વતી રાજકોટના એડવોકેટ સુરેશ આર. ફળદુ, ભુવનેશ શાહી, કુણાલ શાહી, રીપલ ગેવરીયા, પાર્થ સંઘાણી, મંથન વીરડીયા, કિશન માંડલીયા, ભાવીક ફેફર, જય પીઠવા તથા મદદમાં યુવરાજ વેકરીયા, નીરવ દોંગા, પ્રીન્સ રામાણી, આર્યન કોરાટ, જસ્મીન દુધાગ્રા તથા અભય સભાયા રોકાયેલા હતા.