રાજકોટ મહાનગરપાલિકાનું 2637.80 કરોડનું બજેટ મંજૂર

પાણી વેરો 840ના બદલે 1500, રૈયા ટેલિ. એક્સચેન્જ ચોકમાં ઓવરબ્રિજ બનશે

સિનેમા ટેક્સમાં પ્રતિ શો દીઠ 100થી વધારી 125 રૂપિયા કરાયા: ઘરે ઘરે કચરા એકત્રીકરણનો ચાર્જ રૂ.365 વાર્ષિક યથાવત્

15 નવી જોગવાઈ: તહેવારોમાં ગાંધી મ્યુઝીયમમાં બાળકોને અને રામનવમીએ રામવનમાં બાળકો અને વૃદ્ધોને નિ:શુલ્ક પ્રવેશ

ખાસ-ખબર સંવાદદાતા
રાજકોટ મહાનગરપાલિકાનું 2637.80 કરોડનું બજેટ મંજૂર કરવામાં આવ્યું છે. નાણાકીય વર્ષ 2023-24નું 2586.82 કરોડનું ડ્રાફ્ટ બજેટ સ્ટેન્ડિંગ કમિટી સમક્ષ મ્યુનિસિપલ કમિશનર અમિત અરોરા દ્વારા રજૂ કરવામાં આવ્યું હતું. જેનો અભ્યાસ કરી સ્ટેન્ડિંગ કમિટી દ્વારા આજે 2637.80 કરોડનું બજેટ મંજૂર કરવામાં આવ્યું છે. મનપા કમિશનરે સૂચવેલા 101 કરોડના કરબોજમાં 60.39 કરોડનો ઘટાડો કરી શાસકોએ 39.97 કરોડનો કરબોજ જનતા પર મૂક્યો છે. જેમાં પાણીવેરો બમણો કરી 840ના બદલે 1500 રૂપિયા લેવા નિર્ણય કરવામાં આવ્યો છે. તેમજ બિનરહેણાંક એટલે કે કોમર્શિયલમાં રૂ.1680ના બદલે રૂ.3000નું પાણી બિલ ચૂકવવું પડશે.. 10 કરોડના ખર્ચે રૈયા ટેલિફોન એક્સચેન્જ ચોકમાં ઓવરબ્રિજ બનશે.

જ્યારે તહેવારોમાં ગાંધી મ્યુઝીયમમાં બાળકોને મફ્ત અને રામનવમીએ રામવનમાં બાળકો અને વૃદ્ધોને નિ:શુલ્ક પ્રવેશ અપાશે. સ્ટેન્ડિંગ કમિટીના ચેરમેન પુષ્કર પટેલના અધ્યક્ષ સ્થાને સ્થાયી સમિતિની બેઠક મળી હતી. જેમાં પાણીવેરો ડબલ કરવાને મંજૂરી આપવામાં આવી છે. કમિશનરે સ્માર્ટ સિટીના લોકો પર પાણી વેરો ત્રણ ગણો કરવા પ્રસ્તાવ મૂક્યો હતો. જેને હળવો કરવામાં આવ્યો છે. બીજી તરફ મિલકત વેરામાં કોઈ વધારો સ્ટેન્ડિંગ કમિટી દ્વારા મંજૂર કરવામાં આવ્યો નથી. જ્યારે ડોર ટુ ગાર્બેજ કલેક્શનમાં રહેણાંક ઉપયોગમાં કોઈ વધારો કરવામાં આવ્યો નથી. પરંતુ વ્યાપાર ઉપયોગી ગાર્બેજ કલેક્શનમાં કમિશનર દ્વારા સૂચવેલો વધારો માન્ય રાખી 730થી વધારી બમણો કરી 1460 રૂપિયા મંજૂર કરવામાં આવ્યો છે.

કચરા એકત્રિકરણનો ચાર્જ 365 યથાવત્
રહેણાંક મિલકતમાં ઘરે ઘરે કચરા એકત્રિકરણનો ચાર્જ રૂ.365 વાર્ષિક યથાવત રાખીને રહેણાંક મિલકતના ટેક્સમાં પણ કોઈ વધારો મંજૂર કર્યો નથી તેમ ભાજપના પદાધિકારીએ જણાવ્યું હતું. પુરવઠા યોજના, શહેરમાં પાણી વિતરણના ખર્ચ વગેરેને ધ્યાનમાં લઈને કમિશનર દ્વારા મિલકત વેરા, પાણી ચાર્જિસમાં સૂચવાયેલા વધારામાં રાહત આપવાનો નિર્ણય કર્યો છે.

-39.25 કરોડ ખર્ચે ઉમેરેલી નવી 15 યોજના
-મોટામવા સ્મશાન પાસે 6 કરોડના ખર્ચે વાહન પાર્કિંગ વ્યવસ્થા
-1.50 કરોડના ખર્ચે ઉપલાકાંઠે વોકિંગ ટ્રેક અને પ્લે ગ્રાઉન્ડ
-1 કરોડના ખર્ચે રાજકોટ દર્શન સિટી બસ
– 5 કરોડના ખર્ચે ડસ્ટ ફ્રી રોડ
– 2 કરોડ યુનિફોર્મ આઇડેન્ટીટી માટે વપરાશે
– 50 લાખના ખર્ચે ઝોન ઓફિસોમાં હેલ્પ ડેસ્ક

-76 લાખના ખર્ચે સ્માર્ટ સ્કૂલ
-5 કરોડના ખર્ચે પ્રાથમિક શાળાઓમાં કલરકામ
-1.50 કરોડના ખર્ચે ઝોનદીઠ એક બોક્સ ટેનિસ ક્રિકેટ
– 5 કરોડના ખર્ચે શહેરના કોઈ એક વોર્ડમાં કોમ્યુનિટી હોલ

સિનેમા ટેક્સમાં પ્રતિ શો 125 રૂપિયા વસૂલાશે
સિનેમા ટેક્સમાં પ્રતિ શો દીઠ 100 રૂપિયા વધારી 1000 કરવા સૂચન કરવામાં આવ્યું હતું. પરંતુ સ્ટેન્ડિંગ કમિટી દ્વારા 125 રૂપિયા વસૂલવા મંજુર નિર્ણય કરવામાં આવ્યો છે.

મનીષ રાડીયાએ પુષ્કર પટેલને શુભકામના પાઠવી

ખાસ-ખબર સંવાદદાતા
આજે સ્ટેન્ડિંગ કમિટી દ્વારા આજે 2637.80 કરોડનું રાજકોટ મહાપાલિકાનું બજેટ મંજૂર કરવામાં આવ્યું છે. મનપા કમિશનરે સૂચવેલા 101 કરોડના કરબોજમાં 60.39 કરોડનો ઘટાડો કરી શાસકોએ 39.97 કરોડનો કરબોજ જનતા પર મૂક્યો છે. જેમાં પાણીવેરો બમણો કરી 840ના બદલે 1500 રૂપિયા લેવા નિર્ણય કરવામાં આવ્યો છે. કોર્પોરેટર અને સ્ટેન્ડિંગ કમિટીના સભ્ય મનીષ રાડીયાએ પુષ્કર પટેલને બજેટની શુભકામના પાઠવી હતી.