મનપા દ્વારા રક્ષાબંધન પર સિટી અને ઇછઝજ બસમાં મહિલાઓને નિ:શુલ્ક મુસાફરીની ભેટ અપાઈ
ખાસ-ખબર ન્યૂઝ રાજકોટ
દેશભરમાં આજે રક્ષાબંધનના તહેવારની ઉજવણી કરવામાં આવી રહી છે. ત્યારે રાજકોટ મહાપાલિકાના પદાધિકારીઓ દ્વારા આજે મનપા સંચાલિત સિટી બસો અને બીઆરટીએસ બસોમાં મહિલાઓ માટે તદ્દન ફ્રીમાં મુસાફરીની ભેટ આપવામાં આવી છે. સવારથી શહેરના અલગ અલગ રૂટો ઉપર મોટા પ્રમાણમાં મહિલાઓએ મનપાની આ ભેટનો આનંદ ઉઠાવ્યો હતો. અને નિ:શુલ્ક મુસાફરી કરી મનપાની આ વ્યવસ્થાની ભારોભાર પ્રશંસા કરી હતી. આજે બપોર સુધીમાં વિવિધ રૂટ ઉપર મળી અંદાજે 400 કરતા વધુ મહિલાઓ આ સુવિધાનો લાભ લઇ ચુકી છે. અને સાંજ સુધીમાં કદાચ 1000થી વધુ બહેનો આ સુવિધાનો લાભ ઉઠાવે તેવી શક્યતા છે.
સિટી બસમાં નિ:શુલ્ક મુસાફરીનો લાભ લેનાર મહિલા રંજનબેન વાછાણીએ જણાવ્યું હતું કે, રાજકોટ મહાનગરપાલિકા દ્વારા આજે રક્ષાબંધન તહેવાર નિમિત્તે બહેનોને મુસાફરીનો લાભ અપાઈ રહ્યો છે, તે ખૂબ સારી બાબત છે. મનપાની આ સુવિધાથી ભાઈ પાસે જતી બહેનોને મોટી મદદ મળે છે. અને ખૂબ દૂર રહેતી બહેનો પણ ભાઈ પાસે સરળતાથી પહોંચી શકે છે. કોર્પોરેશન દ્વારા રક્ષાબંધન ઉપરાંત ભાઈબીજ અને મહિલા દિવસે પણ આ ખાસ ભેટ આપવામાં આવે છે. જેનો શહેરની મહિલાઓ મોટી સંખ્યામાં લાભ લે છે.
- Advertisement -
અન્ય મહિલા પારૂલબેનના જણાવ્યા મુજબ આ સેવા ખરેખર ખૂબ સારી અને મહિલાઓ માટે આશીર્વાદરૂપ છે. ચાર-પાંચ ભાઈઓ હોય તો તેને રાખડી બાંધવા માટે અલગ-અલગ સ્થળે જવું પડતું હોય છે. ત્યારે આ સેવાને કારણે બહેનોને ટિકિટ ભાડાની બચત થાય છે. અને એક સ્થળેથી બીજા સ્થળે પહોંચવામાં સરળતા રહે છે. મનપા દ્વારા રક્ષાબંધનની સાથે-સાથે ભાઈબીજ અને મહિલા દિવસે પણ આ સુવિધા આપવામાં આવે છે. જેનો મોટી સંખ્યામાં બહેનો લાભ લે છે. જોકે આમ છતાં ખાસ કોઈ ભીડનો સામનો ન કરવો પડે તે માટેની વ્યવસ્થા પણ મહાનગરપાલિકા દ્વારા કરવામાં આવી છે. જે ખરેખર પ્રશંસનીય બાબત છે.
