T20 વર્લ્ડ કપ 2026ની ભારત-પાકિસ્તાન વચ્ચેની હાઈ-વેલ્ટેજ મેચમાં ભારત સામે પાકિસ્તાનને કારમી હાર મળી છે. આ સાથે જ ભારતીય ટીમે T20 વર્લ્ડ કપમાં પાકિસ્તાન સામે આઠ મેચ જીતી લીધી છે. આ કોઈ એક ટીમ સામે T20 વર્લ્ડ કપમાં સૌથી વધુ જીતનો રેકોર્ડ છે. ભારતે અત્યાર સુધીમાં પાકિસ્તાન સામે કુલ નવ મેચ રમી છે, જેમાંથી આઠમાં જીત હાંસલ કરી છે. ભારતે આમાંથી એક મેચ સુપર ઓવરમાં જીતી હતી. બીજી તરફ પાકિસ્તાને 2021માં ભારત સામે પોતાની એકમાત્ર T20 વર્લ્ડ કપ મેચ જીતી છે.
T20 વર્લ્ડ કપમાં કોઈ વિરોધી ટીમ સામે સૌથી વધુ જીત હાંસલ કરવાના મામલે ઓસ્ટ્રેલિયા (vs બાંગ્લાદેશ), પાકિસ્તાન (vs બાંગ્લાદેશ), શ્રીલંકા (vs વેસ્ટ ઈન્ડિઝ) અને વેસ્ટ ઈન્ડિઝ (vs ઇંગ્લેન્ડ) સંયુક્ત રીતે બીજા સ્થાને છે.
- Advertisement -
આ મહામુકાબલો શ્રીલંકાના કોલંબોના આર.પ્રેમદાસા સ્ટેડિયમમાં રમાયો હતો. જ્યાં પાકિસ્તાને ટોસ જીતીને ભારતને પહેલા બેટિંગ આપી હતી. ભારતે પહેલા બેટિંગ કરતા 20 ઓવરમાં 7 વિકેટના નુકસાન પર 175 રન બનાવ્યા હતા. ભારતે પાકિસ્તાનને 176 રનનો ટાર્ગેટ આપ્યો હતો. જેના જવાબમાં પાકિસ્તાનની ટીમ 18 ઓવરમાં માત્ર 114 રન પર ઓલઆઉટ થઈ ગઈ. આમ, ભારતની 61 રનથી ભવ્ય જીત થઈ છે. આ જીત સાથે જ ભારતીય ટીમ સુપર-8માં પણ ક્વોલિફાય કરી ગઈ છે. 77 રન ફટકારનારો ઈશાન કિશન મેન ઓફ ધ મેચ બન્યો છે.
ભારતીય ટીમ સુપર-8 માટે ક્વોલિફાય
T20 વર્લ્ડ કપ 2026માં સતત ત્રીજી જીત સાથે ભારતીય ટીમે સુપર-8 માટે ક્વોલિફાય કરી લીધું છે. ટીમ ઈન્ડિયાએ USA સામેની પોતાની પહેલી મેચ 29 રનથી જીતી હતી. ત્યારબાદ નામિબિયાને 93 રનથી હરાવ્યું હતું. ભારતીય ટીમ હવે 18 ફેબ્રુઆરીએ નેધરલેન્ડ્સ સામે પોતાની છેલ્લી ગ્રુપ મેચ રમશે.
- Advertisement -
ભારત સામે મળેલી આ કારમી હાર સાથે જ પાકિસ્તાન ગ્રુપ A પોઈન્ટ ટેબલમાં ત્રીજા સ્થાને સરકી ગયું છે. નેધરલેન્ડ અને USAને હરાવ્યા બાદ પાકિસ્તાન ભારત સામે પોતાનો મુકાબલો હારી ગયું. હવે પાકિસ્તાનથી ઉપર USAની ટીમ છે, જેણે 4માંથી બે મેચ પોતાના નામે કરી છે. હવે પાકિસ્તાનને સુપર-8માં પહોંચવા માટે નામિબિયા સામેનો પોતાનો મુકાબલો જીતવો પડશે. આ મેચ 18 ફેબ્રુઆરીએ રમાશે.
