ડારે કહ્યું કે તેમણે આ સંદેશ યુએસ સેક્રેટરી ઓફ સ્ટેટ માર્કો રુબિયોને આપ્યો હતો જ્યારે તેમણે નવી દિલ્હી સાથે વાત કર્યા પછી તેમનો સંપર્ક કર્યો હતો.
ભારત અને પાકિસ્તાન વચ્ચે વધી રહેલા લશ્કરી તણાવ વચ્ચે, પાકિસ્તાનના વિદેશ પ્રધાન ઇશાક ડારે શનિવારે કહ્યું હતું કે જો ભારત વધુ કોઈ હુમલો નહીં કરે, તો પાકિસ્તાન પરિસ્થિતિને શાંત કરવા પર વિચાર કરશે. જોકે, તેમણે એ પણ સ્પષ્ટ કર્યું કે જો ભારત કોઈ નવો હુમલો કરશે તો અમારો જવાબ ચોક્કસ આપવામાં આવશે. ડારે પાકિસ્તાની ન્યૂઝ ચેનલ જીઓ ન્યૂઝને આપેલા ઇન્ટરવ્યુમાં કહ્યું, “અમે જવાબ આપ્યો કારણ કે અમારી ધીરજ ખૂટી ગઈ હતી. જો ભારત અહીં રોકાય છે, તો અમે પણ રોકવાનું વિચારી શકીએ છીએ.”
- Advertisement -
ડારે એમ પણ કહ્યું કે આ સંદેશ અમે અમેરિકન વિદેશ મંત્રી માર્કો રુબિયોને પણ પહોંચતો કર્યો છે. ભારતના વિદેશ મંત્રી એસ. જયશંકર સાથે વાત કર્યાના બે કલાક પછી રૂબિયોએ તેમને ફોન કર્યો હતો. આ નિવેદન એવા સમયે આવ્યું છે જ્યારે ભારતે ‘ઓપરેશન સિંદૂર’ હેઠળ પાકિસ્તાન અને પીઓકેમાં નવ આતંકવાદી ઠેકાણાઓને નિશાન બનાવ્યા છે. આ જવાબી કાર્યવાહી 22 એપ્રિલના રોજ પહેલગામમાં થયેલા આતંકવાદી હુમલા બાદ કરવામાં આવી હતી, જેમાં 26 નિર્દોષ લોકો માર્યા ગયા હતા.
ડારના વલણમાં આ નરમાઈ અમેરિકા દ્વારા બંને દેશોને તણાવ ઓછો કરવા અને સીધી વાતચીત કરવાની અપીલ બાદ આવી છે.
પાકિસ્તાને સરહદી વિસ્તારોમાં સેના મોકલી
અગાઉ, ભારત અને પાકિસ્તાન દ્વારા એકબીજાના લશ્કરી સ્થાપનો પર સતત હુમલાઓ વચ્ચે, ભારતે શનિવારે કહ્યું હતું કે પાકિસ્તાની સેના તેના સૈનિકોને સરહદી વિસ્તારોમાં ખસેડી રહી છે. આ સાથે સંઘર્ષ ખતરનાક રીતે વધી રહ્યો છે. વિંગ કમાન્ડર વ્યોમિકા સિંહ અને વિદેશ સચિવ વિક્રમ મિશ્રી સાથે એક પત્રકાર પરિષદને સંબોધતા કર્નલ સોફિયા કુરેશીએ કહ્યું, “એવું જોવા મળ્યું છે કે પાકિસ્તાની સેના તેના સૈનિકોને સરહદી વિસ્તારોમાં ખસેડી રહી છે.” તેમણે કહ્યું કે પાકિસ્તાને પંજાબમાં હાઇ-સ્પીડ મિસાઇલો ચલાવી અને શ્રીનગર, અવંતિપુરા અને ઉધમપુરમાં તબીબી સુવિધાઓ પર હુમલો કર્યો.
- Advertisement -
કુરેશીએ કહ્યું, “પાકિસ્તાની કાર્યવાહીનો યોગ્ય જવાબ આપવામાં આવ્યો છે.” તેમણે કહ્યું, “પાકિસ્તાની સેનાએ પંજાબમાં વાયુસેનાના મથકને નિશાન બનાવવા માટે રાત્રે 1:40 વાગ્યે હાઇ-સ્પીડ મિસાઇલોનો ઉપયોગ કર્યો.” કુરેશીએ કહ્યું કે પાકિસ્તાને પશ્ચિમી સરહદ પર ભારતીય લશ્કરી સ્થળો પર હુમલો કરવા માટે ડ્રોન, લાંબા અંતરના શસ્ત્રો, દારૂગોળો અને જેટ વિમાનોનો ઉપયોગ કર્યો હતો.
