મહારાષ્ટ્રના ભંડારામાં ઓર્ડનન્સ ફેક્ટરીમાં પ્રચંડ વિસ્ફોટ: પાંચ લોકોના મોત, અનેક ઘાયલ થયા

મહારાષ્ટ્રના ભંડારામાં ઓર્ડનન્સ ફેક્ટરીમાં એક મોટો વિસ્ફોટ થયો છે, જેના કારણે ભયાનક પરિસ્થિતિ સર્જાઈ છે. આ વિસ્ફોટમાં 5 લોકોના મોત થયા છે. મૃત્યુઆંક વધવાની શક્યતા છે.

મહારાષ્ટ્રમાંથી એક મોટા સમાચાર સામે આવ્યા છે. અહીં ભંડારા ખાતે આવેલી એક ઓર્ડિનન્સ ફેક્ટરીમાં જોરદાર વિસ્ફોટ થયો હતો. આ બ્લાસ્ટમાં અત્યાર સુધીમાં 5 લોકોના મોતના અહેવાલ સામે આવ્યા છે. જ્યારે અનેક લોકો હજુ કંપનીમાં ફસાયા હોવાની જાણકારી છે. ઘટનાની માહિતી મળતાં જ ફાયરબ્રિગેડ અને પોલીસ ટુકડી ઘટનાસ્થળે ધસી આવી હતી અને બચાવ કામગીરી શરૂ કરી દેવામાં આવી હતી.

દૂર દૂર સુધી વિસ્ફોટનો અવાજ સંભળાતા ફફડાટ

બ્લાસ્ટ એટલો ભયાનક હતો કે દૂર-દૂર સુધી તેનો અવાજ સંભળાતા લોકો ફફડી ગયા હતા. ભંડારા મહારાષ્ટ્રના વિદર્ભ વિસ્તારમાં આવે છે. અહીં જવાહરનગર વિસ્તારમાં ઓર્ડિનન્સ ફેક્ટરી આવેલી છે. બ્લાસ્ટને કારણે કંપનીમાં આગ લાગી હોવાની પણ જાણકારી મળી રહી છે.