SOG ટીમે 3.331 કિલો પોશડોડાના જથ્થા સાથે હોટલ સંચાલકની ધરપકડ કરી
ખાસ-ખબર સંવાદદાતા
હળવદ-ધ્રાંગધા હાઈવે ઉપર સુખપર ગામ પાસે આવેલ બાબા રામદેવ હોટલના સંચાલકને 331 ગ્રામ પોશડોડાના જથ્થા સાથે સ્પેશિયલ ઓપરેશન ગ્રુપની ટીમે ઝડપી પાડીને આગળની ધોરણસરની કાર્યવાહી હાથ ધરી છે. મોરબી એસઓજીની ટીમને બાતમી મળી હતી કે, હળવદથી ધ્રાંગધા જતા રોડની જમણી સાઇડ ઉપર સુખપર ગામની સીમમાં આવેલ બાબા રામદેવ નામની હોટલના સંચાલક કરારામ લીછમનારામ ચૌધરી પોતાના કબજા ભોગવટાવાળી બાબા રામદેવ હોટલમાં ગેરકાયદેસર રીતે માદક પદાર્થ પોશડોડાનો જથ્થો પોતાના કબજામાં રાખી તેના ગ્રાહકોને ખાનગીમાં વેચાણ કરે છે જેના આધારે એસઓજી ટીમે દરોડો પાડીને હોટેલ સંચાલકને રૂ. 9993 ની કિંમતના ત્રણ કિલો 331 ગ્રામ પોશડોડાના જથ્થા સાથે ઝડપી પાડીને તેના વિરુદ્ધ એન.ડી.પી.એસ. એક્ટની કલમ-8(સી), 15(બી) મુજબની કાર્યવાહી કરી હળવદ પોલીસ સ્ટેશનમાં ગુનો દાખલ કરાવ્યો હતો.
