બાર કાઉન્સીલની હડતાળના લીધે કાર્ટની કામગીરીમાં અવરોધ: સુપ્રિમ કોર્ટએ કરી આકરી ઝાટકણી

-છેલ્લા એક વર્ષની હડતાળનો હિસાબ મંગાવ્યો

સુપ્રીમ કોર્ટે સોમવારે કડક શબ્દોમાં જણાવ્યું છે કે, કોર્ટની કામગીરી અટકાવવી સ્વીકાર્ય નથી. કોર્ટે બાર કાઉન્સિલ ઓફ ઇન્ડિયા (બીસીઆઇ) ને છેલ્લા એક વર્ષમાં વિવિધ બાર એસોસિએશનની હડતાલો સામે લેવાયેલા પગલાંનો અહેવાલ સુપરત કરવા જણાવ્યું છે. એનજીઓ ‘કોમન કોઝ’ની બદનક્ષી અંગેની અરજી મુદ્દે સુનાવણી કરતી વખતે સુપ્રીમ કોર્ટે આવી ટિપ્પણી કરી હતી.

‘કોમન કોઝ’ની અરજીમાં સુપ્રીમ કોર્ટના આદેશનું ઉલ્લંઘન કરી વકીલો હડતાલ પર ગયા હોવાની ફરિયાદ કરવામાં આવી હતી.સુપ્રીમ કોર્ટે જણાવ્યું હતું કે, મૂળ મુદ્દો એ છે કે કોર્ટની કામગીરીને અસર થવી જોઇએ નહીં.” જજ એસ કે કૌલ અને સુધાંશુ ધુલિયાની બેન્ચે જણાવ્યું હતું કે, ન્યાયની પ્રક્રિયા અટકાવી શકાય નહીં. કેસની મોટી સંખ્યાને કારણે લોકોને જામીન મળતા નથી. કામગીરી અટકે ત્યારે કોર્ટ્સ માટે બંધ રહેલા સમયના કેસને સમાવવાની વ્યવહારિક સમસ્યા ઊભી થાય છે.”

કોર્ટે બાર કાઉન્સિલને જણાવ્યું હતું કે, તમે જ્યારે કામ અટકાવો છો ત્યારે એ બાબત સ્વીકાર્ય નથી.’ બીસીઆઇના ચેરમેન અને સિનિયર એડવોકેટ મનન કુમારે બેન્ચને જણાવ્યું હતું કે, બાર કાઉન્સિલના ટોચના સંગઠને આ મુદ્દે નિયમ તૈયાર કર્યા છે. એનજીઓ વતી એડવોકેટ પ્રશાંત ભુષણે જણાવ્યું હતું કે, તેમને નિયમોની નકલ મળી નથી અને આજે પણ દિલ્હી હાઇકોર્ટમાં વકીલોની હડતાલ ચાલી રહી છે.

સુપ્રીમ કોર્ટની બેન્ચે બાર કાઉન્સિલ ઓફ ઇન્ડિયાને બે સપ્તાહમાં એફિડેવિટ ફાઇલ કરવાનો આદેશ આપ્યો હતો. જેમાં બાર એસોસિએશન્સે છેલ્લા એક વર્ષમાં હડતાલ પાડી છે કે નહીં અને તેમનીસામે લેવાયેલા પગલાંની માહિતી આપવા જણાવાયું હતું. ઉલ્લેખનીય છે કે, જાન્યુઆરીમાં સુપ્રીમ કોર્ટે જે તે રાજ્યોમાં વકીલોને હડતાલ પર જતા અટકાવવા કોઈ નક્કર યોજના ઘડવામાં થઈ રહેલા વિલંબ અંગે ચેતવ્યા હતા.