સંકટ વચ્ચે શરણાર્થીઓની મદદ માટે તેણે વર્લ્ડ લીડર્સને આગળ આવવાની વિનંતી કરી
પ્રિયંકા ચોપડા જોનસે યુક્રેનમાં ચાલી રહેલી હિંસા વચ્ચે શરણાર્થીઓને મદદ કરવામાં આવે એવી વિનંતી વર્લ્ડ લીડર્સને કરી છે. રશિયાએ યુક્રેનમાં હુમલો કરીને ભારે વિનાશ વેર્યો છે. અનેક નાગરિકો આ હિંસાનો ભોગ બન્યા છે.
પ્રિયંકા યુનિસેફની ગુડવિલ ઍમ્બેસેડર છે. તેણે અપીલ કરી છે કે ઈસ્ટર્ન યુરોપમાં જે લોકો યુક્રેનથી આવેલા લોકોની મદદ કરે છે એ બધાને આ નેક કામમાં સાથ-સહકાર આપવો જોઈએ. આ વિનંતી કરતો એક વિડિયો પ્રિયંકાએ ઇન્સ્ટાગ્રામ પર શેર કર્યો છે. એ વિડિયોમાં પ્રિયંકા કહી રહી છે.
‘વલ્ર્ડ લીડર્સ, હું તમને અપીલ કરી રહી છું કે ઈસ્ટર્ન યુરોપમાં કાર્યકરો અને ઍડ્વોકેટ્સ માનવતાની દૃષ્ટિએ કામ કરી રહ્યા છે તેમને મદદ કરવી જોઈએ. શરણાર્થીઓના સંકટને આપણે મૂકદર્શક બનીને જોઈ રહ્યા છીએ. યુક્રેનથી વિશ્વભરમાં આવેલા લોકોને વહેલાસર મદદ કરવી જોઈએ. યુક્રેનમાં લગભગ 2.5 મિલ્યન બાળકો ગુમ થઈ ગયાં છે, જે બીજા વિશ્ર્વયુદ્ધ બાદ સૌથી ઝડપથી વધતો આંકડો છે. આ આંકડો ખરેખર ચોંકાવનારો છે. ત્યાંની સ્થિતિ ખૂબ ભયાનક છે.
- Advertisement -
આ બાળકોએ જે જોયું અને જે અનુભવ્યું એથી હવે તેઓ પહેલાં જેવાં નહીં રહે. એથી યુકે, જર્મની, જપાન, નોર્વે અને ઑસ્ટ્રેલિયાના લીડર્સ, તમે લોકો ક્યારે આ દિશામાં ચર્ચા કરશો, માનવતાના કલ્યાણ માટે કેટલું ભંડોળ આપશો, શું તમે બધી બાજુના શરણાર્થીઓને પીઠબળ આપશો? શું તેમને જરૂરી એવા બિલ્યન્સનું યોગદાન આપશો? જે લોકો આના વિડિયો જોઈ રહ્યા છે તેઓ એને પ્રસરાવે, તમારી જાતને પોસ્ટ કરો, કાર્યકરોના વિડિયો શેર કરો અથવા તો આ વિડિયો શેર કરો, જેથી વર્લ્ડ લીડર્સ પણ જાણી શકે કે આખા વિશ્વએ આગળ આવીને આ શરણાર્થીઓની મદદ કરવાની છે. આ અત્યાર સુધીનું સૌથી મોટું શરણાર્થીઓનું સંકટ છે.’
