રાજકોટ-સુરતની ગેન્ગ વચ્ચે ઈન્સ્ટાગ્રામ પોસ્ટ મુદ્દે લોહિયાળ જંગ

સોશિયલ મીડિયાની પોસ્ટ મુદ્દે ગેન્ગવૉર

ઈન્સ્ટાગ્રામ, ફેસબૂક જેવાં માધ્યમો આમ તો આનંદ માણવા અને જૂનાં સંપર્કો જીવંત કરવા બનાવાયા છે. પરંતુ ધીમેધીમે હવે આવા પ્લેટફોર્મ પર ગામ આખાનો એઠવાડ ઠલવાઈ રહ્યો છે. ઈન્સ્ટાગ્રામ અને ફેસબૂક પર તો દુનિયાભરનાં લુખ્ખાઓ એક્ટિવ છે. આવી જ બે લુખ્ખી ગેન્ગ હવે જંગે ચડી છે. ઈન્સ્ટાગ્રામમાં થયેલી ચડભડને કારણે રાજકોટનાં લુખ્ખેશો અને સુરતનાં લુખ્ખેશો વચ્ચે ગેન્ગવોર ફાટી નીકળી છે.

રાજકોટનાં લુખ્ખા જયેશ ડાંગર સહિતના 20 લુખ્ખાએ સુરત જઈ લુખ્ખા નિક ઓડેદરાને ઢોર માર માર્યો 

લુખ્ખા નિક ઓડેદરાની ઓપન ચેલેન્જ
રાજકોટમાં બૂમ ન પડે તો ઈન્સ્ટાગ્રામ લાઈવમાં
હું મારી જાતને સાપ કરડાવીને મરી જઈશ

જયેશ ડાંગર અને સાગરિતો એક પોલીસ કોન્સ્ટેબલની ગાડીમાં સુરત ગયા હતા!
કહેવાય છે કે, નિક ઓડેદરાને ઢીબવા માટે જયેશ ડાંગર વીસેક લુખ્ખાઓ લઈ ગયો હતો. ચર્ચા એવી પણ છે કે, આ ટોળકીને એક વિવાદાસ્પદ પોલીસ કોન્સ્ટેબલે પોતાની નવેનવી ક્રેટા કાર આપી હતી. વિડીયો શૂટિંગમાં પણ આ બ્લેક કલરની ક્રેટા આવી ન જાય તે માટે ખાસ ખ્યાલ રાખવામાં આવ્યો હતો.

આ વૉર અનુસંધાને રાજકોટનાં કૂખ્યાત લુખ્ખા જયેશ ડાંગરે સુરતનાં લુખ્ખા નિક ઓડેદરાને ઠેઠ સુરત જઈને ઢોરમાર માર્યો હતો. રાજકોટથી જયેશ તેનાં વીસેક સાગરીતોને લઈને સુરત ગયો હતો. અને ત્યાં જઈને નિક ઓડેદરાને બેફામ ઢોરમાર માર્યો હતો.

ઈન્સ્ટાગ્રામમાં આ મામલો દિવસોથી સળગતો હતો. બેઉ લુખ્ખાઓ એકબીજાને હાકલાં-પડકારા કરતા હતા. સુરતનાં નિક ઓડેદરાએ રાજકોટનાં જયેશ ડાંગરને સુરત આવવાનો પડકાર ફેંક્યો હતો. આવા હાકલાં-પડકારા ઘણી વખત થયા હતા, બે દિવસ પહેલાં જયેશે પડકાર ઝીલી લીધો હતો અને વીસેક લુખ્ખાઓને લઈને નિક ઓડેદરાએ કહેલા સ્થળે પહોંચી ગયો હતો. ત્યાં જઈ તેમણે નિકને ઢીબી નાખ્યો હતો. તેને ઉઠાવીને અપહરણ કરીને કોઈ અજ્ઞાત સ્થળે લઈ જવાયો હતો અને ત્યાં તેના કપડાં ઉતારીને તેને માર માર્યો હતો.

જો કે, આ મામલો અહીં જ પૂરો નથી થયો. નિક ઓડેદરાની લુખ્ખા ટોળકી પણ હવે જયેશને ભરી પીવા તૈયાર છે. આવનારા દિવસોમાં આ ગેન્ગવોર લોહિયાળ બને તેવી સંભાવના છે.

નિક ઓડેદરા પણ અપલખ્ખણો માટે કૂખ્યાત!
સુરતનાં જે શખ્સને રાજકોટની લુખ્ખેશ ગેન્ગએ ઢોરમાર માર્યો એ નિક ઓડેદરા પણ ઓછી માયા નથી. પોતાનાં અપલખ્ખણો માટે એ કૂખ્યાત છે. ઈન્સ્ટા પર ગન સાથે સીનસપાટા કરતા તેનાં અનેક વિડીયોઝ છે. સાપનો શોખીન નિક અગાઉ કોઈને પરાણે સાપ કરડાવવા પ્રયત્ન કરતો હોય તેવો વિડીયો પણ ન્યૂઝ ચેનલોમાં આવ્યો હતો.