ચીને LAC પર સૈનિકોની સંખ્યા ઘટાડીઃ રક્ષા મંત્રાલયનો રિપોર્ટ

જમ્મુ-કાશ્મીરમાં હિંસા અને પથ્થરમારાની ઘટના પણ ઓછી થઈ

ચીનની પીપલ્સ લિબરેશન આર્મી (PLA) એ ૨૦૨૫માં ઉત્તરીય સરહદ પર પોતાની તૈનાતી ઘટાડી છે. ભારતના સંરક્ષણ મંત્રાલયના ૨૦૨૫-૨૬ના અહેવાલ મુજબ, આ હોવા છતાં LACના તમામ સેક્ટરમાં ભારતીય સેનાની તૈનાતી મજબૂત રહી અને સેના કોઈપણ પડકારનો સામનો કરવા તૈયાર છે. અહેવાલમાં જમ્મુ-કાશ્મીરની સુરક્ષા સ્થિતિમાં પણ સુધારાની વાત કહેવામાં આવી છે. સેનાના જણાવ્યા મુજબ, ત્યાં હિંસા અને વિરોધ-પ્રદર્શનો ઓછા થયા અને પથ્થરમારાની ઘટનાઓ શૂન્ય રહી. જમ્મુ-કાશ્મીરના લોકો સરકાર અને સેનાની વિકાસ સંબંધિત પહેલોમાં પણ સક્રિયપણે ભાગ લઈ રહ્યા છે.
અહેવાલ મુજબ, ચીનની PLA એ LAC સામે અને પોતાના પરંપરાગત સૈન્ય તાલીમ વિસ્તારોમાં ૧૦ કમ્બાઈન્ડ આર્મ્સ બ્રિગેડના કદની સૈન્ય ટુકડીઓ તૈનાત રાખી. કમ્બાઈન્ડ આર્મ્સ બ્રિગેડમાં અલગ-અલગ સૈન્ય ક્ષમતાઓ એકસાથે કામ કરે છે. અહેવાલમાં કહેવામાં આવ્યું છે કે કઅઈના તમામ સેક્ટરમાં ભારતીય સેનાની તૈનાતી મજબૂત છે અને સેના કોઈપણ ઉભરતા પડકારનો સામનો કરવા તૈયાર છે. રિપોર્ટ અનુસાર, ભારત અને ચીન વચ્ચે રાજકીય, રાજદ્વારી અને સૈન્ય સ્તરે વાતચીતથી ઉત્તરીય સરહદ પર સ્થિરતા આવી. ૨૦૨૫માં બંને દેશો વચ્ચે વાતચીત ફરી તેજ બની. માર્ચ અને જુલાઈ ૨૦૨૫માં વર્કિંગ મિકેનિઝમ ફોર કન્સલ્ટેશન એન્ડ કોઓર્ડિનેશન (WMCC)ની ૨૩મી અને ૨૪મી બેઠક યોજાઈ. ભારત-ચીન સરહદ વિવાદ પર વિશેષ પ્રતિનિધિઓની વાતચીત પણ ફરી શરૂ થઈ. ડિસેમ્બર ૨૦૨૪ અને ઓગસ્ટ ૨૦૨૫માં તેના બે રાઉન્ડ થયા.
રિપોર્ટ મુજબ, ઓગસ્ટ ૨૦૨૫માં વડાપ્રધાન નરેન્દ્ર મોદીની ચીન યાત્રા દરમિયાન પણ બંને દેશોના સંબંધોમાં સકારાત્મક માહોલ જોવા મળ્યો. મોદી ચીનના તિયાનજિનમાં યોજાયેલા શાંઘાઈ સહયોગ સંગઠન (SCO)ના શિખર સંમેલનમાં સામેલ થયા હતા. રિપોર્ટમાં કહેવામાં આવ્યું છે કે આ ઘટનાક્રમોથી ભારત-ચીન સંબંધોમાં સકારાત્મક બદલાવને મજબૂતી મળી. રિપોર્ટ અનુસાર, ૨૫-૨૬ ઓક્ટોબર ૨૦૨૫ના રોજ પૂર્વ લદ્દાખમાં ભારત અને ચીન વચ્ચે ૨૩મી કોર કમાન્ડર સ્તરની બેઠક યોજાઈ હતી. આ ઉપરાંત, બંને દેશોના સૈનિકો વચ્ચે બોર્ડર પર્સનલ મીટિંગ પણ ચાલુ રહી હતી. રિપોર્ટમાં જણાવાયું છે કે આ બેઠકોમાં વાતાવરણ સૌહાર્દપૂર્ણ અને મૈત્રીપૂર્ણ રહ્યું હતું. બંને પક્ષોએ પરસ્પર ચિંતાના મુદ્દાઓને વાતચીત દ્વારા ઉકેલવાનો પ્રયાસ કર્યો હતો.