અમેરિકાની ઈરાન પર ફરી એરસ્ટ્રાઈક, વળતાં જવાબમાં તેહરાનનો બહેરીન-કુવૈતમાં મિસાઈલ હુમલો

જોર્ડને 8 મિસાઈલો તોડી પાડી

અમેરિકાએ ગુરુવારે વહેલી સવારે ઈરાનમાં સૈન્ય ઠેકાણાઓ પર ફરી એકવાર એરસ્ટ્રાઈક કરી. અમેરિકી સેન્ટ્રલ કમાન્ડ (CENTCOM) અનુસાર, હુમલાઓમાં મિસાઈલ લોન્ચ સાઈટ, સંરક્ષણ ઠેકાણાઓ અને સિસ્તાન-બલુચિસ્તાનમાં 388મી બ્રિગેડની બેરેકને નિશાન બનાવવામાં આવી હતી. જવાબમાં ઈરાને બહેરીન, કુવૈત અને જોર્ડનમાં અમેરિકી સૈન્ય ઠેકાણાઓ પર મિસાઈલ અને ડ્રોન હુમલા કરવાનો દાવો કર્યો. બહેરીન અને કુવૈતમાં મિસાઈલ એલર્ટ જાહેર કરવામાં આવ્યું હતું, જ્યારે જોર્ડને આઠ ઈરાની મિસાઈલોને તોડી પાડવાની જાણકારી આપી.

આ દરમિયાન ઈરાનની સંસદના અધ્યક્ષ મોહમ્મદ બાઘેર ગાલિબાફે કહ્યું કે જો અમેરિકા પીછેહઠ નહીં કરે, તો ઈરાન મોટા સૈન્ય સંઘર્ષ માટે તૈયાર છે. તેમજ, રિવોલ્યુશનરી ગાર્ડ (IRGC) એ ચેતવણી આપી કે જો જરૂર પડશે તો મિડલ-ઈસ્ટમાંથી તેલ અને ગેસની નિકાસ પણ રોકી શકાય છે. મિડલ ઈસ્ટના ઈન્ફ્રાસ્ટ્રક્ચર પર હુમલાની ચેતવણીના થોડા કલાકો પછી ઈરાને પોતાનું વલણ સ્પષ્ટ કર્યું છે. ઈરાની સેનાના પ્રવક્તા મોહમ્મદ અકરમિનિયાએ કહ્યું કે તેહરાનનો તેના પડોશી દેશો કે ક્ષેત્રના ઇસ્લામિક દેશો સાથે સંઘર્ષ કરવાનો કોઈ ઇરાદો નથી. અકરમિનિયાએ સત્તાવાર નિવેદનમાં કહ્યું કે ઈરાન હંમેશા પ્રાદેશિક દેશો સાથે સહયોગ વધારવા અને ભાઈચારાના સંબંધો મજબૂત કરવાની નીતિ પર ચાલતું રહ્યું છે. તેમણે કહ્યું કે ઈરાની સેનાની પ્રથમ જવાબદારી દેશની સુરક્ષા, રાષ્ટ્રીય હિતો અને સન્માનની રક્ષા કરવાની છે અને તેને પૂરી કરવામાં કોઈ કસર છોડવામાં આવશે નહીં.

હોર્મુઝ રૂટ પર ભારતીય નાવિકોની તૈનાતી રોકવાના આદેશ
ભારત સરકારે હોર્મુઝ સ્ટ્રેટમાંથી પસાર થતા જહાજો પર ભારતીય નાવિકોની તૈનાતી હાલ પૂરતી રોકવાના નિર્દેશ આપ્યા છે. ભારતના ડાયરેક્ટોરેટ જનરલ ઓફ શિપિંગ (DGS) એ શિપિંગ કંપનીઓ, જહાજ વ્યવસ્થાપન કંપનીઓ અને ક્રૂ ભરતી એજન્સીઓને આ માટે આદેશ આપ્યા છે.

ઈરાને કહ્યું- જો અમારા ઈન્ફ્રા પર હુમલો થશે તો અમે આખા મધ્ય પૂર્વના ઈન્ફ્રાને તબાહ કરી દઈશું
અમેરિકા સાથે વધતા લશ્કરી તણાવ વચ્ચે ઈરાને કડક ચેતવણી આપી છે. ઈરાનના ખાતમ અલ-અંબિયા સેન્ટ્રલ હેડક્વાર્ટરના પ્રવક્તા બ્રિગેડિયર જનરલ ઈબ્રાહિમ ઝોલ્ફાઘરીએ જણાવ્યું હતું કે જો અમેરિકા ઈરાનના ઈન્ફ્રાસ્ટ્રક્ચર પર હુમલો કરશે, તો ઈરાન સમગ્ર મધ્ય પૂર્વના મહત્વપૂર્ણ ઈન્ફ્રાસ્ટ્રક્ચરને નિશાન બનાવશે.

અમેરિકાએ ઈરાન જઈ રહેલા જહાજ પર મિસાઈલ હુમલો કર્યો
અમેરિકાએ દાવો કર્યો છે કે તેણે ઈરાનના બંદર તરફ જઈ રહેલા કુરાકાઓ-ધ્વજવાળા ટેન્કર M/T બેલમા પર મિસાઈલ હુમલો કરીને તેને રોકી દીધું. અમેરિકી સેન્ટ્રલ કમાન્ડ (CENTCOM) અનુસાર, જહાજે ઘણી ચેતવણીઓ છતાં પોતાનો રસ્તો બદલ્યો નહીં, ત્યારબાદ અમેરિકી વિમાને તેની સ્મોકસ્ટેક પર મિસાઈલ છોડીને તેને નિષ્ક્રિય કરી દીધું. CENTCOMનું કહેવું છે કે આ કાર્યવાહી ઈરાન વિરુદ્ધ લાગુ કરાયેલી અમેરિકી નૌકાદળની નાકાબંધી હેઠળ કરવામાં આવી હતી. અમેરિકી સેના અનુસાર, જહાજ ઈરાનના બંદર તરફ આગળ વધી રહ્યું હતું અને તેણે વારંવાર આપવામાં આવેલી ચેતવણીઓની અવગણના કરી.