સુપર-8માં ભારતનો દમદાર વિજય: ઝિમ્બાબ્વેને 72 રને હરાવી ટીમ ઈન્ડિયા સેમિફાઈનલની નજીક

ચેન્નઈમાં અભિષેક શર્મા અને હાર્દિક પંડ્યાની તોફાની બેટિંગ: ભારતનો ઝ20 વર્લ્ડ કપનો સર્વોચ્ચ સ્કોર

ખાસ-ખબર ન્યૂઝ નવી દિલ્હી, તા.27

ઝ20 વર્લ્ડ કપ 2026 ના સુપર 8 તબક્કાના અત્યંત નિર્ણાયક મુકાબલામાં ભારતીય ટીમે ઝિમ્બાબ્વે સામે 72 રને ભવ્ય વિજય મેળવીને સેમિફાઈનલ તરફ મજબૂત ડગલું માંડ્યું છે. ચેન્નઈના એમએ ચિદમ્બરમ સ્ટેડિયમ ખાતે રમાયેલી આ મેચમાં ભારતીય બેટ્સમેનોએ ચોગ્ગા અને છગ્ગાની રમઝટ બોલાવી હતી. સતત ત્રણ મેચમાં શૂન્ય પર આઉટ થયા બાદ ઓપનર અભિષેક શર્માએ શાનદાર ફોર્મમાં વાપસી કરતા માત્ર 30 બોલમાં 55 રન ફટકાર્યા હતા.
હાર્દિક પંડ્યાએ પણ માત્ર 23 બોલમાં અણનમ 50 રનની આક્રમક ઈનિંગ રમી હતી, જેના કારણે ભારતે 20 ઓવરમાં 4 વિકેટે 256 રનનો વિશાળ સ્કોર ખડક્યો હતો. આ સ્કોર ઝ20 વર્લ્ડ કપના ઇતિહાસમાં ભારતનો સર્વોચ્ચ સ્કોર છે, જેણે 2007ના 218 રનનો રેકોર્ડ તોડી નાખ્યો છે. લક્ષ્યનો પીછો કરવા ઉતરેલી ઝિમ્બાબ્વેની ટીમ નિર્ધારિત 20 ઓવરમાં 6 વિકેટે 184 રન જ બનાવી શકી હતી.
ઝિમ્બાબ્વે તરફથી બ્રાયન બેનેટે 59 બોલમાં 97 રનની અદભૂત અને લડાયક ઈનિંગ રમી હતી, પરંતુ તેને અન્ય બેટ્સમેનોનો સાથ મળ્યો નહોતો. ભારત તરફથી અર્શદીપ સિંહે કિલર બોલિંગ કરતા ત્રણ મહત્વની વિકેટો ઝડપી હતી, જ્યારે અક્ષર પટેલે પણ કરકસરિયી બોલિંગ કરી ઝિમ્બાબ્વેના રન રેટ પર અંકુશ રાખ્યો હતો. આ જીત સાથે ભારત હવે 1 માર્ચે કોલકાતામાં વેસ્ટ ઈન્ડિઝ સામે ટકરાશે, જ્યાં જીત મેળવતાની સાથે જ ભારત સત્તાવાર રીતે સેમિફાઈનલમાં ક્વોલિફાય થઈ જશે. હાર્દિક પંડ્યાને તેના ઓલરાઉન્ડ પ્રદર્શન બદલ ’પ્લેયર ઓફ ધ મેચ’ જાહેર કરવામાં આવ્યો હતો.

ઐતિહાસિક સ્કોર અને ફોર્મમાં વાપસી

ભારતીય ટીમે આ મેચમાં 256 રન બનાવીને એક નવો કીર્તિમાન સ્થાપિત કર્યો છે. ખાસ કરીને અભિષેક શર્માની વાપસી ટીમ માટે રાહતના સમાચાર છે, કારણ કે તે અગાઉની ત્રણ મેચમાં ખાતું ખોલાવ્યા વિના પેવેલિયન પરત ફર્યો હતો. હાર્દિક પંડ્યા અને ઈશાન કિશનના આક્રમક વલણને કારણે ભારતે છેલ્લી ઓવરોમાં ઝડપથી સ્કોર વધાર્યો હતો, જે સેમિફાઈનલ પહેલા ટીમના આત્મવિશ્વાસમાં મોટો વધારો કરનાર સાબિત થયો છે.

સેમિફાઈનલનું સમીકરણ

આ મેચમાં હાર સાથે ઝિમ્બાબ્વેની ટુર્નામેન્ટમાં સફર સમાપ્ત થઈ ગઈ છે. બીજી તરફ, ગ્રુપ 1 માંથી દક્ષિણ આફ્રિકા અને ગ્રુપ 2 માંથી ઈંગ્લેન્ડે સેમિફાઈનલની ટિકિટ ક્ધફર્મ કરી લીધી છે. ભારત માટે હવે વેસ્ટ ઈન્ડિઝ સામેની મેચ કરો યા મરો સમાન છે. જો ભારત આ આગામી મેચ જીતી જશે, તો તે અંતિમ ચારમાં સ્થાન મેળવનાર આગામી ટીમ બનશે. ટીમ ઈન્ડિયાના બોલરો અને બેટ્સમેનો જે રીતે લયમાં જણાય છે, તે જોતા ભારત ટાઈટલ જીતવા માટે પ્રબળ દાવેદાર માનવામાં આવી રહ્યું છે.