રાજકોટ શહેર ટ્રાફિક પોલીસ દ્વારા નિ:શુલ્ક આંખની તપાસ કેમ્પનું આયોજન કરવામાં આવ્યું

ખાસ-ખબર સંવાદદાતા
જુના માર્કેટીંગ યાર્ડ ગોંડલ રોડ ખાતે સુરક્ષા સેતુ યોજના અંતર્ગત રાજકોટ શહેર પોલીસ દ્વારા ટ્રાફિક અવેરનેસ કાર્યક્રમ તથા નિ:શુલ્ક આંખની તપાસના કેમ્પ યોજાયા હતા. આ કાર્યક્રમમાં ટ્રાફિક પોલીસ ઇન્સ્પેક્ટર એન.જી.વાઘેલાએ ટ્રાફિકના નિયમોનું પાલન, ઝીબ્રા ક્રોસિંગ, ડ્રાઈવિંગ લાઇસન્સનું મહત્વ, વાહન ચલાવતી વખતે હેલ્મેટ અને શીટ બેલ્ટનો ઉપયોગ કરવો, વાહન ચલાવતી વખતે મોબાઈલ ફોનનો ઉપયોગ ન કરવો, કારમાં બ્લેક ફિલ્મ વાળા કાચનો ઉપયોગ ન કરવો, ઓવર સ્પીડમાં અને રોંગ સાઈડમાં વાહન ચલાવવું નહીં, ઈ-મેમો, ટ્રાફિક સિગ્નલ પાલન અંગેની વિસ્તૃત માહિતી આપી હતી. કેમ્પમાં આંખના નિષ્ણાંત ડો. કાર્તિક પટેલ દ્વારા આંખની તપાસ કરાઇ હતી. જેમાં માર્કેટિંગ યાર્ડના ખેડૂતો તેમજ ટ્રક ચાલક, રિક્ષા ચાલક સહિત આશરે 60 ડ્રાઇવરોની આંખની તપાસ કરાઇ હતી. આ તકે શહેર ટ્રાફિક પોલીસ સ્ટાફ તેમજ આરોગ્ય વિભાગના કર્મચારીઓ,ખેડૂત ભાઈઓ અને ડ્રાઈવર ભાઈઓ ઉપસ્થિત રહ્યા હતા.