વર્લ્ડ કપ ચેસ ટુર્નામેન્ટ: પ્રજ્ઞાનાનંદા અને કાર્લસન વચ્ચેની બીજી ગેમ પણ ડ્રો થઈ

ખાસ-ખબર સંવાદદાતા
ભારતીય ચેસ ગ્રાન્ડમાસ્ટર રમેશબાબુ પ્રજ્ઞાનાનંદાએ વર્લ્ડ કપ ચેસ ટુર્નામેન્ટની ફાઇનલ મેચમાં જોરદાર પ્રદર્શન કર્યું હતું. આ મેચ વિશ્ર્વના નંબર વન ચેસ ખેલાડી મેગ્નસ કાર્લસન સામે રમાઈ રહી છે. ફાઈનલ અંતર્ગત બે દિવસમાં બે ગેમ રમાઈ હતી અને બંને મેચ ડ્રોમાં સમાપ્ત થઈ હતી. 18 વર્ષીય પ્રજ્ઞાનાનંદાએ 32 વર્ષીય કાર્લસનને બંને ગેમ્સમાં જોરદાર ટક્કર આપી હતી. હવે ચેમ્પિયનનો નિર્ણય આજે ટાઈ બ્રેકર દ્વારા થશે. બંને વચ્ચેની પ્રથમ ગેમ 34 ચાલ સુધી ચાલી હતી, પરંતુ પરિણામ મળી શક્યું ન હતું. જ્યારે બીજી ગેમમાં બંને વચ્ચે 30 ચાલ ચાલી હતી. વર્લ્ડ કપ ટાઈટલ જીતશે તેને 1 લાખ 10 હજાર ડોલર મળશે.પ્રજ્ઞાનાનંદાએ સેમિફાઇનલમાં વિશ્ર્વના ત્રીજા નંબરના ખેલાડી ફેબિયાનો કારુઆનાને 3.5-2.5થી હરાવીને ફાઇનલમાં પ્રવેશ કર્યો હતો.