ઘોઘલા દરિયા કિનારે અનધિકૃત દબાણ પ્રશાસન દ્વારા દૂર કરાયું

ખાસ-ખબર સંવાદદાતા
ઘોઘલા પોલીસ સ્ટેશન પાસે દરિયા કિનારે આવેલ 7,400 ચોરસ કિલોમીટરમાં આવેલી સરકારી જમીન નં. 33/26 (ઙ) પર કરાયેલા અતિક્રમણને દૂર કરવાની આજે જિલ્લા વહીવટી તંત્રે કાર્યવાહી હાથ ધરી હતી. આ સરકારી જમીન પર કેટલાક લોકો અનધિકૃત મકાનો બનાવીને રહેતા હતા. નોંધનીય છે કે આ અતિક્રમણ હટાવવા અંગે વહીવટીતંત્ર દ્વારા અગાઉથી જ જાણ કરવામાં આવી હતી. સરકારની નોટિસના અનુસંધાને અનેક લોકોએ જાતે જ પોતાના બિનઅધિકૃત મકાનો હટાવી લીધા હતા, પરંતુ સરકારની સૂચના બાદ પણ કેટલાક લોકો 25 જેટલા મકાનોમાં બિનઅધિકૃત રીતે વસવાટ કરી રહ્યા હતા. મામલતદાર ધર્મેશ દમણિયાની દેખરેખ હેઠળ મામલતદાર કચેરીના કર્મચારીઓ દ્વારા જેસીબીની મદદથી અતિક્રમણ દૂર કરવાની કાર્યવાહી હાથ ધરવામાં આવી હતી. આ કાર્યવાહી શાંતિપૂર્ણ અને કાયદેસર રીતે કરવામાં આવી હતી.
તે જ ક્રમમાં દીવ જિલ્લાના તમામ નાગરિકોને જિલ્લા વહીવટી તંત્ર દ્વારા આ અખબારી યાદી દ્વારા જણાવવામાં આવે છે કે, સરકારી જમીન પર કોઈ વ્યક્તિ દ્વારા અતિક્રમણ કરવામાં આવ્યું હોય તો તેઓ તેને તાત્કાલિક દૂર કરે અન્યથા વહીવટીતંત્ર અતિક્રમણ દૂર કરવાની કાર્યવાહી કરશે. ઉલ્લેખનીય છે કે છેલ્લા કેટલાક સમયથી વહીવટી તંત્ર દ્વારા અતિક્રમણ હટાવવાની કાર્યવાહી કરવામાં આવી રહી છે, જેના કારણે દીવના વિવિધ ગ્રામ્ય અને શહેરી વિસ્તારોમાં સરકારી જમીનો પર થયેલા અતિક્રમણો મુક્ત થયા છે.