- પરખ ભટ્ટ
(૧) સસુરાલ ગેંદા ફૂલ!
દિલ્હીની રહેવાસી અને હૂપ ડાન્સર એષ્ણા કુટ્ટીનું ‘સસુરાલ ગેંદા ફૂલ’ આ અઠવાડિયે છાપરા–ફાડ વાયરલ થયું, નહીં? બે મિનિટના ગીત પર હૂપ ડાન્સની ખાસિયત સમી રિંગ સાથે, એષ્ણાએ ભારતીય નારીનું આભૂષણ ગણાતી સાડી પહેરી, એક વીડિયો બનાવીને ઇન્સ્ટાગ્રામ પર અપલૉડ કર્યો. રેખા ભારદ્વાજથી માંડીને ઘણાંય મહાનુભાવોએ તેને ફેસબૂક–ટ્વિટર–વૉટ્સએપ–ઇન્સ્ટા પર શેર કરી એષ્ણાને રાતોરાત વાયરલ કરી દીધી. મજાની વાત એ છે કે તેની માતા ચિત્રા નારાયણ પોતે ‘ધ હિન્દુ બિઝનેસ’ ગ્રુપની લેખિકા છે. ‘ધ હિન્દુ’ના એડિટરે ચિત્રા નારાયણને તેની જ દીકરી પર એક લેખ લખવા કહ્યું! તમે જાણો છો, એ લેખનું શીર્ષક શું હતું? ‘મારી દીકરી એષ્ણા કુટ્ટીનો વીડિયો વાયરલ કેવી રીતે થયો?’
(૨) ફરી વખત, નવી ઘોડી નવો દા..!?
ઇન્ડિયન કાઉન્સિલ ઑફ મેડિકલ રીસર્ચ દ્વારા પાછલા દિવસોમાં એક ખતરનાક વૉર્નિંગ જાહેર કરવામાં આવી, જેમાં તેઓએ પોતાના રીસર્ચ પેપર ‘ઇન્ડિયન જર્નલ ઑફ મેડિકલ રીસર્ચ’માં ભારત પર કેટ ક્યુ વાયરસનો ખતરો હોવાની સંભાવના બતાવી. ચેન અને તાઇવાનમાં પોતાનો પ્રભાવ દેખાડી ચૂકેલો આ વાયરસ ભૂતકાળમાં ભારતમાં પણ દેખા દઈ ચૂક્યો છે. તાવ, કરોડરજ્જુમાં સોજો અને મગજ પર ખરાબ અસર અંગે વૈજ્ઞાનિકો અને ડૉક્ટર્સ ભારતીયોને ચેતવી ચૂક્યા છે. હજુ સુધી તેના એકપણ સક્રિય કેસ આપણા દેશમાં જોવા નથી મળ્યા એ ગનીમત! પરંતુ ભૂંડ અને મચ્છરો દ્વારા ફેલાતો કેટ ક્યુ વાયરસ ભારતીયો માટે ખતરારૂપ તો છે જ, એ હકીકત ભૂલવા જેવી નથી. લોકોએ સોશિયલ મીડિયા પર ભય વ્યક્ત કર્યો કે ક્યાંક કોરોનામાંથી સાંગોપાંગ પાર ઉતર્યા બાદ કેટ ક્યુ સામે લડવાનો વખત તો નહીં આવે ને?
(૩) સુ–શાંત!
ફાઇનલી, સીબીઆઈ (CBI)એ પોતાના જાંચ રિપોર્ટમાં દિવંગત બોલિવૂડ એક્ટર સુશાંત સિંઘ રાજપૂતને કોઈ ઝેર નહોતું અપાયું એ વાત સ્પષ્ટ કરી દીધી છે. અફસરોએ તેના ગળાના નિશાન, ફ્લેટની ડુપ્લિકેટ ચાવીનો વિવાદ અને ગાયબ સીસીટીવી ફૂટેજને આધારે કોઈ તપાસ હવે હાથ ધરી શકે એમ નથી, એમ ચોખ્ખું ને ચટ્ટ જણાવી દીધું છે. જોકે, હજુ પણ આ કેસમાં ઘણા વણઉકેલ્યા પ્રશ્નો છે, જેના જવાબો મળશે કે નહીં એ વિશે શંકા છે. એ સિવાય દીપિકા પદુકોણ, સારા અલી ખાન, રકુલ પ્રીત સિંઘને નાર્કોટિક્સ કંટ્રોલ બ્યુરોનું તેડું મળ્યા બાદ શાહિદ કપૂર, કરણ જોહર સહિતના સ્ટાર્સને પણ સમન્સ પાઠવવામાં આવે તેવી સંભાવના સેવાઈ રહી છે. આ લેખ તમારા હાથમાં આવે એ સમયે કદાચ સમન્સ પાઠવી દેવામાં આવ્યું હોય તેવું પણ બને!
(૪) નવરાત્રિને ના, તો પછી ચૂંટણીને કેમ હા?
૮ બેઠકો પર પેટાચૂંટણીના મુદ્દે વિવાદ ગરમાયો છે. નવરાત્રિ મુદ્દે સરકાર તરફથી તલવારની ધાર જેવી મસમોટી ‘ના’ સંભળાવી દેવામાં આવી છે. ગરબા ખૈલેયાઓ માટે આ નકાર કોઈ ગાળથી કમ નથી! પણ આ વર્ષ ઘણાં આકરા બલિદાનો માંગનારું સાબિત થયું છે, એમ સમજીને સૌ કોઈ પોતપોતાના રૂટિનમાં પરોવાઈ ગયા છે. પરંતુ ચૂંટણીની તારીખો નવેમ્બરમાં જાહેર કરી દેવામાં આવતાં તે અંગે લોકોનો રોષ સોશિયલ મીડિયા પર જોવા મળી રહ્યો છે. ઑક્ટોબરથી ચૂંટણી ઢંઢેરાઓ અને પ્રચાર–પ્રસાર માટેની રેલી શરૂ થઈ જશે. એટલા સમય પૂરતો કોરોના અદ્રશ્ય થઈ જવાનો છે, સાહેબ?
(૫) ટેક્સ–ચોર ટ્રમ્પ?
અમેરિકાના અંગ્રેજી અખબાર ‘ન્યુયોર્ક ટાઇમ્સ’ દ્વારા પ્રેસિડેન્શિયલ ડિબેટ શરૂ થવાના થોડા દિવસ પહેલાં ટ્રમ્પની ટેક્સ–ચોરી મામલે જે ધડાકો કરવામાં આવ્યો તેના લીધે આખા વિશ્વના સમાચારપત્રોની હેડલાઇન્સ અને સોશિયલ મીડિયા પર ટ્રમ્પ છવાયેલા છે! ૨૦૧૬-’૧૭ની સાલમાં ટ્રમ્પે ફક્ત ૭૫૦ ડોલર (૫૦,૦૦૦ રૂપિયા) ટેક્સ ભર્યો હોવાનો ખુલાસો થયો છે, જે ત્યાંના નાગરિકની તુલનામાં ૧૪૦ ગણો ઓછો છે! કેમ ભાઈ? પ્રેસિડન્ટ હોય એટલે ટેક્સ માફ થઈ જાય? લોકો સવાલ ઉઠાવી રહ્યા છે. બીજી બાજુ, ટ્રમ્પ રાબેતા મુજબ મીડિયાને ગાળો ભાંડી રહ્યા છે. તેમનું કહેવું છે કે મારી કંપનીએ દેવાળું ફૂંકીને પણ ટેક્સ ભર્યો છે. આ છાપાવાળા જૂઠ્ઠાં છે!
(૬) અમને માફ કરી દેજે, લાડકી!
ઉત્તરપ્રદેશના હાથરસમાં ૧૯ વર્ષની દલિત છોકરી પર ચાર પુરૂષોએ બળાત્કાર ગુજાર્યો, જેના કારણે તેનું મૃત્યુ થયું હોવાની વાત સામે આવી. તેની જીભ કાપી નાંખી હોવાના અહેવાલ મળ્યા. ડોક અને કરોડરજ્જુ પણ ભાંગી નાંખવામાં આવી હોવાની વાત મળી. ૨૦૧૨ની સાલમાં દિલ્હીના નિર્ભયા કાંડ બાદ ફરી ભારતીયોએ દેશભરમાં રેલીઓ કાઢીને પીડિતાને ન્યાય અપાવવા માટે વિનંતી કરી. સોશિયલ મીડિયા પર ‘જસ્ટિસ ફોર મનિષા વાલ્મિકી’ હેશટેગ આખું અઠવાડિયું ટ્રેન્ડિંગ રહ્યું. ઉત્તરપ્રદેશની પોલીસે ગુપચુપ પીડિતાના અગ્નિસંસ્કાર કરી નાંખ્યા એની સામે પણ લોકોએ આક્રોશ ઠાલવ્યો. પોલીસ તો એવું પણ કહી રહી છે કે, મનિષાની જીભ કાપવામાં નહોતી આવી, તેના પર કોઈ બળાત્કાર ગુજારવામાં નહોતો આવ્યો, તેની કરોડરજ્જુ નહોતી તૂટી! સત્ય–અસત્ય જે હોય તે, એક યુવાન હૈયાએ પોતાનો જીવ ગુમાવ્યો છે તે દુઃખદ વાત છે.
