ડિસેમ્બર અને ફેબ્રુઆરીમાં થોડા થોડા દિવસના અંતે ગેસ સિલિન્ડરના ભાવ વધતા રહ્યા છે. 50 અને 25 રૂપિયાનો વધારો કરીને LPG સિલિન્ડરનો ભાવ હવે 200 રૂપિયા વધ્યો છે.

રાજ્યમાં નવેમ્બર 2020ના અંત સુધી અમદાવાદમાં LPG સિલિન્ડરના ભાવ રૂપિયા 601 હતા. ડિસેમ્બરમાં મહિનાની બીજી તારીખે સિલિન્ડરની કિંમતમાં 50 રૂપિયાનો વધારો કરાયો હતો અને કિંમત 651 રૂપિયા થઈ હતી. ત્યારબાદ 15 ડિસેમ્બરના રોજ ફરી રૂપિયા 50નો વધારો ઝીંકાતા બાટલાના ભાવ 701 રૂપિયા થયા હતા. આમ ડિસેમ્બર મહિનામાં 15 દિવસમાં જ 100 રૂપિયાનો તોતિંગ ભાવ વધારો ઝીંકાયો હતો.

ડિસેમ્બર માસમાં 100 રૂપિયાના ભાવ વધારાથી રોષે ભરાયેલી ગૃહિણીઓનો ગુસ્સો હજી તો શાંત નહોતો થયો ત્યાં સરકારે 4 ફેબ્રુઆરી 2021ના રોજ ફરી 25 રૂપિયાનો વધારો કર્યો હતો. પરિણામે અમદાવાદમાં ગેસ સિલિન્ડરના ભાવ રૂપિયા 726 પર પહોંચ્યા હતા. જો કે, આ ભાવ વધારો અહીં અટક્યો નહીં. 14 ફેબ્રુઆરીએ ફરીથી ગેસ સિલિન્ડરના ભાવ 50 રૂપિયા વધ્યા હતા અને કિંમત 776 રૂપિયા થઈ હતી. 11 દિવસ બાદ 25 ફેબ્રુઆરી 2021ના રોજ 25 રૂપિયાનો વધારો કરાતા હાલમાં અમદાવાદમાં ગેસ સિલિન્ડરની કિંમત 801 રૂપિયા થઈ છે.

આમ, ડિસેમ્બર અને જાન્યુઆરીના 31-31 દિવસો અને ફેબ્રુઆરીના 25 દિવસ મળીને કુલ 87 દિવસના ટૂંકા ગાળામાં જ અમદાવાદમાં LPG ગેસ સિલિન્ડરની કિંમત 200 રૂપિયા જેટલી વધી હતી. સતત ભાવોમાં થઈ રહેલા વધારાને પગલે ગૃહિણીઓને ઘર ચલાવવું મુશ્કેલ થઈ પડ્યું છે. છેલ્લા 3 મહિનામાં પાંચ વખત ભાવ વધારો થયો છે. જેમાં 3 વખત 50-50 રૂપિયા વધારાયા અને બે વખત 25-25 રૂપિયાનો વધારો થયો હતો.