તમે સ્ટુડન્ટ છો?

ગયા વર્ષે એમ મનાય છે કે લગભગ ત્રણ લાખ ભારતીયો વિદ્યાર્થીઓ અમેરિકાની જુદી જુદી યુનિવર્સિટીઓમાં ભણવા ગયા હતા. મેં મારા લેખોમાં વારંવાર જણાવ્યું છે કે, ભારતમાંથી અમેરિકાની યુનિવર્સિટીઓમાં ભણવા જતા સ્ટુડન્ટો ત્રણ પ્રકારના હોય છે. એક પ્રકારે એવો હોય છે કે, એના સ્ટુડન્ટોનો ઈરાદો અમેરિકામાં ફકત ભણવાનો જ હોય છે. બીજા પ્રકારના વિદ્યાર્થીઓ અમેરિકામાં ભણવા એટલા માટે જાય છે કે, ભણી રહ્યા બાદ એમને અમેરિકામાં ઊંચા પગારે સારી નોકરી મળે અને તેઓ અમેરિકામાં જ રહી શકે અને ત્રીજા પ્રકારના વિદ્યાર્થીઓનો ભણવાનો ઈરાદો નથી હોતો. ભણવાના બહાને સ્ટુડન્ટ વિઝા મેળવીને તેઓ અમેરિકામાં પ્રવેશવા ઈચ્છે છે અને ત્યાં રહેતા એમના સગાવહાલાની મોટેલો, હોટેલો, સ્ટોર, ગેસસ્ટેશન વગેરેમાં કામ કરવાની ઈચ્છા ધરાવતા હોય છે. પહેલા પ્રકારના સ્ટુડન્ટો કુલ જે સ્ટુડન્ટો અમેરિકા જતા હોય એમની સંખ્યામાં દસ ટકા જેટલા હોય છે. બીજા પ્રકારના વિદ્યાર્થીઓ બાકીના 45 ટકા જેટલા હોય છે અને ત્રીજા પ્રકારના વિદ્યાર્થીઓ પણ 45 ટકા જેટલા હોય છે. આ સઘળું તો ઠીક છે પણ ભારતમાંથી અમેરિકા ભણવા જતા વિદ્યાર્થીઓ ભણવા ઉપરાંત અન્ય અનેક કાર્યો કરતા હોય છે. મોટાભાગના શનિ-રવિ અને રજાના દિવસોમાં, કોલેજ પૂરી થાય પછીના સમયમાં ત્યાં આગળ ગેરકાયદેસર કામ કરતા હોય છે. અમુક વિદ્યાર્થીઓ એમના ધર્મનો અન્ય વિદ્યાર્થીઓમાં ફેલાવો કરતા હોય છે. આમાં તેઓ યુવતીઓને પોતાના પ્રેમમાં પાડીને એમની જોડે લગ્ન કરીને એમને પોતાનો ધર્મ અંગીકાર કરવા માટે દબાણ કરતા હોય છે. અનેક વિદ્યાર્થીઓ એમનો જે રાજકીય મત હોય છે તેઓ જે દેશને સપોર્ટ કરતા હોય છે એ દેશના ગુણગાણ ગાય છે અને અમેરિકાને વખોડે છે. આમ સ્ટુડન્ટ તરીકે અમેરિકામાં ભણવા જતા સ્ટુડન્ટો ભણવા ઉપરાંત આવા આવા સ્ટુડન્ટોએ ન કરવા જેવા કાર્યો કરે છે.

અમેરિકાના બીજી વારના પ્રેસિડન્ટ ડોનાલ્ડ ટ્રમ્પે પરદેશી વિદ્યાર્થીઓના આવા વર્તનનો વાંધો ઉઠાવ્યો છે. ખાસ કરીને જે પરદેશી વિદ્યાર્થીઓ અમેરિકા વિરુદ્ધના દેશોને સપોર્ટ કરતા હોય છે, એમને પ્રમોટ કરતા હોય છે અને અમેરિકા વિષે ખરાબ બોલતા હોય છે એમનો તો ટ્રમ્પ સખ્ત વિરોધ કરે છે અને હવે જે એમણે ઈમિગ્રેશન ઓફિસરોને આવા વિદ્યાર્થીઓ સામે સખ્ત પગલાં લેવાનો સૂચવ્યું છે. તમે જો અમેરિકામાં ભણવા માટે જતા હોવ, સ્ટુડન્ટ વિઝા ઉપર ત્યાં પ્રવેશેલા હોવ, ત્યાંની કોલેજોમાં એડમિશન મેળવ્યું હોય તો તમારે સ્ટુડન્ટની જેમ જ વર્તવું જોઈએ, અમેરિકાના રાજકારણમાં માથું મારવું ન જોઈએ, ધર્મનો ફેલાવો કરતી પ્રવૃત્તિઓ આદરવી ન જોઈએ, ગેરકાનૂની રીતે ત્યાં કામ કરવું ન જોઈએ, જો તમે આવું નહીં કરો અને અમેરિકાના રાજકારણમાં સક્રિય ભાગ લેશો, અમેરિકા વિરુદ્ધ પ્રચાર કરશો, અમેરિકા જે દેશ જોડે યુદ્ધમાં હોય યા જેની જોડે અમેરિકાના સંબંધો સારા ન હોય એ દેશના તમે વખાણ કરશો અને અમેરિકાને વખોડશો, ધર્મનો ફેલાવો કરવાના પ્રયત્નો કરશો, ગેરકાયદેસર કામ કરશો તો તમે તમારા સ્ટુડન્ટ વિઝાનો ઉલ્લંઘન કરો છો અને હવેથી ડોનાલ્ડ ટ્રમ્પની સરકાર એ સાંખી નહીં લે. આવા કાર્યો કરતા જો તમે પકડાશો તો તમારા સ્ટુડન્ટ વિઝા રદ કરવામાં આવશે. તમને અમેરિકા બહાર તમારા દેશમાં પાછા મોકલી આપવામાં આવશે અને ફરી પાછા અમેરિકામાં તમે કોઈ પણ પ્રકારના નોન-ઈમિગ્રન્ટ યા ઈમિગ્રન્ટ વિઝા ઉપર અમેરિકામાં પ્રવેશી નહીં શકો એવી પાબંદી તમારી ઉપર લાદવામાં આવશે. અનેક સ્ટુડન્ટો એમની ટ્યુશન ફી અને અમેરિકામાં રહેવા ખાવાના પૈસા હવાલા મારફતે મેળવે છે.

આ કૃત્ય પણ ગેરકાયદેસર છે. આને મનીલોન્ડરીંગ કહેવાય છે અને એ માટે કાયદામાં સખત સજા ફરમાવવામાં આવી છે. ભારતીયો વિદ્યાર્થીઓ અમેરિકામાં ભણવા અવશ્યથી જાઓ ત્યાંની યુનિવર્સિટીઓમાં પ્રાપ્ત થતું શિક્ષણ વિશ્ર્વમાં સૌથી શ્રેષ્ઠ છે. પણ તમે જ્યારે એક સ્ટુડન્ટ તરીકે અમેરિકામાં જાઓ છો ત્યારે રાજકારણમાં, ધર્માંતરમાં, ગેરકાયદેસર કામ કરવામાં રાજી નહીં થતા નહીં તો તમે સ્ટુડન્ટ મટી જશો અને ગુનેગાર બની જશો. અમેરિકામાં ભણવા જાઓ ત્યારે સતત યાદ કરજો કે તમે ત્યાં એક સ્ટુડન્ટ તરીકે ગયા છો, એટલે ફકત ભણવા પ્રત્યે જ ધ્યાન પરોવજો, અન્ય કોઈ પણ પ્રકારના કાર્યો કરતા નહીં. સ્ટુડન્ટ વિઝા જેની સંજ્ઞા એફ-1 છે એ મેળવવા માટે સૌપ્રથમ અંગ્રેજી ભાષા બરાબર આવડતી જોઈએ. અમેરિકામાં ભણવાનો જે ખૂબ મોટો ખર્ચો આવે છે એની તમારી પાસે પૂરતી સગવડ હોવી જોઈએ. અમેરિકાની યુનિવર્સિટીમાં શા માટે ભણવા જવું છે એ જણાવતો લેખ યા સ્ટેટમેન્ટ ઓફ પરપઝ લખવાનો રહે છે. રેકગ્કનાઈઝ્ડ લેટરો પણ મેળવવાના રહે છે. ત્યારબાદ આઈટલ્સની પરીક્ષા આપી અમેરિકાની યુનિવર્સિટીમાં પ્રવેશ મેળવવાની અરજી કરવાની રહે છે. પ્રવેશ મળતાં ફોર્મ ડીએસ-160 ભરીને નોન-ઈમિગ્રન્ટ પ્રકારના એફ-1 વિઝા મેળવવાની અરજી કરવાની રહે છે. સેવિસની ફી ભરવાની રહે છે. તમારા દેશમાં આવેલ કોન્સ્યુલેટમાં જઈને ઈન્ટરવ્યુ આપીને ઓફિસરને ખાતરી કરાવીને કે તમે ફકત અમેરિકામાં ભણવા માટે જ જવા ઈચ્છો છો અને એ માટે તમારી પાસે પૂરતા પૈસા છે. તમારા અમેરિકામાં ગેરકાયદેસર કામ કરવાનો ઈરાદો નથી અને સ્વદેશમાં તમારા કૌટુંબિક તેમ જ નાણાંકીય સંબંધો એટલા સારા છે કે એ સંબધો જ તમને અભ્યાસ પૂરો થતા સ્વદેશ પાછા ખેંચી લાવશે. આટલું કરશો તો તમને સ્ટુડન્ટ વિઝા જરૂરથી મળી શકશે. પણ અમેરિકામાં પ્રવેશો પછી ભૂલી નહીં જતા તમે ત્યાં એક સ્ટુડન્ટ તરીકે જ ગયા છો અને એટલે ત્યાં ફકત ભણવાનો જ ઈરાદો રાખજો.