ઑસ્ટ્રેલિયા-ઈંગ્લેન્ડ વચ્ચે અત્યારે પાંચ ટેસ્ટ મેચની ‘એશેઝ’ શ્રેણી રમાઈ રહી છે જેના ત્રણ મુકાબલા રમાઈ ગયા છે અને તેમાં ઑસ્ટ્રેલિયાએ બે તો ઈંગ્લેન્ડ એક મુકાબલો જીત્યો છે. હજુ આ શ્રેણીની બે મેચ બાકી હોવાથી શ્રેણી ઉપર કોણ કબજો જમાવશે તેનો નિર્ણય કરવો કપરો છે તે બધાની વચ્ચે જ ઑસ્ટ્રેલિયાના ઓપનિંગ બેટર ડેવિડ વૉર્નરે સંન્યાસનું એલાન કરીને સૌને ચોંકાવ્યા છે.
અહીં એ ચોખવટ કરવી જરૂરી બની જાય છે કે વૉર્નર એશેઝ શ્રેણી બાદ રમાનારા વર્લ્ડકપમાં પણ રમશે. જો કે જાન્યુઆરી-2024માં પાકિસ્તાન સામે પોતાના હોમગ્રાઉન્ડ સિડની પર છેલ્લી ટેસ્ટ રમીને ટેસ્ટ ક્રિકેટને અલવિદા કહી દેશે.
- Advertisement -
ડેવિડ વૉર્નરના પત્ની કેન્ડીસ વૉર્નર પોતાના ઈન્સ્ટાગ્રામ એકાઉન્ટ પર એક પોસ્ટ શેયર કરીને ખળભળાટ મચાવી દીધો છે. તેણે પોતાના એકાઉન્ટ પર એક તસવીર શેયર કરી છે જેમાં તે પોતાના પતિ ડેવિડ વૉર્નર અને પુત્રીઓ સાથે જોવા મળી રહી છે. કેન્ડીસે લખ્યું કે અમારા માટે એક યુગનો અંત, ટેસ્ટ ક્રિકેટ સાથે પ્રવાસ કરવો અત્યંત સુખદ યાત્રા રહી છે. અમને સહકાર આપનારા લોકોનો હું આભાર વ્યક્ત કરું છું…લવ યૂ ડેવિડ વૉર્નર.
આમ વૉર્નરના સંન્યાસની વાત જાણીને તેના ચાહકો આશ્ચર્યચકિત થઈ ગયા છે. અમુક ચાહકો તેને શુભકામના પાઠવી રહ્યા છે. જો કે વૉર્નરે સ્પષ્ટ કહ્યું છે કે તે પોતાના હોમ ગ્રાઉન્ડ સિડનીના મેદાન પરથી જ સંન્યાસ લેશે. પાકિસ્તાન-ઑસ્ટ્રેલિયા વચ્ચે ત્રણ મેચની શ્રેણી ડિસેમ્બરમાં શરૂ થશે. જાન્યુઆરી-2024માં સિડનીમાં બંન્ને ટીમો વચ્ચે ટેસ્ટ મેચ રમાશે.
