બડા બજરંગ ફાઉન્ડેશનની ટીમ દ્વારા રાજકોટ જિલ્લા કલેક્ટરને લેખિત રજૂઆત
થેલેસેમિયા મેજર બાળકોની મુશ્કેલીઓ વધતી જાય છે
- Advertisement -
રાજકોટ સિવિલ હોસ્પિટલમાં સારવાર લઈ રહેલા થેલેસેમિયા મેજર બાળકોને છેલ્લા ઘણા સમયથી આવશ્યક દવાઓ, ઇન્જેક્શન, ફિલ્ટર બ્લડ બેગ અને પૂરતા પ્રમાણમાં રક્ત ઉપલબ્ધ ન હોવાને કારણે ગંભીર મુશ્કેલીઓનો
સામનો કરવો પડી રહ્યો હોવાનો આક્ષેપ કરવામાં આવ્યો છે. આ મુદ્દે થેલેસેમિયા મેજર બાળકો વતી બડા બજરંગ ફાઉન્ડેશનના પ્રમુખ કલ્પેશ ગમારા સહિતની ટીમ દ્વારા રાજકોટ જિલ્લા કલેક્ટરને લેખિત રજૂઆત કરીને
તાત્કાલિક કાર્યવાહી કરવાની માંગ કરવામાં આવી છે. થેલેસેમિયા મેજરથી પીડાતા બાળકોને નિયમિત સારવાર માટે અનેક પ્રકારની દવાઓ અને વિશેષ સુવિધાઓની જરૂર પડે છે. જોકે છેલ્લા કેટલાક મહિનાઓથી સિવિલ
હોસ્પિટલમાં જરૂરી સારવાર સંબંધિત સાધનો અને દવાઓ ઉપલબ્ધ ન હોવાથી બાળકોના સ્વાસ્થ્ય પર સીધી અસર પડી રહી છે.
થેલેસેમિયા મેજર બાળકોને શરીરમાં વધતા આયર્ન જેવા વધારાના તત્વોને ઘટાડવા માટે આપવામાં આવતી ‘કેલ્કર’ નામની દવા ઘણા મહિનાઓથી સિવિલ હોસ્પિટલમાં ઉપલબ્ધ નથી. આ દવા બાળકો માટે અત્યંત આવશ્યક
હોવાનું જણાવવામાં આવ્યું છે. ઉપરાંત, બાળકોને જરૂરી પડતું ડેસ્કરાલ ઇન્જેક્શન પણ વર્ષોથી હોસ્પિટલમાં ઉપલબ્ધ ન હોવાનું રજૂઆતમાં ઉલ્લેખ કરવામાં આવ્યો છે. થેલેસેમિયા મેજર બાળકોને દર 15 દિવસે નિયમિત રક્ત
ચઢાવવું પડે છે. જો સામાન્ય આર.સી.સી. બ્લડ ચઢાવવામાં આવે તો અનેક બાળકોમાં ગંભીર પ્રકારની એલર્જીક પ્રતિક્રિયાઓ જોવા મળે છે. જેમાં તાવ આવવો, ધ્રુજારી, ભારે માથાનો દુખાવો, શરીરે ખંજવાળ આવવી તેમજ
નાના-મોટા ફોલ્લા નીકળવા જેવી સમસ્યાઓ સર્જાય છે. આવી સ્થિતિમાં બાળકની તબિયત વધુ બગડી જતી હોવાનું પણ રજૂઆતમાં જણાવાયું છે.
આ સમસ્યાના નિરાકરણ માટે દાતાઓ દ્વારા સિવિલ હોસ્પિટલને બ્લડ ફિલ્ટરિંગ માટે એલ.આર. (લ્યુકો રિડક્શન) મશીન આપવામાં આવ્યું હોવા છતાં છેલ્લા ઘણા સમયથી તે ઉપયોગમાં લેવાતું નથી. કારણ કે ફિલ્ટર બ્લડ
એકત્રિત કરવા માટે જરૂરી એલ.આર. બ્લડ બેગ હોસ્પિટલમાં ઉપલબ્ધ નથી. જો એલ.આર. બેગ ઉપલબ્ધ ન હોય તો વિકલ્પરૂપે ઉપયોગમાં લેવાતા ફિલ્ટર સેટ પણ મહિનાઓથી ઉપલબ્ધ ન હોવાનું રજૂઆતમાં જણાવાયું છે.
જેના કારણે બાળકોને ફિલ્ટર કરેલું સુરક્ષિત રક્ત મળી શકતું નથી.
- Advertisement -
સિવિલ હોસ્પિટલમાં બાળકો માટે જરૂરી પ્રમાણમાં બ્લડ પણ ઉપલબ્ધ રહેતું નથી. પરિણામે પરિવારજનોને બહારથી રક્તદાતાઓ શોધવા માટે દોડધામ કરવી પડે છે. જીવનભર ચાલતી ગંભીર બીમારી સામે સંઘર્ષ કરી રહેલા
બાળકો અને તેમના માતા-પિતાને સારવાર ઉપરાંત આવી વહીવટી સમસ્યાઓનો પણ સામનો કરવો પડે છે, જેના કારણે તેમની સ્થિતિ વધુ કફોડી બની રહી છે. થેલેસેમિયા મેજર બાળકોના વાલીઓએ જિલ્લા કલેક્ટરને વિનંતી
કરી છે કે આ જીવનભરની ગંભીર બીમારીથી પીડાતા બાળકોને આવશ્યક દવાઓ, ઇન્જેક્શન, ફિલ્ટર બ્લડ બેગ, ફિલ્ટર સેટ અને પૂરતા પ્રમાણમાં રક્તની તાત્કાલિક ઉપલબ્ધતા સુનિશ્ચિત કરવામાં આવે, જેથી બાળકોને
સમયસર અને યોગ્ય સારવાર મળી રહે તેમજ તેમના જીવનની ગુણવત્તામાં સુધારો આવી શકે. બાળકો અને તેમના પરિવારજનોએ જિલ્લા કલેક્ટર પાસે માનવતાના ધોરણે તાત્કાલિક હસ્તક્ષેપ કરીને સમસ્યાનું વહેલી તકે
નિરાકરણ લાવવાની માંગ કરી છે.
