રાજ્યમાં સિઝનનો સરેરાશ 24.63% વરસાદ : નર્મદા ડેમ 65% ભરાયો, 10 ડેમ હાઈ-એલર્ટ પર

વિવિધ જિલ્લામાંથી કુલ 8,324 લોકોનું સ્થળાંતર અને 3,711 લોકોનું સફળતાપૂર્વક રેસ્ક્યૂ કરાયું

આગામી 7 દિવસ કોઇ આગાહી નહીં : અત્યાર સુધીમાં 21.74% વાવેતર થયુ

હાલ રાજ્યમાં ચોમાસાએ વિરામ લીધો છે. છેલ્લા બે દિવસમાં એકપણ જિલ્લા-તાલુકામાં વરસાદ નોંધાયો નથી. તો બીજી તરફ તાપમાનમાં સામાન્ય વધારો થયો છે. રાજ્યમાં ગરમીનો પારો 37°C પાર રહ્યો, જેમાં ભાવનગર 37.2°C સાથે સૌથી ગરમ રહ્યું, જ્યારે અમદાવાદ 36.4 ડિગ્રી સેલ્સિયસ સાથે બીજા નંબર પર રહ્યું. ગુજરાતમાં ચોમાસાની સિઝનનો કુલ એકંદર વરસાદ 8.81 ઇંચ નોંધાયો છે, જે રાજ્યના સરેરાશ વરસાદની સામે 24.63% જેટલો થાય છે. જેમાં દક્ષિણ ગુજરાતમાં સૌથી વધુ 34.69% (21.06 ઇંચ) વરસાદ નોંધાયો છે.

છેલ્લા 24 કલાક દરમિયાન રાજ્યમાં નર્મદાના ગરૂડેશ્વર અને પંચમહાલના ગોધરા તાલુકામાં માત્ર 1 મિમી વરસાદ નોંધાયો છે, જ્યારે બાકીના તમામ તાલુકાઓમાં વાતાવરણ કોરું રહ્યું છે. ચોમાસા દરમિયાન અત્યાર સુધીમાં વિવિધ જિલ્લાઓમાંથી કુલ 8,324 લોકોનું સ્થળાંતર અને 3,711 લોકોનું સફળતાપૂર્વક રેસ્ક્યૂ કરવામાં આવ્યું છે. આજે રાજ્યમાં છુટાછવાયા વિસ્તારોમાં સામાન્ય વરસાદની સંભાવના છે, પરંતુ સાત દિવસ સુધી ભારે વરસાદ કે વાવાઝોડાની કોઈ ચેતવણી નથી. હવામાન વિભાગના જણાવ્યાં અનુસાર, હાલમાં ઉત્તર પ્રદેશના મધ્ય ભાગો પર લો પ્રેશર એરિયા સક્રિય છે, જે આગામી 24 કલાકમાં નબળું પડવાની સંભાવના છે. ગુજરાત પર હાલ પશ્ચિમી પવનો ફૂંકાઈ રહ્યા છે.

ગુજરાતમાં ચાલુ વર્ષે ચોમાસાની સિઝન દરમિયાન અત્યાર સુધીમાં કુલ 18,54,564 હેક્ટર જમીનમાં ખરીફ પાકોનું વાવેતર થઈ ચૂક્યું છે, જે રાજ્યના સામાન્ય વાવેતર વિસ્તાર (85,30,803 ક્ટર)ની સામે 21.74% જેટલું નોંધાયું છે. આ વાવેતરમાં કપાસ અને મગફળી મોખરે છે. ભારે વરસાદને કારણે રાજ્યમાં પંચાયત હસ્તકના 48 રસ્તાઓ અને 1 સ્ટેટ હાઈવે સહિત કુલ 54 રસ્તાઓ વાહન-વ્યવહાર માટે બંધ કરવામાં આવ્યા છે, જેમને પૂર્વવત કરવાની કામગીરી ચાલુ છે. GSRTCની તમામ એસ.ટી. બસ સેવાઓ હાલ સંપૂર્ણપણે સામાન્ય અને ચાલુ છે.

સાત દિવસની હવામાનની આગાહી
આજે સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દ્વારકા, ગીર સોમનાથ, બોટાદ, કચ્છ, દીવ, અમદાવાદ, ગાંધીનગર, આણંદ, પંચમહાલ, દાહોદ, મહિસાગર, બનાસકાંઠા, વાવ-થરાદ, પાટણ, મહેસાણા, સાબરકાંઠા, , અરવલ્લી, ખેડા, વડોદરા, છોટા ઉદેપુર, નર્મદા, ભરૂચ, સુરત, ડાંગ, તાપી, નવસારી, વલસાડ, દમણ, દાદરા અને નગર હવેલીમાં છૂટાછવાયા સ્થળોએ હળવોથી મધ્યમ વરસાદ અથવા ગાજવીજ સાથે વરસાદ પડવાની સંભાવના છે. તેમજ આગામી અઠવાડિયું ચોમાસાની ગતિ ધીમી પડતાં દક્ષિણ ગુજરાત અને સૌરાષ્ટ્રના કેટલાક વિસ્તારો (જેમ કે રાજકોટ, જૂનાગઢ, અમરેલી, ભાવનગર) સિવાય રાજ્યના બાકીના ભાગોમાં હવામાન મુખ્યત્વે સૂકું રહેવાની સંભાવના છે.

જળાશયોની સ્થિતિ : નર્મદા અને અન્ય મુખ્ય ડેમ
સરદાર સરોવર (નર્મદા ડેમ) રાજ્યની જીવાદોરી સમાન નર્મદા ડેમમાં હાલમાં 219,842 mcft પાણીનો સંગ્રહ છે, જે તેની કુલ સંગ્રહ ક્ષમતાના 65.81% જેટલો થાય છે. ડેમમાં હાલ 11,841 ક્યુસેક પાણીની આવક થઈ રહી છે. રાજ્યના અન્ય 206 જળાશયો નર્મદા સિવાયના અન્ય ડેમોમાં કુલ સંગ્રહ ક્ષમતાના 41.12% પાણી ઉપલબ્ધ છે. જેમાંથી 06 ડેમ સંપૂર્ણ (100%) ભરાઈ ચૂક્યા છે, જ્યારે 18 ડેમ 70%થી 100%ની વચ્ચે ભરાયા છે. મુખ્ય ડેમો પૈકી શેત્રુંજી ડેમ 100%, સુખી ડેમ 72.68% અને પાનમ ડેમ 55.97% ભરાયેલા છે. હાઈ એલર્ટ- 10 ડેમ જેમાં પાણીની વિપુલ આવકને કારણે અમરેલીના ધાતરવડી, સૂરજવડી, ખોડીયાર, રાયડી, ધાતરવડી-2, ભાવનગરના રોજકી, માલણ, શેત્રુંજી, રંગહોળા અને તાપીનો દોસવાડા ડેમ 93%થી 100% સુધી ભરાઈ જતાં હાઈ એલર્ટ પર મૂકાયા છે. આ ઉપરાંત સુરેન્દ્રનગરનો વાંસલ, મહીસાગરનો વણાકબોરી, જૂનાગઢનો બાંટવા-ખારો અને ગીર સોમનાથનો રાવલ ડેમ એલર્ટ પર છે. વોર્નિંગ- 10 ડેમની વાત કરીએ તો રાજકોટના લાલપરી અને વેણુ-2, બોટાદનો કાલુભાર અને કચ્છના કાલાઘોઘા સહિત અન્ય 10 ડેમ માટે વોર્નિંગ જાહેર કરાઈ છે.