કચ્છમાં ફલુના કારણે 11ના મોત: ભુજની જનરલ હોસ્પિટલમાં વધારાની 100 પથારી ઉભી કરાઇ

અન્ય પાંચ મૃત્યુ હાર્ટએટેક – કેન્સર સ્ટ્રોકથી: ભૂજ હોસ્પિટલમાં ખાસ વોર્ડ તૈયાર : તાવના વધુ 48 કેસ મળ્યા: સમીક્ષા કરતા આરોગ્ય મંત્રી

કચ્છ જીલ્લાનાં લખપત અને અબડાસા તાલુકામાં શંકાસ્પદ તાવના કેસને લઈને ક્ચ્છ જીલ્લા વહીવટીતંત્ર તેમજ આરોગ્ય વિભાગની તૈયારીઓ અંગે આરોગ્ય મંત્રી ઋષિકેશભાઈ પટેલ તથા કચ્છ જીલ્લા પ્રભારી મંત્રી પ્રફુલભાઈ પાનશેરીયા કચ્છ પહોંચ્યા હતા. ગઈકાલે ભુજ ખાતે જીલ્લા કલેકટર અમિત અરોરા સહીત આરોગ્ય વિભાગનાં અધિકારીઓ સાથે બેઠક યોજીને પ્રવર્તમાન સ્થિતિની સમીક્ષા કરી હતી.

આરોગ્ય મંત્રી ઋષિકેશ પટેલે જણાવ્યું હતું કે કચ્છમાં શંકાસ્પદ તાવના કેસની પરિસ્થિતિને રાજય સરકારે ગંભીરતાથી લઈને રોકથામનાં તમામ જરૂરી પગલાઓ લીધા છે.આગામી સમયમાં કોઈપણ પરિસ્થિતિને પહોંચી વળવા સરકારનું આરોગ્ય વિભાગ અને કચ્છ વહીવટીતંત્ર સજજ છે.

લખપત અને અબડાસા તાલુકામાં શંકાસ્પદ તાવના કેસને લઈને આરોગ્ય મંત્રી ઋષિકેશ પટેલે માહિતી આપતા જણાવ્યું હતું કે તારીખ 3 સપ્ટેમ્બરથી અત્યાર સુધી બન્ને તાલુકામાં જે પણ મૃત્યુ નોંધાયેલા છે તે પૈકી પાંચ મૃત્યુ હાર્ટએટેક, કેન્સર સ્ટ્રોકનાં લીધે થયા છે. જે ચોકકસ કોઈ એક રોગના લીધે થયા નથી.જયારે 11 મૃત્યુ ફલુ અને તેનાંથી થતા ન્યુમોનિયા અને અન્ય મેડીકલ કોમ્પલીકેશનના લીધે થયા છે.

જે સંદર્ભે રાજય સરકારે તાત્કાલીક સર્વેલન્સ અને ટ્રીટમેન્ટના પ્રોટોકોલ અમલમાં મુકયા છે. રાજય સરકારના માર્ગદર્શન જીલ્લા આરોગ્ય તંત્ર દ્વારા લેવામાં આવેલા પગલાઓ વિશે જાણકારી આપતા આરોગ્ય મંત્રી ઋષિકેશ પટેલે જણાવ્યું હતું કે અસરગ્રસ્ત સાત ગામની આજુબાજુના 10 કિલોમીટર ત્રીજયામાં આવતા ગામોમાં આર.બી.એસ.કે ટીમ દ્વારા સર્વેલન્સ કરવામાં આવી રહ્યું છે.

તમામ સાત ગામોમાં 108 નું લોકેશન સેટ કરીને ટીમને સ્ટેન્ડ બાય રાખવામાં આવી છે. જી.કે.જનરલ હોસ્પીટલ ખાતે 100 બેડ આઈસોલેશનની વ્યવસ્થા કરવામાં આવી રહી છે જે માટે વધારાનાં જરૂરી 30 વેન્ટીલેટર, બાઈપેપ અન્ય હોસ્પીટલની જરૂરીયાત મુજબ મંગાવવામાં આવશે. અસરગ્રસ્ત સાત ગામના દર્દીને વિનામુલ્યે જી.કે.જનરલ હોસ્પીટલમાં સારવાર આપવામાં આવશે.

તેમણે કહ્યું હતું કે, અસરગ્રસ્ત બન્ને તાલુકામાં અન્ય જીલ્લામાંથી એપિડેમીક મેડીકલ ઓફીસર તાલૂકાની જવાબદારી આપવામાં આવી છે. હાલ અન્ય જીલ્લામાંથી 10 એમબીબીએસ મોબાઈલ મેડીકલ ટીમ ફાળવવામાં આવી છે. બીજી વધારાની 40 ટીમો રાજય સરકાર દ્વારા ફાળવવામાં આવી રહી છે. અમદાવાદની યુએન મહેતાના કાર્ડીયોલોજીસ્ટને જી.કે.જનરલ હોસ્પીટલમાં ડેપ્યુટેશન પર મુકવામાં આવશે. સીએચસી યાપર પર મુકવામાં આવશે.

સીએચસી યાપર અને નલીયા ખાતે 2-2 ફીઝીશ્યન ડેપ્યુટ કરવામાં આવ્યા છે. તાવના દર્દીનાં સેમ્પલ પૂણે લેબોરેટરી સાથે જીબીઆરએસ ખાતે પણ તપાસણી અર્થે મોકલવામાં આવી રહ્યા છે. આઈએમએ ડોકટર્સ અને કચ્છના તમામ ડોકટર્સ સાથે આ શંકાસ્પદ કેસ બાબતને સારવાર માટે લાઈન ઓફ ટ્રીટમેન્ટનો વર્ચ્યુઅલ વર્કશોપ પણ કરવામાં આવ્યો છે. શંકાસ્પદ તાવની બિમારી વિશે જાણકારી આપતા આરોગ્ય મંત્રીએ જણાવ્યું હતુ કે આ કિસ્સામાં મુખ્યત્વે પાંચથી સાત દિવસ તાવ આવવો, સ્નાયુનો દુ:ખાવો થવો, શ્વાસ ચડવો જેવા લક્ષણ જોવા મળ્યા છે. જેના નિરાકરણ માટે આરોગ્ય ટીમ દ્વારા અસરગ્રસ્ત ગામોમાં ઘરે ઘરે સ્ક્રીનીંગની કામગીરી કરવામાં આવી રહી છે. કુલ 45 ટીમો દ્વારા 22.34 લોકોનું સ્ક્રીનીંગ કરવામાં આવ્યું છે.

આરોગ્ય ટીમને 48 તાવના કેસ સ્ક્રીનીંગથી મળ્યા છે. જે તમામ દર્દીઓને સારવાર આપવામાં આવી છે. વધુમાં આ બિમારી વિશે ચોકકસ જાણકારી મેળવવા રેપીડ રિસ્પોન્સ ટીમ દ્વારા 20 સેમ્પલ પૂર્ણ લેબોરેટરી ખાતે મોકલવામાં આવ્યા છે.