રાજકોટમાં રાત્રિના સમયે વેપારીઓને રોજગાર-ધંધા ચાલું રાખવા સ્પષ્ટતા કરો: પ્રદેશ કૉંગ્રેસ

ખાસ-ખબર ન્યૂઝ  નવી દિલ્હી, તા.4

ગુજરાત પ્રદેશ કોંગ્રેસ સમિતિએ રાજકોટનાં પોલીસ કમિશનરને એક આવેદન પાઠવ્યું છે. જેમાં જણાવાયું છે કે, ગુજરાતમાં વેપારીઓ રાત-દિવસ મહેનત કરી ધંધા રોજગાર ચાલુ રાખી પોતાના ઘર પરિવારનું ગુજરાન સારી રીતે ચલાવી શકે તે માટે રાજ્ય સરકાર દ્વારા 24 કલાક હોટલ રેસ્ટોરન્ટ અને લારી-ગલ્લા ખુલ્લા રાખવા છૂટ આપવામાં આવી છે અને આ જ વાતને ગુજરાત રાજ્યના પોલીસ વડા વિકાસ સહાયે પણ સ્પષ્ટતાપૂર્વક કહ્યું હતું કે રાત્રિના સમયે ગુજરાતના નાગરિક હરી-ફરી શકે ધંધા રોજગાર સારી રીતે ચલાવી શકે તેની જવાબદારી મારી પોતાની છે. આવા સમયે હાલમાં છેલ્લા એકાદ સપ્તાહથી રાજકોટમાં રાત્રિના સમયે 12 વાગ્યા પછી ધંધો નહીં કરી શકાય તેવી અફવાઓ થઈ રહી છે. જો કે આ બાબતે કોઈ સ્પષ્ટતા ન હોવાથી વેપારીઓ હાલાકીનો સામનો કરી રહ્યા છે માટે આ બાબતે સ્પષ્ટતા કરવા વિનંતી છે. ઉલ્લેખનીય છે કે કેટલીક જગ્યાએ એવી ફરિયાદો મળી છે કે કેટલાક પોલીસ કર્મીઓ રક્ષક બનવાને બદલે ભક્ષક બની દાદાગીરીપૂર્વક વેપારીઓને પરેશાન કરી જબરદસ્તી ધંધા રોજગાર બંધ કરાવી રહ્યા છે અને તેમની ચીજ વસ્તુઓને પણ નુકસાન પહોંચાડી રહ્યા છે માટે કોઈ નિર્દોષ માણસ ખોટી રીતે હેરાન-પરેશાન ન થાય તે માટે ખાસ આપને ધ્યાન દોરવા માગીએ છીએ.આપને આ રજૂઆત કરતાં ખાસ જણાવવાનું કે ગુનેગારો સામે કડક પગલાં લેવા જ0 જોઈએ, આ વાત સાથે સહમત છીએ પરંતુ નિર્દોષ લોકો સાથે અન્યાય ન થાય અને કાયદો વ્યવસ્થા સ્થિતિ સારી રીતે ચાલે તે જોવાની જવાબદારી પણ આપની છે. કેટલીક જગ્યાએ પોલીસ તંત્ર ગુનેગારોના ગેરપ્રવૃત્તિના હાટડાઓ અટકાવવાના બદલે શહેરમાં ચા-પાણી, ખાણી-પીણીની હોટલો, રેસ્ટોરન્ટ અને ફૂડ સ્ટોલ પર દાદાગીરીપૂર્વક તેમના ધંધાઓ પર તોડફોડ કરી વાહનોમાં હવા કાઢવી, ફિલ્મી સ્ટાઈલથી પોલીસ વાન ચલાવી અસામાજિક તત્ત્વ જેવું કૃત્ય કરવું અને ખોટી રીતે શાંતિથી ધંધો રોજગાર કરતાં વેપારીઓને ત્રાસ આપી ધંધો રોજગાર બંધ કરાવવાના કિસ્સાઓ સામે આવી રહ્યા છે.

રાત્રિના સમયે જો ખાણી-પીણીની હોટલ અને ચા-પાનની દુકાનો બંધ કરાવાથી ગુનાખોરી થતી અટકતી હોય તો રાજકોટના વેપારીઓ નિયમનું પાલન કરી પોલીસને સહયોગ આપશે પરંતુ શરત કે નિયમો સૌ માટે સરખા હોવા જોઈએ, તેમાં એકને ખોળ અને એકને ગોળ જેવી સ્થિતિ ન હોવી જોઈએ. આપના તરફથી પોલીસ કમિશનર વિસ્તારમાં રાત્રિના સમયે ધંધો રોજગાર ચાલુ ન રાખવા બાબતે કોઈ સ્પષ્ટતા સાથે જાહેરનામુ પ્રસિદ્ધ થયેલું નથી, છતાં અમુક પોલીસકર્મીઓ પોતાની મનસ્વીતા અપનાવી ચા નાસ્તાની લારીઓના વેપારીઓ પર રાગદ્વેષ રાખી અમુક વિસ્તારના રોજગાર ધંધા બંધ કરાવે તો અમુક વિસ્તારના ચાલુ રખાવે છે, એટલું જ નહીં બાજુ બાજુમાં આવેલી દુકાનોમાં પણ ભેદભાવ કરવામાં આવે છે આ તે કેવો નિયમ? જેનો સીધો મતલબ એ થાય કે રાતે અમુક ચાની હોટલો-રેસ્ટોરન્ટમાં તેઓની ભાગીદારી હોય જેથી તેઓને ફાયદો કરાવવા બીજાને બંધ કરાવવી અથવા તો વગ ધરાવતા વેપારીોને ધંધામાં ફાયદો કરાવવા માટે આવી ગોળ-ખોળની નીતિ અપનાવતા હોય તે શરમજનક છે. પોલીસની છબીને લાંછન લગાડે તેવા સામાન્ય લોકો પર ખોટી દબંગાઈ કરતાં પોલીસ કર્મીઓના લીધે શહેરમાં વેપારીઓ અને રોજગાર સાથે સંકળાયેલા નાગરિકોની આર્થિક સ્થિતિ અને રોજગાર પર સીધી અસર કરે છે અને સાથે સાથે પોલીસ તંત્ર પ્રત્યે નાગરિકોના વિશ્ર્વાસને પણ તોડી નાખે છે.

પોલીસ તંત્ર દ્વારા કોઈ જાહેરનામુ પ્રસિદ્ધ કરવામાં આવ્યું હોય તો તે સરકારની નીતિ પ્રમાણે પદ્ધતિસર અમલમાં મૂકવામાં આવે જેથી શહેરીજનોને અને વેપારીઓને પૂર્વ ખ્યાલ આવે તો નિયમોને આધીન લોકો બહાર નીકળી શકે.

શહેરમાં ચોરી, લૂંટ, અસામાજિક તત્ત્વો ખુલ્લેઆમ દારૂના નશામાં પજવણી, જુગાર અને હથિયારસર્જીત ગેરકાયદેસર પ્રવૃત્તિઓ પર નિયંત્રણ મેળવવા માટે પોલીસની નાઈટ પેટ્રોલીંગ અને ઓપરેશનલ સ્ટેટેજી વધુ મજબૂત કરવી જોઈએ નહીં કે રોજગાર ધંધાઓ બંધ કરાવવા જોઈએ.
રાત્રિના હોસ્પિટલોમાં દાખલ દર્દીઓના સગાઓને, બહારગામના વિદ્યાર્થીઓ કે નોકરી કરતાં યુવાનો અને રાત્રિના સમયે નાઈટ શિફ્ટમાં નોકરી કરતાં લોકોને ચા-પાણી, નાસ્તો સહેલાઈથી મળી શકે તે બાબતને પણ ધ્યાને રાખી નિર્ણય કરવો અતિઆવશ્યક છે.
જો કોઈ ખાસ પરિસ્થિતિમાં કોઈ હોટલ અથવા ફૂડ સ્ટોલ બંધ કરાવવાની જરૂરિયાત જણાય તો તેનું કારણ સ્પષ્ટ કરવામાં આવે અને સત્તાવાર લેખિત આદેશ આપવામાં આવે. શહેરમાં અમુક પોલીસ કર્મીઓની પોતાની માલિકીની તેમજ ભાગીદારીમાં ચાલતી ખાણીપીણીની હોટલ, રેસ્ટોરન્ટ 24 કલાક ધમધમે છે અને ત્યાં માનવ મહેરામણ મોટી સંખ્યામાં ઉમટી પડતું હોય છે છતાં ત્યાં કોઈ નિયમો લાગુ પડતાં નથી કે ક્યારેય પોલીસ તંત્ર દ્વારા બંધ કરવામાં આવતી નથી જેથી વેપારીઓમાં પોલીસની બેવડી નીતિનો વિરોધ જોવા મળી રહ્યો છે. નિયમો તમામ વેપારીઓ માટે એકસમાનની નીતિ અમલમાં મૂકવામાં આવવી જોઈએ.

અમુક પોલીસ કર્મચારીઓ વેપારીઓ સાથે રાગદ્વેષ રાખી અન્ય સ્વાર્થવશ કાયદાનો દુરુપયોગ કરી રહ્યા હોય તેઓ સામે કડક પગલાં લેવામાં આવે.
નશાની હાલતમાં ફરજ બજાવીને વેપારીઓને હેરાન કરતાં અમુક પોલીસ કર્મચારીઓ સામે આંતરિક તપાસ કરવામાં આવે અને જરૂરી એન્કફોર્સમેન્ટ એજન્સીઓને પણ સૂચિત કરવામાં આવે.
આગામી સમયમાં પોલીસ તંત્ર અને વેપારી સંગઠનો વચ્ચે બેઠક રાખીને ઉકેલ શોધવાનો પ્રયાસ કરવામાં આવે. હોટલ અને ફૂડ સ્ટોલના વ્યવસાય પર પ્રભાવક કોઈપણ નિર્ણય લેવાય તો તે પહેલાં સંબંધિત પક્ષોને યોગ્ય રીતે માહિતી આપવામાં આવે.
પોલીસ દ્વારા અમારી રજૂઆતને ધ્યાનમાં રાખી વેપારીઓને પડતી મુશ્કેલીઓ દૂર કરી યોગ્ય નિર્ણય કરવામાં આવે તેવી આશા અને અપેક્ષા છે. માટે જો રાત્રિના સમયે ધંધા રોજગાર 12 વાગ્યા પછી ચાલુ ન રાખી શકાય તેવી આપસાહેબની સૂચના હોય તો જાહેરનામુ બહાર પાડવામાં અને ત્યારબાદ દરેક પોલીસ સ્ટેશન વિસ્તારમાં તેની યોગ્ય અમલવારી વેપારીઓએ કરવી તેવું જાહેર કરવામાં આવે જેથી ગેરસમજ ન થાય અને નિર્દોષ લોકોને મુશ્કેલી ન સર્જાય માટે જાહેરનામા અંગે અમલવારી ન કરી તેનું ઉલ્લંઘન કરવામાં આવે તો જાહેરનામા ભંગ બદલ તેમની સામે ગુનો દાખલ કરી કાર્યવાહી કરવામાં આવે તો તેનું અમે સમર્થન કરીએ છીએ.

12 વાગ્યા પછી ધંધો નહીં કરી શકાય તેવી અફવાથી વેપારીઓ પરેશાન: ગુજરાત પ્રદેશ કોંગ્રેસ સમિતિ દ્વારા પોલીસ કમિશનરને આવેદન પાઠવાયું