ખાસ-ખબર ન્યૂઝ જૂનાગઢ
લાંબા સમયથી બાકી રહેલો હાઉસ ટેક્ષ ન ભરનાર વધુ 3 આસામીઓની મિલકતોને મહાનગરપાલિકાએ સીલ મારી દીધું છે. સાથે રૂા.6.70 લાખની વસુલાત કરી છે અને વધુ 136 મિલકતોને ટાંચમાં લીધી છે. શહેરના અનેક આસામીઓ દ્વારા લાંબા સમયથી હાઉસટેક્ષ ભરવામાં આવ્યો નથી. ત્યારે આવા આસામીઓની મિલકતોને સીલ મારવા કમિશનર ડો. ઓમ પ્રકાશે સૂચના આપી હતી. જેને પગલે નાયબ કમિશનર ડી. જે. જાડેજાના માર્ગદર્શનમાં આસિસ્ટન્ટ કમિશન ટેક્સ કલ્પેશ ટોલીયા, હાઉસટેક્ષ સુપ્રિટેન્ડન્ટ વિરલ જોષીની ટીમ દ્વારા કાર્યવાહી હાથ ધરાઇ હતી. આમાં કોર્ટ રોડ પર આવેલ ઝમઝમ પેલેસના એ,બી અને સી વિંગમાં આવેલ ત્રણેય બ્લોક નંબર 8ના મળી કુલ 1,39,439નો હાઉસ ટેક્ષ બાકી હતો. જેથી આ ત્રણેય બ્લોકને મનપાની ઘરવેરા શાખાએ સીલ મારી દીધું છે. જ્યારે 6.70 લાખના ટેક્ષની વસુલાત કરાઇ છે અને વધુ 136 મિલકતોને ટાંચમાં લીધી છે. હજુ આગામી દિવસોમાં પણ બાકી ટેક્ષની રકમ વસુલવા મનપા દ્વારા મિલકતોને સીલ મારવાની કાર્યવાહી કરવામાં આવશે.
