મેરિલબોન ક્રિકેટ ક્લબ (ખઈઈ) એ જાહેર કર્યા 73 નવા નિયમો: લેમિનેટેડ બેટને શરતી મંજૂરી અને હિટ વિકેટના નિયમો વધુ સ્પષ્ટ કરાયા
ક્રિકેટમાં 2022 પછીનો સૌથી મોટો ફેરફાર: 1 ઓક્ટોબરથી બદલાઈ જશે રમતના સમીકરણો
- Advertisement -
હિટ વિકેટ કે અકસ્માત? અમ્પાયરની મૂંઝવણ દૂર કરતા ખઈઈના નવા સુધારા: સંતુલન ગુમાવી સ્ટમ્પ પર પડનાર બેટર હવે આઉટ ગણાશે; ફિલ્ડર સાથે ટક્કરમાં મળશે જીવતદાન
ખાસ-ખબર ન્યૂઝ નવી દિલ્હી, તા.04
ક્રિકેટના નિયમો બનાવતી સંસ્થા મેરિલબોન ક્રિકેટ ક્લબ (ખઈઈ) એ રમતને વધુ રોમાંચક અને પારદર્શક બનાવવા માટે કુલ 73 નિયમોમાં ફેરફાર કરવાની જાહેરાત કરી છે. આ નવા નિયમો 1 ઓક્ટોબર 2026 થી આંતરરાષ્ટ્રીય સ્તરે લાગુ કરવામાં આવશે. વર્ષ 2022 પછી ક્રિકેટના નિયમોમાં આ સૌથી મોટું અપડેટ માનવામાં આવી રહ્યું છે, જે ખાસ કરીને ટેસ્ટ ક્રિકેટના રોમાંચમાં વધારો કરશે.
અત્યાર સુધી ટેસ્ટ મેચમાં દિવસની છેલ્લી ઓવર દરમિયાન જો વિકેટ પડતી, તો બેટિંગ ટીમ નવા બેટરને મોકલ્યા વિના દિવસની રમત પૂરી કરી શકતી હતી. પરંતુ નવા નિયમ મુજબ, હવે છેલ્લી ઓવર કોઈપણ સંજોગોમાં પૂર્ણ કરવી ફરજિયાત રહેશે. જો વિકેટ પડશે, તો નવા બેટરને મેદાન પર આવવું જ પડશે અને ઓવરના બાકીના બોલ રમવા પડશે. ખઈઈના મતે, આ ફેરફારથી બેટર મુશ્કેલ પરિસ્થિતિમાંથી બચી શકશે નહીં અને રમતનો રોમાંચ જળવાઈ રહેશે.નવા નિયમોમાં ઓવરથ્રો અને મિસફિલ્ડ વચ્ચેનો તફાવત સ્પષ્ટ કરાયો છે. ફિલ્ડર જાણીજોઈને વિકેટ પર બોલ ફેંકે અને તે આગળ નીકળી જાય તો જ તેને ઓવરથ્રો ગણવામાં આવશે. હાથમાંથી બોલ સરકી જાય તેને મિસફિલ્ડ કહેવાશે. તેમજ ’ડેડ બોલ’ જાહેર કરવા માટે હવે અમ્પાયરો પાસે વધુ સત્તા રહેશે. જો અમ્પાયરને લાગે કે બેટર હવે રન લઈ શકે તેમ નથી, તો બોલ ફિલ્ડરના હાથમાં હોય તો પણ તેને ડેડ બોલ જાહેર કરી શકાશે.
- Advertisement -
નવા નિયમોના મુખ્ય હાઈલાઈટ્સ
ટેસ્ટ છેલ્લી ઓવર: દિવસના અંતે વિકેટ પડવા છતાં ઓવર અધૂરી નહીં છોડાય, નવો બેટર રમત ચાલુ રાખશે.
લેમિનેટેડ બેટ: લાકડાના બે-ત્રણ ટુકડા જોડીને બનેલા સસ્તા બેટને ક્લબ ક્રિકેટમાં મંજૂરી.
ડેડ બોલ: અમ્પાયરને બોલ ’ડેડ’ જાહેર કરવાની વધુ સત્તા અપાઈ, બોલ ફિલ્ડરના હાથમાં હોય તો પણ તે ડેડ ગણાઈ શકશે.
હિટ વિકેટ: બેટ હાથમાંથી છૂટીને સીધું સ્ટમ્પ પર લાગે તો આઉટ, પણ જો તે ફિલ્ડરને અડીને સ્ટમ્પ પર લાગે તો નોટ-આઉટ.
ઓવરથ્રો: ફિલ્ડરના હાથમાંથી બોલ સરકે તો તે મિસફિલ્ડ ગણાશે, ઓવરથ્રો માત્ર વિકેટ પર ફેંકેલા બોલના કિસ્સામાં જ ગણાશે.
લેમિનેટેડ બેટ અને હિટ વિકેટના નિયમો
ખઈઈ એ ક્લબ લેવલના ક્રિકેટમાં લેમિનેટેડ બેટ (લાકડાના ટુકડા જોડીને બનાવેલા સસ્તા બેટ) ને વાપરવાની મંજૂરી આપી છે. આ ઉપરાંત હિટ વિકેટના નિયમને વધુ સ્પષ્ટ કરતા જણાવાયું છે કે જો બેટર શોટ રમ્યા બાદ સંતુલન ગુમાવીને સ્ટમ્પ પર પડે તો તે આઉટ ગણાશે. જોકે, ફિલ્ડર સાથે ટકરાવાને કારણે સ્ટમ્પ પડે તો તેને નોટ આઉટ આપવામાં આવશે. જો બેટરના હાથમાંથી બેટ છૂટીને સીધું સ્ટમ્પ પર વાગે તો તે આઉટ ગણાશે, પરંતુ જો તે કોઈ ફિલ્ડરને અડીને સ્ટમ્પને અડે તો બેટર બચી જશે.
